COLUMN
DEUR “KRÖPPELE” HENT VAN DE SCHIELEKE DRAEJ Jao, Hent het toch de heup gebroake. Dat is mien wat. Minstes zes weak gin autori-je en daor ging mien eige risico ! Ik heurde vertelle dat ’t allemaol deurgestoake kaart was. ’t Was ook in de vakantietied en ze konne anders de Zandhaas niet vol kriege. Ik zol vanweage mien column in de Zandhaas de heup hemme gebroake. Maor van dat letste is niks van aan. In ’t ziekenhuus vertelden ze mien namelek dat ik gin columnbreuk had, maor ’n collumfractuur. Ongeloage waor. Ze zeie dat ik met de ziekewage naor ’t ziekenhuus wier gebrach. Mooi niet. De buurmanne Derk en Rob droege mien naor de auto en deur Hermien wier ik naor ’t Slingeland gereje. Wel in ’n Meriva. Dat is gin ziekewage, maor ’t is algemeen bekend dat den auto standaard ’n ingebouwde invalidekaat het. ’t Lek of ik veur de sosjale kontakte bi-j Slingeland aankwam. Diana te Pas (van Teun, Joep en Edwin) sluute mien op ’n bult dreud aan en de röntgenfoto wier gemaak deur Karl Lusink. Karl het de eigeste hobbie as ik en veur dat hij knipste, hemme wi-j eers ’n hot gekuierd oaver olde vliegtuuge. Minse, ik bedank ollie veur de volle reaksies die ik heb gekregge. Op vol kaarte die in de bus lage, stond ook de rede van mien kröppeligheid: “Hij zal de draej wel te schielek hemme genoame”. Och, ja. Dit was ’t dan weer. Um ollie ’t allerbeste te wense, zegge ze oaver de geut “Hals und Beinbruch”, maor laot ik dat now maor niet doen. Dalek vult ’t verkeerd. Laot ’t ollie goed gaon. Pas goed op ow eiges, maor kiek ook um ow hen. Ollie Hent
augustus 2020 | De Zandhaas
33
