Oyogedi
Nandummagan igi anmalga igal mesisnade; Nanadummad, Babadummad ebo, igi arbanai gusmala; a bela bela narmaglessun daggensoge.
D
iggasulgus dulemal Antioquia yalgi buggwamalad sunmagdaniggi, igi nabir igal duddurmagsan gadinye;, doddogan, sabbigan, omegan nue odurdaggegalye; emi neg Colombia yal naidgi anmalga sunmagnaiye bela bela anmal nusgana nue igal durdagnai, neggwebulmal nue bendagega guegal biddosulsinye.
We sabgagi anmal sunmagnaid, dulemal walabba narmasmala daggensoge: “ugged, abin sued, gannarga ugged igal”. Ai Gusmán Cáisamo Isarama we igal narmas moye. Gusmán we igal narmagnaigu, bele bela Embera igal dummagan mamaidba binsanai gualsun daggensoge “DULE GWAGE NUED IGAL”. We igal yer dummad mai daggensoge; buge buge bendagged, abirgunar nanaed, wile dagged, bulaggwa nanaed, we igala diggasulgus sedani daggensoge Embera dulemalye.
Anmal bulaggwa buggwamalad birga durgwengusa anmal dulemal odurdaglenaiye neg sabgued igalgi, neg aggwed igalgi, igi igal sunmagmai (Ley 89 de 1890); emisgi igal baid gwalusbali; birga anbe gagga baabaggusa sabga dummad soblesa Colombia yaurginye (Constitución política de 1991); we sabga dummadgi igal nued megnoniye, neggwebur aggwedgi, nabba bendaggedgi, burba nued niggunoniye.
Gwenad Manibinigdiginya (Abadio Green) nugad narmasmosoge: “Igi nabir anmal durdagsale anmal sunmaggedgi; adi nabir anmal wagal nue sabguega, nabir anmal igal dummagan maid iddogega. (Nabba nuga anbe maid durdaggega)”. Gwenad Binigdi we igalgi sunmagnai; igi we Nabgwana gwalulesa, igi dunguali, igi anmal sabgunai; ibu obare “Nan garburba oduloged igala”, igi nabir we igal anmal onasguoye.
Wagmal neg sed yobbilagwa gunonimosun daggensoge, agala bela bela we igal maid durdaglebi abelege. OIA a daggal nueggwa igal nigga e soldagan odurdagnai gualsun daggensoge. Degi gunaidgi INDEI gwalulenonisunye; doddogan, sabbigan, omegan nue odurgaggegala, nue binsaed igal amiega, agala gwalunoninsunye. Nueggwa mani aggwega, nueggwa igal maidba sunmaggega, nueggwa neg sed, agi OIA arba alsun daggensoge; a igalmalgi sunmaggega, OIA Onmagged igal ogwalulenoniye, nueggwagi sunmaggega, nueggwa durdaggega, nueggwa binsaed amiega, igi anmal sunmaggoe, igi Colombia yala anmal degbugmoga.
Nabbidgi Laura Patricia García Castro, anmalga nabbi sogmoye; igi anmal arba nai we Onmagged neg ogwalusadgi, igi sabgamal anmal oduddurmaisa, nabir igal nigga guega, gwenadgan anmalba durdaignaid nabir iddos guegala; igi nabir durdagnai, igi nabir narmagnai. Gwenadgan anmalba durdagnaid, nue narmaslad we sabgagi oyolemogoye.
Degi igal dummagamba anmal arba alsun daggensoge, igi nabir anmal soldamal nue odurdaggoe, igi nabir billi baggegine anmal dulemal durnai gusan gadinye. Degi gunaidgi anmal Universidad Antioquigi, Onmagged dummad ogwalulenonibarsun daggen soge; we igalmalba sunmaggegalye. E igal dummagan duddurmagnai gualsun daggensoge,
Bulaggwa durdagged, bulaggwa igal amied, burba nigga guegalye, gwenad Antígona bulaggwa igal maid anmalga sunmagsa, anmalga igal nued senoniye, desoggudi anmal bela gwable we igalgi arbanaid, sunmagnaid na iddosmal biddosunsiye. Dog nued anmal sunmasmalye, igi nabir arbalesale bulaggwa igal mesnai guegal, anmal Onmagged nega onasguegalye.
6