puisi-puisi i ketut sandiyasa

Pangawit Pamuput

Indayang kayunin napi nika pangawit Indayang kayunin napi nika pamuput Pangawit pacang dados pamuput Pamuput pacang dados pangawit Pangawit malalung Pamuput malalung Pangawit sunia Pamuput sunia Sami lina

Tuwah jiwa sané nitya Masaput rna lan karma Nyuti rupa lan raga Dados pangawit pacang muput Ngantos puput pacang ngawitin

Sembah lan Lampah

Sembah tan palampah Diastun katah

Tuwah sakadi latah

Lampah tan pasembah Kiranging sukma ring manah Patuté sembah mapairing lampah Patuté lampah madasar sembah Lampah tan pacorah Lampah tan tawah Sembah ring manah Mapuara darma lampah Sadurung tan wénten galah Lan mantuk ka sang maduwé galah

Kaketék Langit

Surya tan padusta Surya tan paamrih Surya tan paala Candra tan pakrodha Candra semara duta

Téja nitya cahya Sang bayu tan pakantu, laksana bala Sang bayu, candra lan surya Sami sampun kaketék langit Sami sampun maprabawa

Luas ka Segara

Sampunké uning Pacang kija pada meaning-ening Sampunké uning Pacang luas kija Maideran tan panitya Sami pacang luas ka segara Tan pasandang angen ring brana Patut éling ring sang jiwa Boya ja brana Boya ja tanah linggah Nanging sembah lampah Pinaka kanti saking alas wayah Pacang luas ka segara sané linggah

Gul-gul Suung

Bunga saja nyeléd Pucil saja nged Ngaé meled Nanging buahé puyung Pragat gul-gul suwung

Melalung kadén luwung Luwung kadén melalung Tau tau puyung Mangmung Pragat gul-gul suung

I Ketut Sandiyasa

embas ring Désa Ngis, Kecamatan Manggis, Karangasem, pinanggal 29 Méi 1983. Kakawianipuné kawedar ring Bali Post (Bali Orti) miwah Pos Bali (Médiaswari).