Yuhom ni Julie

ni Sijey

Nagalakat siya sa merkado nga basa sang ulan, bitbit ang utan, isda, kag manok nga iya ginbakal. Bag-o lang nag-untat ang ulan, pero nagatagaktak na sang tulo ang iya nga balhas. "Inday, bakli danay si tiyay sang utan pang-pancit ay," hambal sa iya sang babahi nga daw gin patigulang sang kabudlay sang pangabuhi.

Sa pagkabati sa tigulang nga babahi, iya nadumduman ang iya nga iloy. Nagbakal siya sang utan kag amo ang iya gindala pauli para panyaga.

Samtang nagalakat siya papuli sa iya puluy-an, gintawag siya sang iya tupad balay. "Julie! Si nanay mo nangihi naman sa iya short kagina," siling ni Gigi, ang iya chismosa nga tupad balay.

Nagbalikid siya kag sa pagkabati sini, gindasig niya ang iya paglakat kag tungod sa pagdali-dali, nasugata niya ang iya amiga. "Abaw 'day, mayo lang kay lawig ang imo pasensya kay tiyay, no? Kung ako na, ihatag ko nalang na sa home for the aged kapin pagid nga sako ka nga daan sa imo obra," istorya niya.

Nagyuhom lang siya kag naglakat. Pag-abot niya sa ila puluy-an, ginsalubong siya sang iya nga iloy nga gutom kag basa ang short. Nagginhawa siya sang madalom kag gingbutang sa lamisa ang iya mga dala. Ginkwa niya ang isa kabilog nga margoso kag ginhampak sa tigulang. "Gutom ka? Ara, kan-a! Abi mo daw indi ko kapoy sang panindahan nga mangayo ka lang pagkaon sa akon?" singgit ni Julie sa iya iloy nga nagaduko nalang kag ginapilit trapuhan ang iya short sang iya mga palad. "Kapoy ko ya, Ma! Kakapoy manindahan nga gainulan tapos ma-demand ka lang sa akon panyaga?" "Ano? Basa ka nanaman sang ihi? Ano ka bata? Hoy, bugtaw!" "Sigiha pagid bala ihi-ihi kag pangsabad sa akon, kay ipadala ta gid ka sa home for the aged!"

Padayon lang siya sang pagsinggit sa iya iloy, asta nga gulpi lang may nanawag sa sagwa sang ila kudal. "Julie? Okay lang kamo da 'day?" pamangkot sang babahi nga tingog.

Dali-dali siya naggwa kag gin atubang ang piyak balay, suksok ang iya mabuot kag init nga yuhom.

Wabi-sabi by Shanly Yanna Granada