370
Le Voyage de la Terre Equinoxiale,
constant que si le diable leur disoit qu’il en periroit, ou qu’il en seroit pris quelqu’vn par leurs ennemis, ils n’iroient pas ; c’est pourquoy il leur cache cela, pour ne pas perdre sa proye. Tous estant arriuez au lieu de l'assemblée generale, il boiuent selon leur coustume. Ils en choisissent vn d’entr’eux pour estre comme leur Chef & General, qui les exhorte d’estre courageux, de ne rien craindre, imitant leurs anciens & leurs parens, qui ont esté de grands Capitaine, leur representant auec son éloquence naturelle les belles actions qu’ils ont faites contre leurs ennemis qui les ont mis en grande reputation parmy leur Nation, & les ont fait craindre de leurs ennemis. Apres les auoir encouragé, il donne les ordres qu’il faut garder chaque iour, puis il fait donner le signe du départ, qui est le son d’vn cor fait de coquille de gros limaçon, qu’on appelle un Vignot, qui a vn son aussi fort que celuy des cors des Chasseurs de nostre France. Le signal estant donné, chacun s’embarque promptement & fait voile. Il semble que ce soit vne petite armée nauale ; car il n’y a aucun Pirogue qui n’ait pour la moins deux voiles, quelques-vns en ont trois. Ils vont quelquefois trente Pirogues ensemble & dauantage, le Chef ou Capitaine general allant toujours le premier. Tout ce que dessus est vne chose veritable, par le recit que nous ont fait cinq de nos François de la Compagnie de Roüen, qui estoient à Cayenne six mois deuant nous, lesquels accompagnerent nos Sauuages Galibis dans vn long voyage qu’ils firent, pour aller visiter la Nation des Racalets leurs alliez, qui habitent la Riuiere de Maricary, afin de les inciter à venir demeurer parmy eux , pour se rendre plus forts estant vnis ensemble. Nos Sauuages de l'Isle & ceux d’entre la Riuiere de Cayenne & de Macouriague les prirent en leur protection, les auertissant de se donner de garde de ceux de la riuiere de Corou, entre lesquels est cét Apoto, duquel i’ay parlé dans les motifs de la guerre des Sauuages. Ils les menoient auec eux, leur semblant qu’ils sont trop forts, tant pour sçauoir tres bien tirer des armes à feu, que pour donner de la terreur à leurs ennemis