Na so maka pantag ko kapaga adati ko manga bae na pitharo o Allah sa Suratul Baqara 2:228
Go so Hadith a miya panotholi Thermizi a pitharo o Nabi
:
“Mataan a ana kabnar rkano o manga karoma niyo go adn mambo a kabnar iran rkano.” Sii ko Sura Yasen na so Allah na ini ndiyandi iyan a daa ginawa a ba maka sagad sa kasiksaan ko da thibabaa, sii ko gawii a kathontaya ko manga galbk. Aya maana nan na omani isa rktano na dadn a tabiyaon na khi izaon so marata go kandosa a galbk a miya thabiat o tao ko izik iyan a manosiya, magizan o Muslim anta aka sarowang. Miya panothol o Hakim a wata o Muawiya a miya tharo iyan; magiza ako hay sugo o Allah, Antonai kabnar o babay ko karoma niyan? Na pitharo o Nabi a maphagpr ka ko kiya prangka sa ginawangka, go mapaka pnditar ka ko kiya pakanditarangka sa ginawangka, dingka paka pngganin go dingka ngganatan o skaniyan bo inontabo o sii ko walay niyo. Na liyo pn sa miya aloy anan a Hadith na adn pn a kabnar o babay ko karoma niyan. A mipngginawaingka go dingka kararangitan ko isa bo a mongapongay a adatiyan. Ka kagiya and a ikha soat kaon a kama piyaan iyan. Na giingka mapaka phapasiyo go pkha pr ka. Mapakanditar ka go ana kaddrangan iyan, mapakambilangataongka ko Islam. Babo labao so lima rokon a Islam, go so manga pd iyan a masowa iyan a tanitiyasa a kapzowa a niyanon. Aya kakmpt iyan na so mama na khisangkadiyan a kapaka tatayaa niyan ko kaaroma niyan ko langon o panagontaman iyan ko kauyagoyag iyan, sii ko Islam na maradika so bae a saginda o datu ko simba. Sii ko kabnar ko kapaganad, kapmbalasiron ago kasiyapa niyan ko tindg iyan. Tarotop ago mattkhs iyan so rkiyan a atastanggongan, maradika ko kapamili sa engmpda’ go ana kabnar iyan sa kapakimblag igira miya asa so sarat, go maphaga pelido niyan so rkiyan a apelido ko oriyan o kapaka bangon iyan sa walay o kabaya iyan. And mambo a atastanggongan iyan ko pamiliya niyan ogaid na maoona so mama. Hay kadnangko na toro akongka ka angkami di kaeeblisi ko gii kindolonaan ko manga bae babo labao so karoma. Na rizkhi I kamingka sa Halal tad ko pamiliyami. Mazokhod a rizki ka aniran minggolalan so sangan a tad rkami.
Tarimaan rktano o Allah so kabarakat o Qur’an go maka gona rakn go skano so matatagoon a sabdan go so tadntadm a ongangn, go ptharoongkowai ago phangni ako ago skano go so kadandan o manga Muslim sa maap ko Allah ko omani dosa, na pangni kanoron sa maap, kagia skaniyani ptharima sa taubat.
Piyagarao A Khutba: A Toroan Ko Kapaka Mangoao O Kapagintao Para Ko Komakali-lid A Muslim Sa Pilimpinas | 113