Diahuebs Maart 13 2014
Pagina 9
Na vispera di Dia Mundial di Riñon:
Fundacion Kidneys 297 ta reuni cu Minister dr. Alex Schwengle
World Kidney Day ta wordo conmemora diahuebs, dia 13 di Maart, unda cu internacionalmente, pero na Aruba dokternan y personal medico, como tambe organizacionnan trahando na beneficio di pacientenan y riba e tereno di conscientizacion y prevencion di maleza di riñon ta subraya e importancia di e organo aki pa e ser humano. Na Aruba, e organizacion Kidneys 297 a produci un publicacion “Transplante
di Riñon”, cual ta relata e experiencia di un acompañante di un paciente cu a bay haci transplante na Hulanda. E buki, cu ta obtenibel na Superfood y Van Dorp ta contene conseho, splicacion y contesta pa hopi pregunta cu e paciente y/of compañante di e paciente por tin pa cu e tratamento, cuido, etc. di e paciente. Pa introduci e fundacion cerca Minister di Salud, dr. Alex Schwengle y papia
cune tocante nan trabao y plannan pa e siguiente dos añanan y mas den futuro e presidente, secretario y tesorero di e Fundacion Kidneys 297 tabata di bishita riba diarazon cerca e mandatario. Presidente di Fundacion Kidneys 297, Monet Jones a bisa cu e reunion cu Minister Schwengle a bay den bon ambiente. Hunto cu Deborah Alexander, tesorero y Jennifer Margareta, secretario, el ‘a introduci
nan publicacion na e mandatario. Nan a splica tambe cu primordialmente nan trabao ta den area di prevencion, pero cu den futuro e intencion ta pa Fundacion Kidneys 297 tambe brinda sosten na pacientenan di maleza di riñon, pero nan no ta cla ainda pa ta activo riba e tereno di sosten. Monet Jones a splica cu e fundacion ta den contacto cu Nefrologo na hospital, dr. Kock y tambe cu nan lo bishita e centro di dialisis nobo na IMSAN proximamente.
Tambe e fundacion tin relacion cu Departamento di Salubridad, IBISA y SVb pa crea mas oportunidad, mas sosten y mas cooperacion pa nan trabao di conscientizacion y prevencion. E mensahe di Fundacion Kidneys 297 ta cu tur hende tin dos riñon y mester percura pa cuida nan riñonnan y asina evita maleza cu por resulta den dialisis, transplante of complicacionnan pior; “Bo Riñonnan, cuida nan, mientras bo edad ta avanzando, e funcion di bo riñon ta disminui.”
For di New York durante E-Aruba Seminar Ramon Ray cu
TIPS CON PA HACI MIHOR USO DI SOCIAL MEDIA PA COMPANIANAN Diasabra 5 di April 2014 na Renaissance Convention Center RBC Royal Bank y Infinity Media Aruba ta presente e prome E-Aruba Seminar. Tres orador di Merca lo ta na Aruba. Un di nan ta e conocido Ramon Ray di New York. Ramon Ray ta escritor di e “best-seller” book “The Facebook Guide to Social Media Marketing for Small Business”. Durante e seminario e lo ta encarga pa duna un presentacion riba Social Media. Aki e publico presente lo bay haya un sin fin di tips y tambe conocemento di lo ultimo den e material. E forma cu bo ta usa por ehempel un facebook a base personal ta completamente diferente ora cu bo ta usando e como compania. Hopi ta esnan den mercadeo cu no ta sigur kico e strategia correcto ta. Aki Ramon lo divulga varios informacion concreto a base di ehempelnan real. Ramon Ray ta un oradornan conoci mirando cu e ta wordo puntra na varios ocasion pa duna informacion den diferente programa di television e.o na MSNBC. Tambe e ta
skirbi relatonan pa diferente revista cu topiconan tecnologico. Ramon tin un forma hopi unico di presenta usando hopi humor. Ramon ta bisa di su mes cu e no ta un comediante, pero cu e lo ponebo hari. Su perogativo ta pa yuda companianan crece usando tecnologia. E kaarchinan pa e seminario ya a sali na venta na Office Systems, Write Here y online via www.e-aruba.com. Riba e website por haya mas informacion tambe relaciona cu e otro oradornan cu lo hiba palabra riba topiconan di “Digital Marketing” y “Entrepreneurship”. E evento ta wordo patroniza pa RBC Royal Bank Aruba, Marriott Resorts Aruba, Office Systems Aruba, Insel Air, Setar, Brand-it PR & Marketing, Crown Electronics, Tera Group, WEB Aruba N.V. , Elite Productions, Cool FM 98.9, Magic FM 96.5, Fresh FM 104.3 , Click Print y 24ora.com. E organizacion ta den man di Infinity Media Aruba.