Riflesion..sen rivai a Marzo 2021

Page 1

SEN RIVAI A MARZO 2021 E NO I- NE ŁA CONTA ANCORA GIUSTA, SOL EL VACINO FORSE, E DICO FORSE, EL- NE SALVARÀ. ( amenoché no sie altre varianti)

Cuśì se nden vanti co quatrozento morti al giorno in Italia, quasi no se- ghe fa caso, é come che cascheśe do aereoplani al giorno – se sucedeśe davero i areoplani no i-vołarie pi; ghe fa caso sol a chi che ghe toca e par ła fameia ła-é na raśegnazion. Verso dicembre se-varia sbaśà el famoso indice, i morti e anca i ricoverai i-parea całai e pian pian parea che el dovesse sparir sto virus, se ndati in lieve całando fin a łe feste de Nadal parea che i-veśe da verźar tut e anca poder ndar a śiar dato che ła neve sto ano ła-é vegnua prima de łe feste in quantità – iera tanti ani che no ghe ne vegnea tanta cuśì da blocar strade, paesi e portarghe socorsi col elicotero, co’ altre maniere no ghe ne iera. Col persistar de ła źona źała, no vedendo benefici – anzi pian pian se-pegiorea, s’ha fat genaio e febraio pensando che se-ndeśe meio, invenze el 8 marzo sen tornai arancion: bar e ristoranti serai e limitazion sul spostamento da comune a comune tant che al 9 marzo se-registra 376 morti in Italia e in Veneto sen rivai a superar i 10 000 morti e in Italia s’-ha superà i 100.000; no se-vede milioramenti, anzi i-parla de nòve restrizion – staren a vedar cośa che sucedarà. Par mi no i- ne ła conta giusta, gnanca lori i-sa vegnerghene-fora, i-ha zercà de copiar i cinesi che i- n’ha impestà col só virus scampà. Na considerazion: fin a agosto paśà, nonostate che i-diseśe de metarse-su łe mascarine, meźa źente no łe- le portea, forse iera par quel che se-vegnea contagiai da quei senza mascarina. Quando che i n’-ha obligà a portarla, dopo é vegnù-fora ła terza ondata de virus, ełora łe mascarine chi protegełe se se-continua a far morti? Ades ipensa de serar anca łe scuołe che i-ha ‘pena vert, a sto punto é sol i vacini che i-pol forse salvarne ma ghe n’é talmente pochi che par quei che ha bisogno no ghe n’é. Mi no capiśe: ven fat tanti morti in Europa quant ła ultima guera mondial e tuti i-tase nei confronti de ła Cina che ła-é stata ła causa de sta tragedia, no ghe ne parlen de łe Americhe che anca là no se-sa quanti morti, e in India no i-ha gnanca pi legne par brusar i morti. Da quel che ho capio mi, ła Cina ormai ła-tien soto scaco tuti i paesi del mondo comprando e esportando: sto ano lori i-ha esportà el setanta par zento in pi del ano paśà, i-lavora sempre e el resto del mondo el-sta quasi fermo e finanziando tuti, eco parché niśun el-parla, anzi i-tase e par chi che resta, magari el-starà meio a ła fine. Però sempre in Cina dato che là é na ditatura spietata, là no te-sa che strage che sie stat fat, ma par lori é meio che i- se sie s-ciarii, anca parché no i-ha mai savù quanti che i-iera, però el virus i-podea tegnerseło lori e nò mandarneło a noaltri, noaltri se-vea da ndar al mar e in montagna de istà e d’inverno a śiar e no poder andar a zenar fora o ndar dove che se-vol. Ades che me son pena comprà na potente Audi no pośe ndar gnanca fora del comune, no ghe ne parlen de ndar in crociera: tut rimandà a tempi miliori, anzi su do tre de sti cołośi del mar i-ha alogià i extracomunitari , cuśì dopo i- le butarà-via. Par ades sen prigionieri, no se-pol ndar fora del comune, no se-sa chi che controła, però na conquista ła ven fata: te-pol magnar con tak-way in inglese, par farla breve el ristorante el- te manda casa el magnar ‘nte na borsa piena de scartozi – na conquista. Come al sołito, mona de italian , fàte na fortaia. Par farla breve i- n’ha fat comprar mascarine che no se-sa se łe-é a norma – invenze de salvarte łe- te fa morir; penséve che ai


dełinquenti i- ghe łe ha date anca in ospedal; ades proprio ancuo ho sentì come ultima notizia, che i-ha anca soministrà vacini farlochi cioè aqua – penso che no ła finiśe qua, mi łi metarie in gałera a vita, par eśar bon. A ła prośima, sperando de eśar ancora vivo par criticar. Un sopraviśù par el momento.