www.adega.gal/revistacerna
VAGA EÓLICA
UNHA AVALANCHA HUMANA CONTRA A NOVA VAGA EÓLICA Belén Rodríguez/Cerna Redacción
Sole Felloza
O pasado 5 de xullo, Día Mundial do Medio Ambiente, unha marcha multitudinaria enchía a Praza do Obradoiro de Santiago de Compostela como había tempo non acontecía por esas datas. Esta grande mobilización social, quizais a máis concorrida na capital galega tras o levantamento das restricións de mobilidade pola Covid-19, quixo visibilizar publicamente o rexeitamento masivo do pobo contra o imperante modelo eólico. Este pretende inzar o territorio galego de polígonos industriais destinados á xeración de enerxía, cruzando o país cunha manchea de liñas de evacuación co gallo de transportar boa parte desa electricidade lonxe dos confíns da nosa terra.
Asistentes á manifestación convocada baixo o lema “Eólica, Así Non” representando aeroxeradores, na Praza do Obradoiro en Santiago de Compostela.
Máis de 130 entidades galegas de toda índole (ecoloxistas, veciñais, sociais, culturais, sindicais, políticas...) uniron o pasado 5 de xuño en Compostela as súas reclamas nun único berro, “Eólica, Así Non”, a prol da moratoria ou paralización urxente da tramitación de 200 parques eólicos proxectados para Galiza aos que están dando curso administrativo, tanto a Xunta como o goberno español. Ás 22 entidades que convocaron a marcha, das que fixo parte ADEGA, sumáronse outro cento de organizacións de diversa índole que subscribiron o manifesto “Eólica, Así Non”. O documento, lido na Praza de Obradoiro por varias das plataformas de afectados/as que emerxeron en Galiza nos últimos meses para defenderse da nova vaga eólica, foi lanzado publicamente unha semana antes para a recollida de apoios. A través deste escrito, reclámase a moratoria urxente de todos os proxectos eólicos que arestora están en tramitación nas administracións da Xunta e do Estado e que forman parte dun novo boom eólico baseado nun modelo de desenvolvemento das enerxías renovábeis desfasado, colonial, inxusto e insostíbel. O texto tamén insta á Xunta a derrogar o Plan Sectorial Eólico no que se asenta a actual invasión de aeroxeradores, por non ter sido actualizado nin sometido á avaliación ambiental estratéxica que esixe a normativa actual, o cal favorece a especulación e o negocio do oligopolio enerxético por riba do ben común, dos dereitos das persoas, da preservación da biodiversidade, da paisaxe e do patrimonio cultural. Deste xeito, as
entidades manifestantes quixeron deixar claro que o problema non son as enerxías renovábeis, as cales consideran necesarias para acadar a transición ecolóxica, senón o xeito de implementalas e sen atender á condición excedentaria de Galiza na produción de enerxía eléctrica a través de fontes renovábeis. UNHA MARCHA LONGA E CONCORRIDA A marcha partiu arredor das 12 horas do mediodía desde a Alameda compostelá seguindo as correspondentes medidas de seguridade. Encabezouna unha grande faixa co lema principal da convocatoria “Eólica Así Non” e representantes das entidades promotoras, entre as que se atopaban ADEGA, FEG, Verdegaia, CIG, FRUGA, Rede do Patrimonio Cultural ou Rede Galega por un Rural Vivo. Tan amplo foi o número de entidades participantes como de faixas e cartaces que acompañaron o percurso da manifestación e puxeron negro sobre branco as reclamas máis coreadas polos/as manifestantes: “Eólica Si, pero Non Así”, “Renovables Si, pero Non Así”, “Non ao espolio das eólicas”, “Sacrificio do rural, beneficio do capital”, ou “Por culpa do capital, bótannos do rural”, entre outras. Estiveron tamén presentes a voceira nacional do BNG, Ana Pontón, o secretario xeral do PSdG, Gonzalo Caballero, e o deputado de Galicia en Común no Congreso, Antón Gómez Reino. Todos eles expresaron a súa repulsa ao actual modelo de desenvolvemento eólico. nº 85 · 2021 · 49