BANKIERI: Cili do të jetë tipari dallues i ABI-t në këtë treg? Ne synojmë të jemi më të gatshëm dhe më të shpejtë në plotësimin e kërkesave të klientëve, që nuk janë interesante për bankat e mëdha, si dhe dhënien e disa shërbimeve shtesë, që nuk jepen për momentin në tregun bankar në Shqipëri. Ne do risjellim sigurinë, optimizmin, ritmin, kujdesin dhe respektin ndaj klientit, që janë të lidhura ngushtë me të qenit “Amerikan”. BANKIERI: Pse Shqipëria është një treg tërheqës për fondin privat të kapitalit NCH? Shqipëria ka qenë qendra e NCH-së për Ballkanin Perëndimor dhe Greqinë që prej 2008-ës, pasi Shqipëria është një vend me mundësitë më interesante investuese në rajon. Mbetet shumë domethënës dhe mbresëlënës fakti se si ekonomia shqiptare ka përparuar, pavarësisht nga demografia e vogël dhe izolimi historik ekonomik. Shqiptarët janë kombi më optimist për të ardhmen dhe me më pak pretendime. Ky është një avantazh konkurrues shumë i rëndësishëm dhe që shpesh nënvlerësohet. Shumë nga tiparet e tregjeve më të përparuar të punës (p.sh. Nju Jorku), ne i shohim në Shqipëri. Ekspozimi rajonal dhe global i profesionistëve të lartë dhe të mesëm sjell një përmirësim të përhershëm të cilësisë së ecurisë, që vazhdon të rritet më shpejt se niveli i pretendimeve. Siç e përmenda dhe më parë, rritja ekonomike në 2016-ën do të jetë afërsisht 4%. Gjatë 2015-ës ne kishim një rritje të kënaqshme ekonomike në Shqipëri. Shitja shumë e suksesshme e Eurobond-it në 2015-ën është një tregues i lartë besimi i tregjeve të huaja për ekonominë shqiptare. Reformat kundër informalitetit dhe fokusi në sektorët e rëndësishëm të ekonomisë do kenë ndikim pozitiv afatgjatë për sistemin bankar dhe ekonominë shqiptare në tërësi. Shqipëria vazhdon të mbetet treg interesant dhe në zhvillim, me objektiva të qarta drejt hyrjes në Bashkimin Europian.
Guvernatori i Bankës së Shqipërisë Z.Gent Sejko dorëzon zyrtarisht liçencën për Bankën Amerikane të Investimeve Në një ceremoni të organizuar në mjediset e Galerisë Kombëtare të Arteve në datë 4 dhjetor 2015, Z. Gent Sejko, Guvernator i Bankës së Shqipërisë, i dorëzoi liçencën për ushtrimin e veprimtarisë bankare Z. Lorenzo Roncari, Kryetar i Bordit të Bankës dhe Z. Andi Ballta, Drejtor i Përgjithshëm Ekzekutiv i Bankës Amerikane të Investimeve, ne vijim miratimit të blerjes së Bankës Crédit Agricole në muajin tetor 2015. Këtë ceremoni e nderuan me pjesëmarrjen e tyre: Z. Edi Rama, Kryeministër i Shqipërisë; Z. Donald Lu, Ambasador i SHBA-së në Shqipëri; Z. Gregory Katz, përfaqësues i lartë i investuesve amerikanë të NCH Capital Inc.; Z. Rezzo Schlauch; Z. Mark Crawford dhe anëtarë të tjerë të Bordit të Bankës. Gjatë fjalës së tij, Kryeministri i Shqipërisë, Z. Edi Rama u shpreh: “Ky investim do të jetë një nxitës i fortë i kreditimit dhe e kthen bankën e sapoliçensuar në një shembull tërheqës për investuesit, që do të nxisë pastaj të tjerët të ndjekin të njëjtën rrugë”. Ndërkohë, Z. Andi Ballta, Drejtor Ekzekutiv i Bankës Amerikane të Investimeve, nënvizoi se Banka Amerikane e Investimeve synon të kthehet në një faktor të rëndësishëm në tregun bankar shqiptar, me produkte e shërbime konkurruese dhe novatore për klientët.
www.aab.al
Bankieri
13