Weni nüm gnüege oder ma

gits geng no e guete Plan

Vor churzem hani bi Fründe dörfe ihri Boustell bewundere. Es het e alti Wasserleitig putzt. So töif ir Ärde vergrabe het niemer chönne gseh, wie die Leitig zwäg isch. Sie het geng tröi ihre Dienst ta.

Was passiert, we mir dLeischtig nüm chöi oder möge bringe? Wärde mir, wie die Wasserleitig «usgrabe» u dür bessers u zytgemässes Material ersetzt? Oder merke mirs sälber u gö früehzytig? Es schiint klar, dass mängisch öpis oder öper Nöis brucht. Niemer zwieflet das a. Wenn isch also der richtig Zytpunkt?

I gloube, dass mir bestimmt si, i jedem Momänt vo üsem Läbe i däm zloufe, wo üse Schöpfer für üs parat het. Alli hei Gabe u Begabige. Das mir älter wärde u nüm gliich chöi Leischte wie die Wasserleitig, das isch normal. U das nid jede gliich viel cha u wott ou. Gott het für jedi Zyt vo üsem Läbe gueti Plän. Mir dörfe derna frage u wärde Antwort übercho. Es brucht chlei Courage, ja. U vielech möge anderi dänke, jetz spinnts üs. I ha lieber das, als das ig im Falsche loufe oder bi u drin versuure. Schliesslech weiss nur üse Schöpfer, was für üs das isch, wo nis zum «flüüge» u Friede bringt. Ganz egal, was isch gsi u wie alt mir si. Im Fall vo mine Fründe chame z Rohr, wo jahrzähnte sir Bestimmig isch nache cho, als Zytzüge u wunderschöni

Deko bruche. Der Roscht het es schöns Härzli dri gwürkt. E Züge für nes sinnvolls Läbe – ou wes im Verborgene het stattgfunde. So gseh isch jetzt der richtig Zytpunkt, zum drüber nachezdänke. U wär si Platz no nid het gfunde oder nüm cha u ma usfülle: Viel Spass u Muet bim Entdecke, was no parat isch!

Daniela Francioli-von Allmen

daniela.francioli@pfimi-interlaken.ch www.pfimi-interlaken.ch