ANUARIU DE LA MÚSICA ASTURIANA
pirámides y mastabes… ensin plan director, ensin visión/misión. Conceptualmente nun hai diferencia ente’l discursu cultural del noble o del obispu medieval, qu’estremaba la high culture que representaba él mesmu (cola catedral o’l castiellu de fondu, el xuglar o’l coriquín d’eunucos masuñando la oreya) de la low culture que recibía’l pueblu con aquellos saltimbanquis o aquellos ciegos recitadores n’húmedes places. Una cultura intervenida, en fin, pola fuercia de los fechos. ¿En qué momentu los creadores tiremos la toballa? ¿Aceptemos esi estáu de coses que pa nada se producíen n’otres partes de la península infinitamente más dinámiques, más autoconscientes de lo que yeren, de lo que podíen ser? Sociolóxicamente Asturies dexa de ser una posibilidá creadora y autoconsciente en coincidencia colos descomanaos
golpes de les reconversiones de los 80. Ye una rellación causa-efectu indiscutible y ún de los efectos collaterales nunca estudiaos de lo que supunxo la «laminación» de la siderometalurxa, minería y astilleros. Cociéronnos a fueu lentu hasta morrer. Fuimos la quintaesencia del Síndrome de la Xaronca: si metes de golpe una xaronca n’agua ferviendo malapenes raspia l’agua salta y sálvase; si la metes n’agua frío y vas caleciéndolo llega un momentu en que la xaronca queda embaida esperando la muerte. Y eso ye lo que fiximos colectivamente. Un pueblu, otrora quintaesencia de llucha y rebeldía, optó pola prexubilación bien engrasada, Benidorm y Villa. Institucionalicemos el «qué hai de lo mío». Empecemos a vivir de gratis gracies a les abultaes pensiones de los nuestros mayores. Y, como cualquier xestor en marketing sabe, un colectivu
69
social compráu por subvenciones, pasa de ser ente activu a ser ente pasivu; dexa de ser ente autoconsciente y pasa a ser directamente un productu. Pues bien, esi productu nun foi quien a reciclase, a poner el so reló xestor n’hora, al pesar de les décades trescurríes. L’alministración asturiana sigue siendo pa lo cultural el perru del hortelanu, que nin come, nin dexa comer. Y, consecuentemente, siguimos pagando les consecuencies.
2. Dinámiques creatives y muria de contención ¿Quier ello dicir que n’Asturies nun se dan dinámiques creatives? Qué va, bien a la contra. Como en cualquier dictadura (y Asturies, pa lo cultural, yelo) conviven dos niveles creativos: un nivel arrimáu a los muérganos de decisión política y mediática, que más o menos enseg ña’l pescuezu, eso sí, siempre