Pfimi Interlaken

We der Druck stigt

Vor Wahl, Dampf abzlah oder d Schlöise zöffne

Das isch albe e Sach gsi früener, we sie mitem Dampfchochtopf hei Gschwellti gmacht. Voll Ehrfurcht hesch ds Ventil beobachtet u gwüsst: Jetz geits de grad los. Will üs Chind das als gfährliche Momänt isch beschriebe worde, simer verstobe, churz bevors so wyt isch gsi. Nur Profis hei das dörfe mache mit däm Druck u Dampf. Es erinneret a die, wo zwar ke Chochtopf si, aber regelmässig Dampf ablöh. Wo Verletzige aller Art bewürke bi dene, wo grad ir Nechi si.

U da gits die wo läbe als gäbs kes Morn. Sie riskiere viel. Sie erläbe viel. Sie wei zLäbe gspühre, eifach nume glücklech si u kenne fasch kener Gränze. Da warte blaui Mose u nid sälte ugueti Abhängigkeite.

De gits Mönsche, die läbe mit offne Schlöise. Da fliesst Läbe, Chraft, Fröid, Rueh. Da füehlsch di agno, egal wied bisch. Egal, wie chlii dene Lüt ihre Radius wird im Läbe, si flippe nid us. Sie möge as Bett bunde si, anes Zimmer oder a was ou immer. Das macht ihne schiinbar nüt us. Da gits geng no es Wort vor Ermuetigung, es Lob, es Zwinkere bim Jammere.

Ihri Läbesart schiint unfassbar. Chas si, dass die es Gheimnis kenne? Dass sie ihri Schlöise chöi offe ha u Guets la fliesse zu andere, will sie sälber are guete Quelle agschlosse sie? U was mache die mitem Druck?

Agfange het alles mit eim, wo sich entschiede het, d Schlöise vom Himmel ufztue statt Dampf abzlah bi allem Schlimme, wo uf der Ärde gscheht. Für di u mi. Er het idrücklech zeigt, wases heisst, nur einisch zläbe u zBeschte drus zmache. Wo Dampf abzlah u wo nid. Er het zeigt, was ächts Läbe u wahri Liebi isch. Sich zverschänke a si Schöpfer u a anderi mit allne Gabe u Talänt. Egal, wie d Umständ si. Geduldig u fründlech, ohni z plöffe u uf anderi abe zluege. Der Astand nid zverletze u nid der eiget Vorteil sueche. Sich nid la reize u nüt nachetrage. Ke Fröid ha a Unrächt u sech fröie, we d Wahrheit sieget. Er nimmt alles uf sich u verliert der Gloube ud Hoffnig nie. We mir so gliebt wärde, chönne mir üsi Schlöise offe ha im Wüsse a üsi Quelle und dass für alli gnueg het. Für immer.

Daniela Francioli – von Allmen

www.pfimi-interlaken.ch