nyilih urip (IGA Darma Putra

Lawat-lawat

nyilih urip

IGA Darma Putra

Manusa sing ngelah apa-apa. Idup di guminé sing ngelah apa. Dedemenan baan nyilih tekén gumi, tekén alam semesta. Demen tekén pamandangan melah-melah, iraga nyilih tekén gunung, tukad, danu, pasih, bunga, batu, lan saterusné. Demen tekén panganggo luung, iraga nyilih tekén punyan kapasé. Demen tekén dedaaran jaen-jaen, inuman énak-énak, masih baan nyilih tekén sarwa gumatat-gumitit. Demen tekén kaduegan, iraga nyilih tekén buku-buku. Tegarang jani alihin, apa ané sekenseken bakat gelahang di guminé né?

Urip? Urip masih baan nyilih. Krana baan nyilih, ada gantiné lakar uliang uripé tekén sang nué urip. Satondéné nguliang, urip ento ubuh di tengahan awak iragané. Ayahin ia aji sarwa ané melah-melah. Éngkén carané ngayahin urip aji ané melah-melah?

Nak urip ento orahanga patuh cara bhatara, sing ia belus ulian yéh, sing puun baan api, sing masih sakit yén tebek, sing sakit hati yén kalahin tunangan. Urip koné overpower, jeg sing ada nyidang ngalahang!

Urip bisa mati? Agama ngorahang urip tusing ngidang mati. Urip ento terus ada. Ané mati tuah awak-awakané. Mirib ené ané nasarin orahanga uripé patuh ajak énergi. Patuh cara rumusné Éinstéin, énergi ento abadi. Tusing mati-mati. Yén alihin di susastra, ané tusing mati-mati madan amerta. Amerta ento marupa yéh ané nyaga awak iragané apang terus idup. Yéh amerta ento ngetél terus uli danu ané tusing ngenah di awak iragané.

Nyén ané nyidayang makatang amertané ento, idupné lakar bagia sing rérénan. Sakéwala lacur, unduk amerta mulan liu ada di satua-satuané. Éngkén kadén jeneng amertané jeg tusing tawang. Yén saja amertané marupa yéh, yéh ané kéngkén ento? Apa yéh ening, apa yéh butek, apa cara jus poh? Jus alpokat? Blue lagoon? Wishkey? Arak? Tuak?

Uripé musti terus usahang apang maan ketélan amerta ané tekané uli dija kadén. Ento awanané iraga kemu mai nguber pura apang maan ketisan tirta amerta. Maan nunas yéh pangumbahan batis Bhatara. Yéh pangumbahan batis

ento ané ketisang di pabahan iragané. Di duur pabahané ada koné Bhatara Siwa malinggih. Yadiastun tusing taén tepuk, iraga jeg yakin ditu suba genah Siwané malinggih. Prajani iraga tusing bani nyulubin ane tidong-tidong. Prajani ngaku déwékné paragayan Siwa.

Miribang yén suba liu nawang ental, idupé nyansan kéweh dadi ental-entul. Magenepan tepuk sing dadi. Sing dadi masulub. Sing dadi punyah. Sing dadi gedeg. Sing dadi ngajeng yén upawasa. Sing dadi maangkihan yén dot mekek angkihan. Sing dadi kéné sing dadi kéto. Makejang sing dadi.

Nak buka kéto koné iraga nyaga apanga urip ané bakat silih ené terus ajeg. Sing pragat nagih malecat. Apang terus urip ané baan nyilih ené suci tan pataleteh. Pokokné apang terus uripé cara yéh klebutan ané ning maglening.

Suba pragat baan nyaga uripé, lakar ada gantiné iraga nguliang uripé ené. Yén nguliang urip, iraga suba ngaba bekel ané terus neket. Orahanga tekén guru-guruné, ené suba madan karma wasana. Ento koné ané lakar neket terus. Lénan tekén karma wasana, paplajahan masih lakar nu neket cara di satuasatuan unduk anak matiné. Kayang matiné, iraga lakar nepukin barong selem, buaya, cicing, lan ané lénan. Kayang ento iraga harus nawang, nyén gén adan beburoné ento. Yén tusing tawang, orahanga iraga tulah tekén idup. Sakéwala yén saja paplajahan ento neket, ngudiang iraga bisa pikun tusing inget? Yén jani iraga lakar nguliang urip, kija uliang? Nyén bang? Éngkén carané? Kena bunga apa tusing?

IGA Darma Putra

embas lan magenah ring Bangli. Kakawiannyané kawedar ring makudangkudang média, minakadi Bali Post, Pos Bali, Tatkala.co, Suara Saking Bali, miwah sané lianan. Ngamolihang Hadiah Sastera Rancage 2018 antuk cakepan “Bulan Sisi Kauh”

Isin Gumi

positif

I Gusti Lanang Sutéja Naréndra

Uli mara madan nawang kasemaran tiang suba ngesir tekén Luh Kancring. Adan melahné Luh Astuti Sinar Dunia Juita Dian Permata Hati. Ajak tiang masekolah uli SD kanti SMA. Jegég nyelolét, kulit putih gading, bancang rengkiang, bohai acikiwir!

I Luh mula bunga désa sujati!

Kéwala lacur, tiang setata katulak. Goban tiangé mula kalah saing tekén I Slodor, I Kacrit, muah I Bedol. Kantongé masi terak, setata puyung sing misi rupiah. Apa laut anggo bekel nganggur? Apa anggo mlanjain nuju I Luh nagih shoping? Ah, kanggoang suba gelekang sakit kenehé, nepukin trunané selaganti ngandéng I Luh melali. Patilesang ibané, buka pitutur anaké lingsir, “beduda tai urek!”

Dugas duang wuku liwat, ada orta ngaé kenehé nyansan sakit. I Luh positif! Suba telu bulan.

Mbééé... jeg paberiak gelem truna trunané. Apa buin ané pepes ngandéng I Luh melali jeg ngereges buka tuunin sakit gedé! I Slodor ka rumah sakit, I Kacrit ngojog doktér spesialis dalam, I Bedol bulak balik ka puskésmas. Pak Gedé muah Pak Tut pisaga tiangé masé ketinjot. Jeg mamerag awakné, sing pati nyak madaran. Mirib makejang sakit hati, kilangan bajang jegég ané aptiang. Béh, sing truna, sing tua, kejegégané I Luh liu makan korban!

Kéwala lacur, sing ada anak nyak nanggung jawabang. Makejang maklieng, balik kanan bubar! Béh, unduk kéné tusing pesan tiang setuju. Sing saja ngelah tanggung jawab dadi anak muani. Buin pidan panaké lekad, nyén bapané? Pedalem pianaké ané lekadang!

Ento mawanan tiang nanjénang awak lakar tanggung jawab. Diastu tiang sing taén malaksana kéto ajak I Luh, lakar idih I Luh juang anggo kurenan. Sangkaning tulusné, sing ada udang di balik batu!

Tiang mulihné I Luh ngajak mémé bapa. Ajak tiang masé kelian dadia, kelian banjar tekén klian banjar dinasé. Pak Prebekel masé milu, nak tiang enu