Made in Europe: Power of Diversity - македонски

MADE IN EUROPE / СОЗДАДЕНО ВО ЕВРОПА

MADE IN EUROPE The power of diversity

MADE IN EUROPE www.antolog.mk

The power of diversity

Големата фабрика за зборови Ањес де Лестрад Валерија Докампо Превод од француски: Владо Ефтимов ISBN: 978-608-243-570-1 Наслов на оригиналот: La grande fabrique de mots Едиција МК Сликовници, 32 книга Број на страници: 36 Димензии: 27×27

ПРЕВЕДЕНА НА ПОВЕЌЕ ОД ТРИЕСЕТ ЈАЗИЦИ ВО СВЕТОТ!

Постои земја во која луѓето речиси и не зборуваат. Во таа чудна земја, зборовите мора да се купат и да се проголтаат, за да може да се изговорат. На Филеас итно му се потребни зборови за да може, на убавата Сибел да ѝ го честита роденденот. Но, за сето она што би сакал да ѝ го каже, потребно е цело богатство, а тој нема пари. Не се прашуваат само возрасните како да ги изразат своите мисли и чувства. Малиот Филеас е сигурен во својата љубов, но дали неговиот труд ќе му овозможи тоа и да го искаже? Со само неколку збора, бидејќи зборовите се скапи во земјата на „Големата фабрика за зборови“... Ова е книга што говори за љубовта, за желбата, за потрошувачкото општество во кое сѐ се мери низ призмата на парите, за насилството, за нежноста и, што можеби е најважно – во животот едноставно треба да собереме храброст и да се обидеме да го постигнеме она што многу ни значи.

Ањес де Лестрад / Валерија Докампо

ГОЛЕМАТА ФАБРИКА ЗА ЗБОРОВИ

Ањес де Лестрад (1964) е француска новинарка и авторка на сликовници и книги за деца и млади. Нејзините дела ја разгоруваат детската мечта со возбудливи теми што како да излегле од најубавите соништа. Освен тоа, осмислува забавни друштвени игри за најмладите, пишува песни и води работилница за креативно пишување. Автор е на над седумдесет книги (сликовници, приказни и романи). За своите дела повеќепати е наградувана со угледни, книжевни награди: „Prix Papillotes“ и „Prix littéraire de la Citoyenneté“ (2010) за „Големата фабрика за зборови“; „Coup de coeur“, која ја доделува францускиот Национален центар за книжевност за млади (2008, 2012, 2016); „Prix Tatou“ (2012), како и наградата „Prix des incorruptibles“, за која книгите ги предлагаат стручњаци од областа на воспитанието и образованието, а ја доделува жири составено од деца читатели (2008, 2010).

Валерија Докампо (1976) е аргентинска илустраторка. Дипломирала на Отсекот за дизајн и визуелна комуникација при Академијата на ликовни уметности на универзитетот во Буенос Аирес, каде што подоцна станала предавач. Од 2006 година се посветила исклучиво на илустрирање книги за деца, при што користи класични и дигитални техники и постојано истражува нови изразни форми. Автор е на илустрации за десетина сликовници.

Владо Ефтимов (1956) е преведувач од француски и од српски јазик. Дипломирал во 1980 година на Филолошкиот факултет – Катедра за романска филологија на Универзитетот „Св. Кирил и Методиј“ – Скопје. Од 2003 до 2014 година работел во редакцијата „Детска радост“, како новинар и уредник на повеќе списанија за деца и млади. Превел голем број новинарски текстови, дваесетина драми (за аматерскиот театар „Чекори“), стотина сликовници и книги за деца и млади, како и голем број книги за возрасни. Се занимавал и со лексикографска дејност.

Невидлив Елој Морено

Превод од шпански: Виолета Јагев ISBN: 978-608-243-571-8 Наслов на оригиналот: Eloy Moreno, Invisible Едиција Бранови, 353 книга Број на страници: 272 Димензии: 13×20

НАГРАДИ „ЈОЛЕО“ И „АЧЕ“ ЗА 2019 ГОДИНА

Приказна за едно дете кое, раководејќи се од најлошиот советник – стравот, посакува да има супермоќи како суперхероите од стриповите што ги чита. Го прави тоа за да се спаси од насилството што го трпи од соучениците. Посакува да стане невидливо, како механизам за бегство, за заштита од суровата реалност што го опкружува, без да биде свесно дека всушност страда. Детето не добива помош од никој, бидејќи е невидливо за сите оние што гледаат што се случува но претпочитаат да не видат, за сите што не сакаат да гледаат и ја вртат главата настрана, и за сите што гледаат но се плашат или едноставно мислат дека тоа не е нивен проблем. Како што вели и самиот автор: „Никој не е невидлив ако другите не му помогнат да биде невидлив“. Невидлив е приказна раскажана низ призмата на насилникот и жртвата, неговата симпатија и пријателите, родителите и наставниците, и поучна за сите што ќе ја прочитаат. Училишното насилство отсекогаш било присутно меѓу нас, но овој роман е напишан сега и тука, од талентиран автор што го прави ова искуство уште помоќно од она во реалноста. Романот досега има повеќе од дваесет изданија и е преведен на многу јазици. Невидлив ги добива наградите „Јолео“ и „Аче“ за 2019 година, а бил финалист и за наградата „Менхалибрес“.

Елој Морено

НЕВИДЛИВ

Елој Морено (1976) е шпански писател. Студирал компјутерски менаџмент и работел во компјутерска компанија. Поради големата љубов кон книжевноста својот прв роман го објавил самостојно и го продал во повеќе од 200 000 примероци. Подоцна објавува уште неколку романи, од кој најпознат е Невидлив (2018). Автор е и на тритомно дело наменето и за возрасните и за децата, веќе прифатено како лектира во многу образовни центри. Сакајќи да им помогне на младите писатели во 2016 година започнал курс за самиздати.

Виолета Јагев (родена 1953) е дипломиран инженер технолог и преведувач од шпански јазик. Живеела во Перу 17 години, каде што завршила основно и средно образование и првите две години на Факултетот за петрохемија. Дипломирала на Технолошкиот факултет при Универзитетот „Св. Кирил и Методиј“ во Скопје. Дополнително се школувала и работела на компјутерска обработка на податоци. Со преведување се занимава од 1979 година и има над 40 книжевни преводи. Добитник е на наградата за превод „Ванѓа Чашуле“ во 2012 година, и наградата „Кирил Пејчиновиќ“ за преведувачки опус во 2017 година на Советот на Меѓународната средба на книжевните преведувачи. Има огромен број на преводи од шпански на македонски јазик и обратно.

America Zharko Kujundziski

Превод од македонски: Маријанџела Бјанкофиоре ISBN: 978-608-243-579-4 Наслов на оригиналот: Жарко Кујунџиски, Америка Едиција: N.B., 3 книга Број на страници: 208 Димензии: 13×20

„АМЕРИКА “ НА ИТАЛИЈАНСКИ ЈАЗИК ВО СОРАБОТКА СО BESA EDITRICE

Да замислиме две нешта: Америка да биде личност, а не име на континент и да биде тој, а не таа. Значи, си имаме работа со Америка Берти, триесетгодишен маж чие искуство може да се спакува во џеб од панталони. Едноставен како „извини“ и повлечен како мирно море. Америка Берти, тоа триесетгодишно дете со големо име и со скромни барања. Да вози велосипед наоколу, да лови риба, да игра со своите поќерки и по посетата на поштарот, во осаменост да минува часови со писмата што никој не знае од кого и од каде пристигнуваат. Ајде сега да замислиме дека сме во Италија, од другата страна на Јадранското Море, и некаде меѓу Бриндизи и Монополи е скриено малото Тинтинио, место што го нема на географска карта, но во него гравитираат толку многу уникатни личности што го заслужува вниманието на светот. Кога тие две нешта ќе се спојат – чудните навики на еден интровертен човек и љубопитноста на провинцијата што живее од секојдневниот џагор – се создава дело што го носи шармот на приказните што се паметат цел живот. Роман за опојната привлечност на непознатото, роман за љубовта и пријателството, за потрагата по дом, за неможноста на простувањето, за апсурдот на заборавот, за отсуството како судбина и пред сè роман за утописката (не)моќ на зборот.

Zharko Kujundziski

AMERICA

Жарко Кујунџиски (Скопје, 1980) – романсиер, есеист, раскажувач, драмски автор, поет, филмски критичар и преведувач. Дипломирал и магистрирал на катедрата за Општа и компаративна книжевност на Филолошкиот факултет „Блаже Конески“. Основач и уредник на електронското списание „Репер“ (www.reper.net.mk), основач на првиот фестивал за европска литература „Bookstar“. Сопственик е на издавачката куќа „Антолог“ од Скопје. Автор е на 13 книги. Негови дела се преведени на англиски, српски, хрватски, словенечки, полски, германски, турски, бугарски, италијански, украински, албански и на други јазици. Застапен е во голем број антологии на македонската проза и поезија. Неговиот расказ „Кога се губат очилата“ е дел од реномираната антологија The Best European Fiction 2013. Добитник е на наградите „13 Ноември“, „11 март 1943“, „Бели мугри“, „Студентски збор“, како и на награди за сценарио и глума на Фестивалот „Лица без маски“. Романот Сфинга на гневот бил македонски претставник за наградата „Балканика“ за 2021 година Член е на Друштвото на писатели на Македонија и на македонскиот ПЕН-центар.

Маријанџела Бјанкофиоре е родена во 1981 година во Мола ди Бари, мало рибарско гратче помеѓу Бари и Монополи. Дипломирала македонски јазик и книжевност и англоамерикански јазици и книжевности на Универзитетот Л’Ориентале во Неапол, потоа специјализирала теорија и практика на литературниот превод на Универзитетот во Бари. Живеела од 2006 до 2017 година во Скопје, предавала на некои универзитети каде што била активно инволвирана во промоција на културни и општествени проекти. Има преведено различни македонски автори како Луан Старова, Олег Дементиенко, Ката Ќулавкова, Драги Михајловски, Александар Прокопиев, Лидија Димковска, Влада Урошевиќ и Жарко Кујунџиски. Преведувала за првата антологија посветена на македонската литература („Македонија. Книжевноста на соништата“) и ја уредила првата „Ромска антологија“. Преведува од македонски, бугарски и од англиски јазик.

W Игор Штикс

Превод од хрватски: Ѓорѓи Крстевски ISBN: 978-608-243-577-0 Наслов на оригиналот: Igor Štiks, W Едиција Бранови, 357 книга Број на страници: 288 Димензии: 13×20

ПРЕСЕК НА ПОСЛЕДНИТЕ ПОЛОВИНА ВЕК НА ЕВРОПСКАТА И СВЕТСКА ЛЕВИЦА

Игор Штикс е левичарски интелектуалец кој по повеќе од дваесет и пет години се враќа на Јадранот за читањето на тестаментот на Валтер Штиклер, конзервативен француски филозоф кој под неразјаснети околности е убиен во Далмација. Таму ја среќава згодната активистка Теса Симон. Двајцата се запознаваат еден со друг во куќата на Валтер, но ги запознаваат и мистериозната историја за Валтер, кој од левичар од 1968 година станал водечки десничарски мислител, како и неговиот пријател Владимир, највлијателниот лев милитант, зад чиј терористички ракопис секогаш се крие доза иронија и кој продолжува да ги инспирира сите млади бунтовници на денешнината. Приказната за Валтер и Владимир се отвора пред Игор и Теса како напнат политички трилер на современата историја на Европа кој нѐ води во сите делови на континентот. За да ги осознаат сите поединости и за да ги откријат тајните, тие двајцата мора да отидат во родниот град на Игор и Валтер, Сараево. Најновиот роман на Игор Штикс е книга што буквално не се испушта од раце. Напишана во манирот на најдобрите скандинавски трилери, преполн интриги и пресврти, „W“ ни дава пресек на последните половина век на европската и светска левица, на нејзините борба, падови и застранувања. Овој роман кој во атмосферата потсетува на Пол Остер или Хавиер Серкас никого нема да остави рамнодушен.

Игор Штикс

W

Игор Штикс (1977) е писател и универзитетски професор. Живеел во Загреб, Париз, Чикаго, Единбург и во Белград. Автор е на четири романи, една поетска збирка, три драми, сите со исклучителен прием и кај публиката и кај критиката. За своjата книжевна и јавна дејност го има добиено француското одликување „Витез на уметноста и книжевноста“. Книгите му се преведени на петнаесетина јазици. Важи за еден од најистакнатите левичарски литерати и интелектуалци на европско рамниште.

Ѓорѓи Крстевски (Скопје, 1981), преведувач од руски, српски, хрватски и од англиски јазик. Досега превел триесеттина книги што се објавени во Македонија за неколку угледни издавачки куќи, а неколку негови преводи уште се необјавени. Завршил руски јазик и книжевност на Филолошкиот факултет „Блаже Конески“ во Скопје, а со преводи се занимава веќе петнаесеттина години. Како автор пишува кратки раскази, поезија и афоризми. Има објавено две самостојни збирка раскази. Живее и работи во Скопје.

Девојката Смрт Луцие Фаулерова

Превод од чешки: Маргарета Карајанова ISBN: 978-608-243-607-4 Наслов на оригиналот: Lucie Faulerová, Smrtholka Едиција Бранови, 368 книга Број на страници: 192 Димензии: 13×20

НАГРАДА ЗА ЛИТЕРАТУРА НА ЕВРОПСКАТА УНИЈА ЗА 2021 ГОДИНА

Додека се враќа со воз во родното место, на Марија, главниот лик и раскажувач во романот, ѝ се нижат слики од животот во минатото на нејзиното дисфункционално семејство, на младешките радости и таги, пороци, љубов... Почнува од нејзиното речиси идилично детство, но набргу стигнува до мрачните настани од поблиското минато, цело време промислувајќи ја смислата и потребата за постоење во сегашноста. Товарот на сеќавањето изгледа претежок, и таа го очекува крајот. Со возот, и Марија ќе стигне на својата крајна дестинација. „Девојката Смрт“ може да се чита како семеен роман, како роман-студија за самоубиствата, како психолошко-контемплативен роман, како роман за девојка која и покрај тешката реалност сака да живее. Може да го чита кој како милува, но ретко дека некого ќе го остави рамнодушен. Иако навидум главната тема во романот е самоубиството, Фаулерова изјавила дека главната тема е слободата. Слободата во смисла на тоа човекот сам да го направи сопствениот избор – дали да живее или не.

Луцие Фаулерова

ДЕВОЈКАТА СМРТ

Луцие Фаулерова (1989) е чешка писателка. Дипломирала бохемистика на Палацкиот универзитет во Оломоуц. Во 2016 година, заедно со авторката Катерина Шеда, ја напишала книгата „БРНОКС – водич низ брненскиот Бронкс“, за која ја добиле наградата Магнезија литера за журналистика. Од 2014 година е редактор на книжевното списание „Алузе“. Најголемиот успех за писателката доаѓа со објавувањето на романот „Девојката Смрт“ во 2020 година, за кој ја добива Наградата за литература на Европската Унија за 2021 година.

Маргарета Карајанова е преведувач од чешки јазик и поранешен лектор по македонски јазик на Масариковиот универзитет во Брно, Република Чешка. Ги превела романите: „Бесмртност“, „Неподносливата леснотија на постоењето“ и „Шега“ од Милан Кундера и неговата збирка раскази „Смешни љубови“. Исто така, ги превела и книгите: „Љубовно писмо со клинести знаци“ на Томаш Змешкал и „Звукот на сончевиот часовник“ на Хана Андроникова, добитници на наградата за литература на Европската Унија. Нејзини преводи се романите „Разуздано лето“ од Владислав Ванчура, „Рибја крв“ од Јиржи Хајичек, бестселерот „Воспитувањето девојки во Чешка“ од Михал Вивег и носителите на чешката награда за книга на годината Магнезија литера: „Парите од Хитлер“ на Радка Данемаркова како и „Спирални реченици“ од Даниела Ходрова, по кој следува преводот на романот „Повикување“ од истата авторка. Ги превела и романот „Гаргара со катран“ од Јахим Топол, книгата „Еуропеана“ од Патрик Оуржедњик, збирките раскази „Како ќе биде по смртта“ од Ладислав Клима и „Ерусалимски раскази, Кафка во Ерусалим“ од Виктор Фишл. Во последно време преведува детска книжевност: „Јазовецот Итре ја најде големата љубов“, „Јазовецот Итре снима филм“ и Јазовецот Итре патува во вселената“ од Петр Станчик, „Франтишек од костенот, Анежка од сончогледите“ од Радек Мали и две сликовници од Павел Чех – „Големата авантура на Пепик Стреа“ и „За градините“.

Се викам Марите Алвидас Шлепикас

Превод: Катерина Сапаловска ISBN: 978-608-243-596-1 Наслов на оригиналот: Mano vardas – Marytė Едиција Бранови, 373 книга Број на страници: 192 Димензии: 13×20

НАГРАДА „GEORG DEHIO“ ЗА 2018 ГОДИНА – ГЕРМАНИЈА

Романот се базира на вистински случувања кои ги пресретнале германските жени и деца по завршувањето на Втората светска војна. „Волчите деца“ се деца кои останале без своите семејства после 1945 година. Се смета дека нивниот број изнесувал од 10 000 до 25 000. Тие растеле со еден родител или без родители и биле лишени од нормално детство, оставени на себе во мрачните пруски шуми. Таму прерано се запознале со одговорноста, несправедливоста и со суровоста на животот. Барале засолниште меѓу литванските семејства каде што не биле секогаш топло добредојдени, најчесто поради страв од депортација на Сибир или затоа што ни тие немале што да јадат. Литванците кои се одлучувале да земат кај себе некое од „волчите деца“, се обидувале прво да ги научат литвански јазик, а потоа да им извадат документи со променети имиња со цел да се заштитат од суровиот советски режим. СССР за поголемиот број луѓе е доживуван само како ослободител на Европа од фашистичката тиранија, но она што всушност се претставува во романот ни дава слика дека доаѓа до замена на едно зло со друго.

• • • •

Книга на годината за 2012 година – Литванија. Награда „Georg Dehio“ за 2018 година – Германија. Номинација за наградата „Angelus“ за 2016 година – Полска. „Една од најдобрите книги за 2019 година“, – The Times, Велика Британија.

Алвидас Шлепикас

СЕ ВИКАМ МАРИТЕ

Алвидас Шлепикас (1966) е литвански романсиер, поет, драматург и актер. Дипломирал актерска игра и театарска режија. Работел за телевизија и за театар. Дебитирал како поет во 1994 година. За „Се викам Марите“ добил многубројни награди. Член е на Друштвото на писатели на Литванија и на литванскиот ПЕН Центар.

Катерина Сапаловска дипломирала на катедрата за полски јазик на Филолошкиот факултет „Блаже Конески“ во Скопје. Моментално е на магистерски студии на универзитетот во Лоѓ, Полска. Магистерскиот труд на кој работи се однесува на разговорниот полски јазик и фразеологијата поврзана со животни. Од својата прва студентска размена на Шлезискиот универзитет во Катовице има учествувано на неколку вакви размени. Откако се запознава со делото на авторите Анджеј Сапковски, Олга Токарчук и Мариуш Шчигел, пројавува голем интерес кон преведувањето. Најголемо задоволство наоѓа во историјата на полскиот јазик, глотодидактиката и фотографијата..

Во понеделник ќе нѐ сакаат Наџат Ел Хачми

Превод од каталонски: Лара Прокопиева ISBN: 978-608-243-597-8 Наслов на оригиналот: Najat El Hachmi, Dilluns ens estimaran Едиција Бранови, 371 книга Број на страници: 272 Димензии: 13×20

НАГРАДА НАДАЛ ЗА 2021 ГОДИНА НАГРАДА BOOKSTAR ЗА 2022 ГОДИНА

Во романот е раскажана судбината на една девојка од маварско потекло, ќерка на емигранти од Мароко, која поминува проблематични пубертетски години во строго контролирано и претежно муслиманско соседство во предградие близу Барселона за време на 1990-тите години. Постојаната присила да се покорува на закоравените религиозни правила и на машката доминација, типични за мало мароканско село од каде што доаѓа нејзиното семејство, се судираат со современото шпанско општество во кое живее Наима. Спротивставеноста на културите наспроти потребите и желбите на младата девојка се засилува по средбата и силното пријателство со уште една маварска девојка, која поседува смелост да живее на свој начин. Таа ја поттикнува Наима и самата да се впушти во потрага по сопствената индивидуална слобода. Наџат Ел Хачми ја води нарацијата непристрасно, прикажувајќи го лицемерието на „демократското“ општество во кое двете другарки ќе треба да се соочат со стереотипите создадени врз основа на полот, потеклото и социјалната класа и поради тоа да платат висока цена. „Во понеделник ќе нè сакаат“ во 2021 година ја добива наградата „Надал“, една од најпрестижните награди за книга напишана на шпански јазик.

Наџат Ел Хачми

ВО ПОНЕДЕЛНИК ЌЕ НЀ САКААТ

Наџат Ел Хачми (1979) е шпанска писателка со мароканско потекло. На осумгодишна возраст се преселуваат со семејството од Мароко во Каталoнија. Дипломирала арапска филологија во Барселона. Авторка е на голем број наградувани дела во коишто внесува елементи од нејзиниот двоен идентитет и богат женски свет. Нејзините романи се одлично прифатени не само од критиката, туку и од читателската публика. Преведувана е на голем број јазици низ светот.

Лара Прокопиева (1989, Скопје) е дипломиран преведувач и толкувач по италијански и шпански јазик и книжевност на Филолошкиот факултет „Блаже Конески“. Завршила во Средното музичко училиште „Илија Николовски – Луј“. Има магистрирано во областа на културолошките студии во Институтот за македонска литература во Скопје. Живее и работи во Шпанија. Објавила есеи и стручни текстови во повеќе домашни и меѓународни списанија и ја издала книгата есеи „Патувања... Патописи... Книги...“ (2018). Од шпански јазик ги превела книгите: „Разузнавачки извештаи“ од Хорхе Азис, „Свињите“ од Феликс Бруцоне, „Опседнатите“ од Бетина Гонзалес, како и книгата „Шопен: Принцот на Романтизмот“ од Адам Замоски (од англиски јазик).

Смола Ане Рил

Превод од дански: Искра Бадева ISBN: 978-608-243-665-4 Наслов на оригиналот: Ane Riel, Harpiks Едиција Бранови, 404 книга Број на страници: 256 Димензии: 13×20

ДОБИТНИК ЧЕТИРИТЕ НАЈВАЖНИ КРИМИ-НАГРАДИ ВО СКАНДИНАВИЈА

Лив умрела кога имала шест години. Барем така гласи официјалната верзија. Една вечер таткото ќе го турне нивниот чамец кон брановите и ќе гледа како се распарчува од карпите. Потоа ќе ја пријави својата ќерка како исчезната. Службената потера трае долго и безуспешно. Но, зад шутот пред работилницата на нејзиниот татко се крие Лив. Живее сама во мракот, треперејќи пред секој неочекуван шум. Татко ѝ тврди дека на ваков начин нема да мора да оди на училиште. Нема да мора да ги напушти родителите и да се соочи со светот кој е полн со опасности и лоши луѓе. Неизмерно трогателната и напната приказна прикажува што се случува кога некого премногу сакате, а желбата да го заштитите се претвора во нешто што таа личност неповратно ќе ја повреди. „Смола“ ги доби четирите најважни крими-награди во Скандинавија и доживеа светска препознатливост. „Гардијан“, „Телеграф“ и „Дејли експрес“ ја прогласија за еден од најдобрите романи во 2018 година. Досега е преведена во 31 земја, а во 2019 година е адаптирана во филм.

Ане Рил

СМОЛА

Ане Рил (1971) е данска писателка. Студирала историја на уметност. Иако не го завршила факултетот, нејзината прва книга била токму за уметноста. Авторка е на четири романи, збирка раскази, како и на девет книги за деца кои ги има илустрирано нејзината мајка. Екстремна популарност стекнува со нејзиниот втор роман, „Смола“. Често ја опишуваат како нов, возбудлив глас со освежувачки и оригинален стил. Живее со сопругот, популарниот џез-музичар Алекс Рил, во близината на Копенхаген.

Искра Бадева е родена во Скопје во 1980 година. Како вљубеник во културата и литературата на Северот, ги има завршено студиите по скандинавистика на Софискиот универзитет во 2007 година. Живее и работи во Скопје. Преку своите преводи се надева дека ќе ја разбуди љубопитноста на македонските читатели кон историјата, секојдневието и начинот на размислување на северните народи. Интензивно работи на преводи на романи и детска литература од норвешки, шведски, дански и фински јазик. Добитник е на наградата „Златно перо“ за 2011 година која ја доделува Здружението на литературни преведувачи на Македонија. Има преведено повеќе од педесет дела на актуелни скандинавски автори, меѓу кои се Сара Омар, Мерта Тиканен, Ерленд Лу, Туве Јансон, Пер Петешон, Марија Пар, Ју Несбе, Маури Кунас, Лиса Аисато, Геир Гуликсен, Катри Липсон, Томас Енгер, Ида Хојер, Рој Јакобсен и други, како и избор драми од Хенрик Ибзен.

Мутации Франсис Кирпс

Превод од германски: Ксенија Чочкова ISBN: 978-608-243-592-3 Наслов на оригиналот: Francis Kirps, Die Mutationen Едиција Бранови, 362 книга Број на страници: 176 Димензии: 13×20

НАГРАДА ЗА ЛИТЕРАТУРА НА ЕВРОПСКАТА УНИЈА ЗА 2020 ГОДИНА

Домашната мува Леон Зумса се буди едно утро и се наоѓа себеси преобразена во „монструозен ‘рбетник“, односно човечко суштество. Лавот од сатирата на Курт Тухолски „Лавот избега!“ мутира во поларна мечка која го истражува хипстерскиот Берлин. Моделот на статуата на Венера од приказната на Проспер Мериме „La Venus d›Ille“ работи како млад роб во „фирма“ која покажува неверојатни паралели со денешниот работен свет. „Анегдотата од последната пруска војна“ (Клајст) е поместена во иднината, каде што последните четири луѓе се борат едни против други. „Повикувањето на големата мечка“ на Ингеборг Бахман е вкрстено со митот за Чулу на Лавкрафт и резултатот е песна што потсетува чудно на Готфрид Бен. „Мутации“ се 7 приказни и 1 песна, секоја базирана на класичен текст, од Црвенкапа до Вирџинија Вулф!

Франсис Кирпс

МУТАЦИИ

Франсис Кирпс (1971) е луксембуршки писател, сценски поет и сатиричар. Студирал психологија и работел, меѓу другото, како училиштен психолог и наставник. Во 2000 и 2001 година бил награден на „Националниот литературен конкурс“. Набргу ѝ се посветил на поетската слем-сцена и во следните години учествувал во над 500 слем и читачки сценски изведби во германското говорно подрачје. Од 2014 година пишува колумни за „Вархајт“, сатиричната страница на германскиот дневен весник „Тац“. Во 2020 година за „Мутации“ ги добил наградите „Servais“ како и Наградата за литература на Европската Унија..

Ксенија Чочкова (родена 1979 година) дипломирала на Катедрата за германски јазик и книжевност на Филолошкиот факултет „Блаже Конески“ во Скопје. Денес живее и работи како книжевен преведувач и менаџер во културата во Баден-Баден, Германија. Досега работела на повеќе изложби, конференции, различни проекти од областа на културата. Со литературен превод се занимава од 2004 година и досега има објавено повеќе од 30 преводи на автори од германското говорно подрачје. Во нејзин превод се објавени автори како Зигфрид Ленц, Бернхард Шлинк, Јулија Франк, Елфриде Јелинек, Бертолт Брехт, Кристоф Хајн, Штефан Цвајг, Елијас Канети, Роберт Валзер, Роберт Музил и други. За своите преводи е наградена со повеќе стипендии како „Средба на преведувачи“, организирана од Литературниот колоквиум Берлин, „Преведувачка резиденција“ на Гетеинститутот и Фондацијата Алфред Тепфер во Гут Зиген.

Историја на пчелите Маја Лунде

Превод од норвешки: Искра Бадева ISBN: 978-608-243-647-0 Наслов на оригиналот: Maja Lunde, Bienes historie Едиција Бранови, 394 книга Број на страници: 368 Димензии: 13×20

НАГРАДА НА НОРВЕШКИТЕ КНИЖАРИ

„Историја на пчелите“ комбинира футуристичка дистопија и историска фикција за да го вклучи алармот во врска со сѐ помалата популација на пчелите. Англија, 1852 година. Вилијам е биолог и трговец со семиња, кој започнува со изградба на нов тип кошница за пчели, која нему и на неговите деца ќе им донесе и слава и чест. САД, 2007 година. Џорџ е пчелар кој залудно се бори против модерното пчеларство, но се надева дека неговиот син ќе биде нивното спасение. Кина, 2098 година. Тао рачно нанесува полен на овошните дрвја затоа што пчелите веќе одамна се исчезнати. Кога по една трагична несреќа властите ќе го одведат нејзиниот син, таа тргнува на опасно патување за да открие што се случило со него. Книгата ги обединува минатото, сегашноста и една застрашувачка иднина во возбудлива приказна која е сложена како саќе. Просветлувачка и одлично опишана врска за моќната поврзаност меѓу децата и родителите како и за нашиот однос кон природата и човештвото. „Историја на пчелите“ на прекрасен начин воведува една исклучително важна тема во светот на литературата – климатската проза, која ни предочува дека ние како човештво сме зависни од добросостојбата на пчелите и на другите инсекти. Сѐ додека тие се во опасност, и ние сме во опасност.

Маја Лунде

ИСТОРИЈА НА ПЧЕЛИТЕ

Маја Лунде (1975) е норвешка писателка и сценаристка. Има напишано десет книги за деца и млади. Авторка е на сценарија за норвешката телевизија, претежно за популарни детски серии. Своето книжевно деби го имала во 2012 година со трилер чие дејство се одвива во 1942 година. Во 2015 ја има добиено наградата на норвешките книжари за „Историја на пчелите“, која е и првиот роман во нејзината серија за луѓето и климатските промени. Живее во Осло со сопругот и трите деца.

Искра Бадева е родена во Скопје во 1980 година. Како вљубеник во културата и литературата на Северот, ги има завршено студиите по скандинавистика на Софискиот универзитет во 2007 година. Живее и работи во Скопје. Преку своите преводи се надева дека ќе ја разбуди љубопитноста на македонските читатели кон историјата, секојдневјето и начинот на размислување на северните народи. Интензивно работи на преводи на романи и детска литература од норвешки, шведски, дански и фински јазик. Добитник е на наградата „Златно перо“ за 2011 година која ја доделува Здружението на литературни преведувачи на Македонија. Има преведено повеќе од педесет дела на актуелни скандинавски автори, меѓу кои се Сара Омар, Мерта Тиканен, Ерленд Лу, Туве Јансон, Пер Петешон, Марија Пар, Ју Несбе, Маури Кунас, Лиса Аисато, Геир Гуликсен, Катри Липсон, Томас Енгер, Ида Хојер, Рој Јакобсен и други, како и избор драми од Хенрик Ибзен.

Другарче Питер Колвајк; илустрации Линде Фас

Превод од холандски: Ели Пујовска ISBN: 978-608-243-591-6 Наслов на оригиналот: Pieter Koolwijk, Linde Faas, Gozert Едиција Синчец, 27 книга Број на страници: 256 Димензии: 14×21

НАГРАДА GOUDEN GRIFFEL ЗА НАЈДОБРА КНИГА ЗА ДЕЦА ВО ХОЛАНДИЈА ЗА 2021 Г.

Тичен е главниот протагонист во оваа оригинална книга и тој мисли дека е сосем нормално да има невидливо пријателче кое ќе биде постојано со него. А неговото име е – Другарче. „Другарче“ е приказна која уште од самиот почеток маѓепсува со фантастичните авантури на Тичен и неговото пријателче. Одат во лов на тролови, се обидуваат да победат чудовишта, да изгаснат пожари... и секогаш се наоѓаат во неволја поради тоа. Особено Тичен, откако ќе му посочат дека Другарче постои само во неговата фантазија. Бидејќи Другарче не може ниту да го види ниту да го слушне никој освен Тичен, неговите родители, а особено неговата мајка, се загрижени. И иако таткото претставува еден вид хумористичен фактор во приказната, тие заедно носат драстична одлука: Другарче мора да исчезне од животот на нивниот син. Во својот млад херој, Колвајк вградува неизмерна самодоверба благодарејќи на виртуелното пријателче. Но сега почнува да го демне опасноста од исчезнувањето на Другарче и светот на неверојатните авантури. Сè додека приказната не добие изненадувачки пресврт во кој ќе се покаже дека работите не се баш такви какви што се чинеле... Книгата е прекрасна животна лекција за млади и за возрасни читатели!

Питер Колвајк / Линде Фас

ДРУГАРЧЕ

Питер Колвајк (1974) пораснал во Јужна Холандија, но веќе некое време живее во провинцијата Дренте. Тој смета дека секој треба да ја користи својата имагинација. Но доколку не може, тогаш може да ја користи фантазијата. На крајот на краиштата, тоа е и причината поради која ги пишува своите книги – и затоа што за некои теми може повеќе да се размислува. На пример, за тоа што е лудо? Или чудно? Својот пробив во светот на книгите за деца го направил со книгите за Вло и Стикел кои се читаат во седум држави, а неговата книга „Другарче“ е наградена со Златно перо во 2021 година. Линде Фас досега има илустрирано пет книги на Колвајк, а резултатот е фантастичен! Линде е холандска уметница која моментно живее и работи во северниот дел на Норвешка. Има завршено студии за анимација на Академијата за уметност „Сент Јуст“ во Бреда, Холандија. Дипломирала како почесен студент во 2008 година со анимираниот филм „Според птиците“, кој бил избран на бројни меѓународни филмски фестивали за анимација и освоил неколку награди ширум светот. По дипломирањето почнала да работи како аниматор, ликовен уметник и илустратор на детски книги. Соработувала со голем број автори и илустрирала книги на Питер Колвајк, Грит оп де Бек, Пол Бигел, Тонке Драхт и Риндерт Кромхоут. Во 2018 година ја објавила својата прва сликовница „Ајде да патуваме“. Следната година ја објавила втората сликовница „Детето и китот“ која е преведена на повеќе од десет јазици, а нејзината трета сликовница „Каде е големиот брат“ во 2022 година, била наградена со Бронзено перо. Ели Пујовска (1971) е родена во Скопје и досега има преведено педесет книги од бројни холандски и белгиски автори, меѓу кои и „Розата и вепарот“ од Ане Провоуст, која е наградена со Златно перо за најдобар книжевен превод на годината. По дипломирањето на Универзитетот во Ајндховен на катедрата за холандски јазик почнала да работи како професионален преведувач кој повеќе од една деценија посветено ги збогатува македонските библиотеки со класични и современи книжевни дела од холандската литература и ја поттикнува соработката помеѓу македонските издавачи и холандската фондација за литература. Била член на комисијата за Наградата за најдобар млад преведувач „Вавилон“ (2018). Моментно живее и работи во Скопје.

Чекорите до црешовото дрво Паола Перети

Превод од италијански: Искра Димковска ISBN: 978-608-243-627-2 Наслов на оригиналот: Paola Peretti, La distanza tra me e il ciliegio Едиција Бранови, 381 книга Број на страници: 192 Димензии: 13×20

НЕЖНА И МОЌНА ПРИКАЗНА ЗА ДЕТСТВОТО, ХРАБРОСТА, ЉУБОВТА И ЗА ЖИВОТОТ

Деветгодишната Мафалда носи очила со жолти рамки, има мачор по име Отимо Туркарет, другарка-Амазонка и најдобар другар по име Филип. Но таа е исправена пред чуден предизвик. Ѝ откриле Старгартова болест која предизвикува постепено губење на видот и слепило. Во дневникот започнува да ги запишува сите нешта што нема да може да ги прави – да ги брои ѕвездите на небото, да игра фудбал со машките, да се качува на црешовото дрво во училишниот двор. Ама, набрзо дознава дека постои и поинаков начин на гледање. Со чекорите го мери растојанието до црешовото дрво... во правец на опојниот мирис... и започнува нов список: со нештата што сѐ уште ќе може да ги прави. Во мракот што ја опфаќа, Мафалда, исто како и Малиот Принц, учи светот да го набљудува со срцето, а не со очите. Горчината што ја чувствува читателот само се засилува со сознанието дека и авторката на романот страда од истата болест

Паола Перети

ЧЕКОРИТЕ ДО ЦРЕШОВОТО ДРВО

Паола Перети (1986) е италијанска писателка. Студирала книжевност и филозофија. Дипломирала новинарство во 2011 година. Пред петнаесетина години ѝоткриле ретка генетска болест која води кон целосно слепило. „Чекори кон црешовото дрво“ е нејзин прв роман. Живее во областа Верона, каде што предава италијански јазик на децата на имигрантите.

Искра Димковска е родена во 1982 година во Скопје. Во 2006 година дипломира на Филолошкиот факултет „Блаже Конески“,стекнувајќи се со звањето филилог по италијански јазик и литература и германски јазик и литература. Во изминатите години уредник е на издавачката куќа „Сказнувалка“. Од италијански на македонски јазик ги превела „Месечината и огновите“ од Чезаре Павезе (Антолог, 2014), „Жена“ од Сибила Алерамо, (Сигмапрес, 2015), „Прави се сите“ од Паоло Сорентино (Антолог, 2021) и „Доволно е да заврши денов“ од Антонела Латанци (Сигмапрес, 2022). Многу сака сладолед, да вози велосипед и да им чита приказни на Ива и на Леа пред спиење.

Пчелно семејство Ања Мугерли

Превод од словенечки: Давор Стојановски ISBN: 978-608-243-586-2 Наслов на оригиналот: Anja Mugerli, Čebelja družinа Едиција Бранови, 358 книга Број на страници: 144 Димензии: 13×20

НАГРАДА ЗА ЛИТЕРАТУРА НА ЕВРОПСКАТА УНИЈА ЗА 2021 ГОДИНА

„Пчелно семејство“ е збирка од седум раскази. Секој расказ застапува одреден обред или обичај од словенечката традиција, кои во делото на Мугерли се вметнати во поинаков контекст или во современи рамки, така што добиваат нова улога и добиваат нова смисла. Централна тема на секој расказ е семејството: било да е неостварено („Јаболкарка“), обединето и потоа раздвоено („Пламени јазици“) или некое што во нормални услови би можело да стане вистинско („Пчелно семејство“). Сите раскази, освен еден, се случуваат во сегашноста, но поради ритуалите и атмосферата се чинат безвременски. Авторката со јазична виртуозност нè внесува во свет што не го познаваме, иако живееме во него. Читајќи ги расказите, постојано преминуваме некакви граници – јазични, културни, политички, географски, но и оние што се поставени помеѓу реалноста и несвесното. Во 2021 година „Пчелно семејство“ ја добива престижната Награда за литература на Европската Унија.

Ања Мугерли

ПЧЕЛНО СЕМЕЈСТВО

Ања Мугерли (1984) е словенечка писателка. Дипломирала словенистика, а магистрирала креативно пишување. Се занимава со пишување проза и драми и со организирање книжевни настани. Уште со своите први книги добива номинации за највисоките книжевни награди во Словенија. Стилот на пишување ѝ е суптилен, со огромни психолошки анализи на ликовите. Живее во Нова Горица, на границата помеѓу Словенија и Италија.

Давор Стојановски (1987, Скопје): писател, поет, преведувач и музичар. Магистер по македонска книжевност. Работел како копирајтер и уредник. Од словенечки јазик превел неколку дела, меѓу кои: „Мачорот Мури“ од Каетан Кович, „Смоква“ од Горан Војновиќ, „Џојсовиот ученик“ од Драго Јанчар итн. Неговиот втор роман „Собирачи на пепел“ ја освои наградата Роман на годината на „Утрински весник“ за 2016. Третиот роман „Утеха за голите“ беше номиниран за Наградата за книжевност на Европската Унија за 2020. Застапен е во повеќе домашни и странски антологии и книжевни списанија. Поранешен член на бендот Foolish Green. Живее во двојазичната (германскословенечка) област Кернтен/Корошка во Австрија.

Малиот бог на земјотресот Петар Денчев

Превод од бугарски: Душко Крстевски ISBN: 978-608-243-588-6 Наслов на оригиналот: Петар Денчев, Малиот Бог на земјотресот Едиција Бранови, 370 книга Број на страници: 272 Димензии: 13×20

ПРЕКРАСНА ПРИКАЗНА КОЈА ПРОНИКНУВА ВО СКРИЕНИТЕ ОДНОСИ НА ЖИВОТОТ

Книгата започнува како и многу други: со разделба. Една жена го напушта својот маж без некоја посебна причина. Го прави тоа старомодно, со белешка напишана на рака. Тој не изгледа изненаден, дури на почетокот воздивнува со олеснување дека не ѝ се случило ништо лошо. Така навлегуваме во светот на еден нереализиран филозоф кој е сопственик на цвеќарница. Во обид да ја открие мистеријата на исчезнувањето на неговата сопруга, презема трауматично патување во минатото – во својот гардеробер, среде руините на татковата куќа, по софиските улици, на брегот на Дунав, среде чаршијата во Скопје. Преживувајќи го распаѓањето на љубовната врска, за да преживее по трагите на изгубеното, тој се става себеси на влезовите и излезите на сегашноста. Дали оваа интензивна потрага е во состојба да го надмине чувството за живот составено од страв и недостиг? Возможно ли е еден личен Бог да го стабилизира свлечиштето на животот за да го забави напредувањето на лудоста, која ги претвора луѓето во машини?

Петар Денчев

МАЛИОТ БОГ НА ЗЕМЈОТРЕСОТ

Петар Денчев (1986) е бугарски писател и театарски режисер. Дипломирал театарска режија и поставил претстави во најголемите театри во Бугарија. Книжевното деби го прави со раскази и поезија кои веднаш се наградени или номинирани на разни конкурси. Автор е на книги поезија, раскази и романи. Има објавувано во речиси сите бугарски весници и списанија како и во американското „The Litter Box Magazine“ и на хрватскиот сајт „Критична маса“. Преведен е на неколку јазици.

Душко Крстевски е роден на 22 мај 1981 година во Скопје, каде што се школува и моментално работи. Дипломира на Катедрата за македонска книжевност и јужнословенски книжевности на Филолошкиот факултет „Блаже Конески“ при скопскиот универзитет „Св. Кирил и Методиј“, каде што моментално е магистранд по македонска литература. Застапуван е во неколку антологии на македонската млада поезија. Преведува од бугарски јазик, како за домашната културна сцена така и во рамките на интернационалниот проект „Across Europe“. Исто така, преведува и од хрватски и од српски јазик. Моментално работи како професор по македонски јазик и литература во Меѓународните училишта НОВА во Скопје.

Воините на загубената плима Кетрин Дојл Превод од англиски: Владимир Јанковски ISBN: 978-608-243-646-3 Наслов на оригиналот: Catherine Doyle, The Lost Tide Warriors (Storm Keeper, #2)

Едиција Нови планети, 21 книга Број на страници: 224 Димензии: 13×20

„МАГИЧНА КНИГА НА МНОГУ НАЧИНИ.“ ЕОН КОЛФЕР

Фион Бојл е Чувар на бурата на Аранмор помалку од шест месеци кога илјадници застрашувачки Ловци на души пристигнуваат на островот. Следбениците на лошата волшебничка Мориган се дојдени за да ја воскреснат нивната водачка, а Фион нема моќ да ги запре. Магијата на Чуварот на бурата го има напуштено, а бидејќи сеќавањето на дедо му се намалува, Фион мора да се потпре на своите пријатели Шелби и Сем во повикувањето на војската од сирени. Но, никој друг не верува дека страшните морски суштества воопшто постојат. А како тој може да докаже дека е во право кога ја нема сопствената магија? Додека Фион ја почнува потрагата по загубената војска, другите островјани се подготвуваат за инвазијата на Ловците на души. Борбата за спас на Аранмор тукушто почна.

Кетрин Дојл

ВОИНИТЕ НА ЗАГУБЕНАТА ПЛИМА

Кетрин Дојл израснала покрај Атлантскиот Океан во западна Ирска. Нејзината љубов кон читањето почнала со големите ирски митови и легенди, кои ѝ ја поттикнале амбицијата еден ден и таа да напише книга во која ќе биде искористено нивното богатство. Дипломирала психологија, а магистрирала издаваштво на Националниот универзитет на Ирска. Инспирацијата за серијалот „Островот на Чуварот на бурата“ ја пронаоѓа во домот на нејзините предци на островот Аранмор, каде што пораснале нејзините баба и дедо. Кетрин Дојл живее во Голвеј, но често престојува во Лондон и во САД.

Владимир Јанковски (1977) е прозаист и преведувач. Дипломирал на Катедрата за општа и компаративна книжевност на Филолошкиот факултет „Блаже Конески“ во Скопје. Работел како уредник во неколку издавачки куќи. Објавил три романи, две книги со фотоесеи (во соработка во фотографот Иван Блажев) и две книги разговори со Влада Урошевиќ. За романот „Скриени желби, немирни патувања“ ја добил наградата „Роман на годината“, а за „Невидливи љубови“ наградата „Рациново признание“. Во 2022 година од Македонската асоцијација на издавачи ја добива наградата „Автор на годината“. На македонски јазик превел книги од Маргарет Атвуд, Дубравка Угрешиќ, Горан Трибусон, Чарлс Буковски, Зоран Фериќ, Ден Роудс, Милош Црњански, Филип К. Дик, Кетрин Дојл и други.

Залудно бегство Сигрун Паулсдотир

Превод од исландски: Мери Кицовска ISBN: 978-608-243-665-4 Наслов на оригиналот: Sigrún Pálsdóttir, Delluferðin Едиција Бранови, 376 книга Број на страници: 180 Димензии: 13×20

НАГРАДА ЗА ЛИТЕРАТУРА НА ЕВРОПСКАТА УНИЈА ЗА 2021 ГОДИНА

Како старото злато да го претворите во бесценето богатство? На крајот од XX век, Сигурлина се наоѓа во безизлезна ситуација. Пораснала без мајка, покрај татко ексцентрик кој очекува неговата ќерка да го помине животот помагајќи му при каталошката обработка на исландските археолошки артефакти. Но Сигурлина копнее за образование и возбуда, така што ја зема судбината во свои раце. Еден ден одеднаш исчезнува од Рејкјавик со историска реликвија од збирката на татко ѝ. Преку низа неверојатни настани, артефактот е откриен во музејот „Метрополитен“ во Њујорк. Во меѓувреме, исландската полиција започнува истрага за кражбата. „Залудно бегство“ е опишан како модерна пикарска приказна за зачувувањето на културното богатство. Романот пружа интригантен поглед на тоа како нештата го стекнуваат своето место во историјата и плете интересна приказна за човечките судбини врз кои почива таа историја. За овој роман, Паулсдотир ја добива и престижната Награда за литература на Европската Унија за 2021 година.

Сигрун Паулсдотир

ЗАЛУДНО БЕГСТВО

Сигрун Паулсдотир (1967) е исландска писателка и историчарка. Со докторско звање се здобива на Универзитетот во Оксфорд (2001). Подоцна и самата предава на факултет, а од 2009 до 2016 година го уредува списанието за исландска историја „Сага“. Од 2007 година е самостоен уметникписател, освојувајќи го вниманието на читателите со историски биографии. Добитничка е на неколку награди и признанија, меѓу кои и наградата за најдобра биографска проза за 2013 година.

Мери Кицовска (Скопје, 1977) е преведувач и толкувач по англиски и исландски јазик. Во периодот од 2001 до 2009 година, живее и работи во Рејкјавик, Исланд, каде што, покрај другото, го изучува и го усовршува исландскиот јазик. Од англиски на македонски и обратно има преведено голем број текстови и дела. Од исландски на македонски досега има преведено десетина книги.

Книга Жозе Луиш Пејшото

Превод од португалски: Ненад Трповски ISBN: 978-608-243-648-7 Наслов на оригиналот: José Luís Peixoto, Livro Едиција Бранови, 415 книга Број на страници: 240 Димензии: 13×20

НАГРАДА „САЛЕРНО“ – КНИГА НА ЕВРОПА ЗА 2013 ГОДИНА

Една мајка му дава книга на своето дете и му вели дека набргу ќе се врати. Таа никогаш не се враќа. Илидио ќе порасне во внатрешноста на Португалија и ќе се вљуби во прекрасната Аделајд. Но парот се разделува. Девојката ќе замине во Франција и со себе понесува само една книга што ја добива на подарок – истата онаа што ќе му ја остави мајката на Илидио пред многу години. Аделајд ќе се омажи и тоа повторно со посредство на книгата, но нејзиниот маж е позаинтересиран за политиката отколку за сопругата. Илидио се решава да отпатува во потрага по својата поранешна девојка, оставајќи го Жозуе, човекот што го израснал. „Книга“ е летопис за руралниот егзодус во кој над милион португалски емигранти трагаат по својата среќа во периодот меѓу 1960 и 1974 година. Низ очите на ликовите сведочиме за суровата реалност на емигрантскиот живот, но и за истрајната надеж за враќањето. Писма што не стигнуваат, неуспешни потраги, комплицирани љубови и горчлив-сладок копнеж го исполнуваат овој романтичен роман, во кој болката се претвора во услов на постоењето.

Жозе Луиш Пејшото

КНИГА

Жозе Луиш Пејшото (1974) е португалски прозаист, поет и драматург. Роден е во мало гратче во областа Алентежо. Студирал современи јазици и книжевност на Универзитетот „Нова“ во Лисабон. По студиите бил учител во Португалија и на Зелен ’Рт. Од 2001 година професионално се занимава со пишување. Има објавено тринаесет книги проза, четири збирки поезија, два патописи и две книги за деца. Неговите дела се преведени на повеќе од триесет јазици. Тој е најмладиот добитник на наградата „Сарамаго“. За книгата „Книга“ му е доделена наградата „Салерно“ – книга на Европа за 2013 година.

Ненад Трповски e книжевен преведувач. Дипломирал на Филолошкиот факултет „Блаже Конески“ во Скопје, на катедрите за италијански и португалски јазик и книжевност во 2009 година. Во периодот помеѓу 2011 и 2013 година живеел и работел во Лисабон, Португалија. Како стипендист на португалскиот институт „Камоиш“ завршил и напреден степен по португалски јазик и книжевност на Универзитетот во Лисабон. За „Антолог“ ги превел книгите „Сочувство“ од Дулсе Марија Кардозо, „Девет ноќи“ од Бернардо Карваљо, „Просечен индекс на среќата“ од Давид Машадо и „Сенки“ од Томазо Ландолфи.

MADE IN EUROPE The power of diversity

Книжевен центар „Антолог“ ул. „Ѓорѓи Пулевски“ бр. 29 лок. 1 1000 Скопје, Република Северна Македонија +389 2 3201 007 / contact@antolog.mk Facebook http://www.facebook.com/antolog Twitter @Antolog_Books / Instagram antolog_books

MADE IN EUROPE / СОЗДАДЕНО ВО ЕВРОПА Одговорот што овој проект треба да го даде е во насока на силна национална и интернациона промоција и циркулација на гласовите и вредностите на книжевна Европа. Седумнаесетте книги од проектот се идеални репрезенти на моќта на разноликоста што владее на нашиот континент со посебен акцент на малите јазици, отворајќи тематски сложени прашања: инклузивност, глобално затоплување, меѓусебно разбирање, правична застапеност на жените, еднаквост, преосмислување на личниот и колективниот идентитет, соочување со загубата, активизам и храброст да се биде различен.

www.antolog.mk

Европската литература е литература со исклучителни дела вредни за запознавање. Затоа, кога ќе се каже „Оваа книга е Создадена во Европа“ тоа нè прави сигурни дека во раце држиме литература која ја носи непомирливата моќ на привлечноста и на различноста.