Column

BOTTER, KAES EN EIERE

’t Liek net “Botter, Kaes en Eiere”, maor ’t is ’t niet. Azzie now in 't bos loop, zie-j op vol beum 'n kruuske of 'n rundje staon. De beum met zo'n teke kriege 'n kruus nao en worre binne niet al te lange tied umgezaag. Wi-j könne dan deur de bome ut bos weer zien. Maor ik heb geheurd dat heel lang geleie 'n stuk van 't bos deur Stökkumse blage is gepoat. Frank Polman liet wette dat hij 'n jaor of vief, zes was, toenne as kleine grote keal met moch helpe. Minister Carola Schouten wis dit denk ik ook, want ze dut ’t nao. Iedere brave bössel op de laegere school geet straks helpen bi-j de uutbreiding van de bosse. Eur bossestrategie is dat alle kindere van de laegere school eiges ‘n boom gaon poate.

Botter kaes en eiere. Veur wie 't nie meer wet; gi-j vang aan met nege leage vakke. ’t Kan op papier maor ik tekende ’t met ’n stok in ’t zand. De ene spôller zet 'n kruus en de andere un rundje. Degene den drie van zien eige tekes op een ri-j het, of reg of schuuns, en niet stechelde, den had gewonne. Ik vond ‘t eiges ’n flauw spel. ’t Sloeg nörges op. Oaver slaon gesproake…

Niet afgeslage Op coronacarnavalszondag wier deur de Leertrekkers 'n rondgang gemaak deur de versierde straote en neave de versierde huus. Ook aan Plaggeveld en De Sprung zatte ze vol verwachting in 't carnavalspekske op de hoogheid te wachte. 't Wier later en later. De buurt hiet niet veur niks Engelegeduld. Onze met zörg gekweekte coronakilo's smolte as sneeuw veur de zon, want later blek dat de ganse buurt zelfs had könne wachte tot ze 'n ons woag. De prins was van slag en kwam nie. Hij is wel naeve de straote opgereeje, maor vergeate af te slaon naor Plaggeveld en De Sprung. Wi-j heurde later dat ze twee keer aover van beie kante, hen en weer, toetend veurbi-j zun gereeje. Dat kan ook niet anders, anders ko-j allebei straote jao niet links laote ligge. Now is de plank efkes misgeslage. ’t Kump goed. De volgende keer doen wi-j weer op zien Stökkums gemuutelek same prooste. Blief gezond allemaol. Tot de volgende Hent.