Diahuebs April 4 2013
Pagina 16
Cifranan for di 22 di Maart pa 31 di Maart 2013:
Semana Santa 2013 a mustra un aumento den cantidad di movecion di vuelonan comercial
STA. CRUZ -- Aruba Airport Authority N.V. (AAA) hunto cu e otro autoridadnan na aeropuerto a prepara di adelanta pa e trafico halto cu tabata wordo spera durante e temporada di Semana Santa y por mira atras na un temporada exitoso di Semana Santa 2013: Mientras cu menos vuelo charter tabata wordo spera for di Venezuela compara cu e aña anterior, e cantidad di vuelo comercial a mustra un aumento compara cu 2012: Di 1131 movecion aereo den 2012 pa 1179 movecion den
2013. AAA a enfoca tambe riba e vuelonan di Aviacion General, como cu trabaonan di construccion ta tumando lugar y den e añanan anterior e demanda pa e facilidad di avionnan priva a mustra un aumento substancial. Pero, e cantidad pa Semana Santa 2013 a baha compara cu anja pasa, pero asina mes e ta mas halto compara cu 2011: Di 1068 movecion aereo den 2012 pa 846 den 2013. “E inversionnan haci na e parti pazuid a sigura cu e rampa no mester a wordo cera
na ningun momento durante e temporada druk, compara cu añanan anterior unda cu esaki si tabata e caso. Banda di e capacidad extra di parkeo, e extra personal, extra ‘buffer zone’ na e parti pazuid y preparacion di antemano a mustra di ta exitoso pa e temporada druk y nos ta hopi contento cu obstante e hecho cu tabata hopi druk, nos pasaheronan a wordo trata eficientemente, pero toch ricibiendo un trato caluroso na aeropuerto”, asina CEO di AAA, Sr. Peter Steinmetz a bisa.
RBC Royal Bank ta haci donacion na Fundacion Autismo Aruba
STA. CRUZ -Recientemente RBC Royal Bank a haci un donacion na Fundacion Autismo Aruba den cuadro di e Dia Mundial di Autismo riba diamars 2 di April. RBC ta contento di por aporta na e fundacion aki mirando cu RBC tin su ‘Children’s Mental Health Project’ cu ta diseña pa sostene organizacionnan cu ta dedica na provee intervencion
den un fase tempran, aumenta concientizacion publico y duna sosten y guia na mayornan. Riba e portret adhunto por mira momento cu sr. Wayne Kowlessar, Area Vice President Personal Banking di RBC Royal Bank (Aruba) N.V. ta haci entrega di e cheque na srta. Thaisse Erasmus, Office Manager di Fundacion Autismo Aruba.