Su kinad talu nin a Allah siya kanu Surah Yusuf: ”Pidtalu (Yusuf) nin; Baluy ka salaki su nan a walay a panaguawan siya sa kalupan: ka sabensabenal salaki na matiyakap, a mawlad e kataw.” (Qur’an 12:55)
Endu siya pan kanu salakaw a Surah na pidtalu nu Allah: ”Kanu mga nabi nilan (silan na naaden a mga nabi kanu ulian u Musa ’alaihissalam) pidtalu nin salkilan: Su Kadnan na sabensabenal na binaloy nin si Thalut a a datu nu.” Yanilan pidtalu: Panun i kagaga nin kumamal salkami sa yapan labi a dayt a kumamal na sekami kumin salkanin, ka dabu isa a naknggay lun, ebpun kanu mga tamuk a madakel? Ya nin pidtalu: Su Allahu Ta’ala na sabensabenal a pinamili nin salkanu, endu sabensabenal a inumanan nin su kataw nin endu su mabagel a kanggulawas: endu sabensabenal su Allahu Ta’ala na ibpagenggay nin su kadatu kanu entayn i kalilinian; ka su Allahu Ta’ala e labi a mataw. (Qur’an 2:247) Sekitanu na kakuwayan tanu ataw ka nasabutan ebpun su nan a mga ayatan sa su silan antu a masla i kinagkataw kanu kinsabut kanu agama sa namba i atulan-ukit; ka niyaba na benal a lalan siya kanu kapangingiseg endu su kapegkapya na siya kanu kasabut kanu agama, ka siba nakabetad su kalilintad. Su kaped pan a papata a katinggiyan nu Islam a kamal a kasabutan tanu ebpun kanu entu a mga ayatan u Allahu Ta’ala na su pidtalu a bantang (justice) ataw su kaden u kambantangan. Su tidtutidtu a kambantangan na di masampay yatabiya na su katalutup nu kagkataw ku Qur’an endu kena kuyug su kinag kataw a nandudulumpuk ataw ka nadtatagitu. Su egkaunutan na sabensabenal pan na nanget den salkanin su katiyakap kanu mga binatang endu kanu ped pan a melanaplanap a imga inaden. Su isa a pinaka mapya amapagunga nu kambantanagan a su bantang na isa kanu mga papata a katinggiyan nu Islam a Kakamal na su kadtakena nu kalilintad siya kanu mga pamusungan nu mga taw. Ka niya ba na napanudtul a kadtalu ka su Caesar (isa iniya a datu kanu timpu ni Umar) na napapayt sa sinugu lu kanu Umar (a ika-duwa aKhalifa) ka endu nin mapanuliman su mga galbekan endu su mga papata nu lekanin a kambebetad. Kanu Timpu a nakauma su sinugu lu sa Madina, na inebpunan nin den mangilay si Umar endu ini-idza nin, sa tigin. ”Endaw su Datu nu?” Yanilan nakasawal na, ”Da la salkami i isa bu a datu ugaid na pagadatan a ”Amir.” Su sinugu na limiyu sa Madina. ”Su kina liyu nin napangingilay nin si umar sa na tun nin sa si umar na pidtulug kanu mga pedtad a inilunan nin su tungkat nin. A su niyaba na manaut, a pedtatanggiten nin, endu ebpangalaw nin kanu sabad a penggalbek sa kasasaytan. Kanu kutika kina-ilay nin kanu kabpagiga nin sa maytuba, na sekanin nantu na namelemek su pamusungan nin endu nadtalu nin na kanu ginawa nin, ”su niyaba a taw na kanu silan antu a mga datu na kaliduwan nilan su mayaba, amay ka ilaynta sulekanin a kambebetad. Hay ’Umar’ seka na pembantangan sa pakatulug ka sa maya ba. Amayka su lekami a datu a dupang, ka su kalalmagan na diden makatelen ka kagilkan.” 32 | Mga Pinamili A Khutba: Panduan Kano Kaiseg No Kamamagingedi Kano Manga Maginged A Muslim Sa Pilipinas