Pfimi Interlaken

Vo Gummistifel u Sideschue

U warum ds Schuewärch nid so wichtig isch

Ame wunderschöne Sunntigmorge geits ufd Reis. Rosaroti Sideschue ade Füess. Für dArbeit, wo asteit, genau richtig. U da si Fälder u Wiese, Chüeh wärde triebe. Alli trage Gummistifel, genau richtig fürd Arbeit wo sie tüe. So isch jedes uf sim Wäg, parat für dUseforderig u dAforderig vom Tag.

Aber spiele dSchue, wo mir alegge, würklech sone grossi Rolle? Schue chleide üsi Füess. Im beschte Fall schütze si üsers Loufwärch. Mir alli wüsse: Barfuess geit o. Ömel vo Früehlig bis Herbscht. U de gits ou Schue, wo üs nid guet tüe. Wo drücke u ripse, ke guete Halt gä.

Was mir für Schue trage, das liggt i üser Entscheidig. Es faht scho bim Choufe a. Uf was luege mir? Was isch wichtig? Schön u günschtig oder doch lieber chlei türer u praktisch? Wär wett nid e Schue, wo schön, wärtig, praktisch, komfortabel u günschtig isch? Eine, wo sich afüehlt wie barfuess loufe u doch super guet schützt.

Was üs fürs Umeloufe beschäftigt, chönnt üs doch ou fürd Seel wichtig si. Was, we mir üs afö frage, wies üser Seel geit? Masi no? Isch si guet gschützt vor de Stürm vom Läbe? Isch si im Iklang mit däm, wo um üs ume louft, wo mir drinne stöh? Oder hinkt üsi Seel hinde nache, isch voll Schwiele, Druckstelle u müed?

Jesus Christus het e unermässlech grosse Pris zahlt für üsi «Seeleschue». Drum si sie jetz für üs gratis. Es eifachs Ja, i will, längt. I will ab hüt nüm loufe, wies mi guet dünkt. I lade di Gott i, chum i mis Läbe. Mini Füess u mini Seel si müed vom sälber loufe u mache. Schänk di Heilig Geist, wo mir hilft, der Wäg guet u richtig zga. Wo Schutz u Balsam isch für Liib u Seel. Wo mi zu ächtem Läbe erweckt. Wo mi mit Liebi erfüllt, dasi mi gliebt weis u anderi cha liebe. Wo mi mit Fröid erfüllt, dasi i allne Umständ cha dankbar si. Wo mir hilft zvertroue, ou wes dUmständ schwierig mache.

Wili afa gloube u verstah, dass mini Heimat nid hie uf Ärde isch, sondern ir Ewigkeit bim himmlische Vater. Mim Schöpfer. Wo jede Momänt weis, wasi bruche. Egal ob ig i Gummistifel oder Sideschue underwägs bi.

Daniela Francioli-von Allmen

www.pfimi-interlaken.ch