Selected Khutba Maguindanaon

kinadtalu nilan sa: ”sekami na natawan nami kanu manga kalukesan ey aden agama nilan, na nambuba ey pagunutan nami. Sa benal a pebpalitiyayan nami su manga galbekan nilan, taman sa penggalbeken nami bun.”(su sinugu) na yanin nadtalu: na apya ey tingguma ku salkanu su mas mapya pan kanu nan a agama na pagagaman nu bun su agama nu manga kalukesan nu?” yanilan nakasawal na kasabensabenalin, na di nami palitiyayan su nan a nakatingguma nengka. Na kagina maytu na sekami na inaden nami su kauliyanan nu manggula, sa ilayn nilan ey kauliyanan nu kina sangka nilan kanu lekami a manga tanda (su Kaisa-isa nu Allah).” (Qur’an 43:23-25).

Su niya a mapulo a manga ayatan na napayag nin su nakapusaka ataw ka su manga nakabagu a agama atawka su manga unga nu kina pamikil a di igkatun kanu manga kasuguan nu Allahu Ta’ala endu siya kanu manga panduan nu Nabi na natatalanged na di katalima sa yanin pan kauliyanan na su lipungit nu Allahu Ta’ala sa siya sa dunya na endu sampay den lu sa Gay a mauli.

Pagadatan a manga suled ku a manga mama endu manga babai kanu Islam! Su Muslim, sekitanu na nabpaliyugatan sa kanu da den ped a pagubnutan yataby na su Allahu Ta’ala bu.

Sekitanu na nabpaliyugatan pan sa kanu katagag endu kadsanggila kanu langun o manga galbeka, manga kadtalu endu palitiyaya sa kanu di tanu kapakay lun a kamungan tanu.

Sekitanu na nasugu pan sa nakabpaliugat su kaparihala tanu kanu manga wata sa maaden silan sa manga mapya endu kapangulinanan silan sa kanu katangka nilan kanu langug o embalangan o manga kepit (palitiyaya a di pakasugat kanu panduawan o agama) endu su manga pamakasekat lun.

Sekitanu na nabpaliugatan kanu kapatuntul kanu manga wata tanu kanu kapaginuntulan kanu Allahu Ta’ala endu su kaparihala kanu tidtutidtu a kasabut nilan sa su Allahu Ta’ala ey nangaden sa kanilan. Su niyaba a ukit, na silan na maaden su salig nilan kanu Allahu Ta’ala bu sa kanu langun o manga pangeni nilan kanu inggaga-isa, kanu manga timpu a siya silan kanu kamalgenan endu lidu na ginawa endu su katangka nilan kanu manga bitiala a dala kabenal nin endu su manga kasakutuan a galbekan. Umingkabu ka makanggulalan su niya ba a mapya ukit na, na mslepas tanu kanu langun o manga edtibalangan a galbeka a shaytan endu su manga kadtalu endu su kapunas sin siya kanu kamagingedi, sa kagina sekitanu na pebparihalan tanu su lekitanu a manga kangapyanan sa kanu manga di-pakasugat a ukit endu su manga kakkenal a dala kakkandutan lun siya kanu Qur’an endu kanu Hadith.

Binal gid, na su Qur’an na dikena yanin kahanda kanu kinatulun lun ey asal bu makasadang siya kanu manga leg tanu (pembaligen), ugaid na ipenggamut siya kanu manga pamusungan.

Su Qur’an na nakatulun sa endu maaden sa kaawan, katangkan su nan a manga kapalitiyaya a da kakandutan lun siya kanu panduwan o Allahu Ta’ala kanu kaisa-isa nin.

Ipegkalimuwa a manga suled ku a mama endu babai kanu Islam! Kagina kamaytu na idsamasama tanu kanu kapangeni kanu Allahu Ta’ala a mapulo endu malimu a benal sa enggan tanu nin sa tutulu, panduwan. Sa da nakapas, nakasampay kanu kahanda yatabya na su tawfiq nu Allahu Ta’ala. Endu lumindung tanu kanu kaungangenan nin endu enggan tanu nin kanu manga kapyanan a makambalapantag kanu mang ginawa tanu, kanu manga pamilya tanu, kanu lekitanu a manga dalpa taw ka pagingedan kaselasela nin su agama tanu, a Islam.

Endu pangenin tanu pan kanu Allahu Ta’ala su kadipinsa nin salkitanu ebpun kanu manga shaytan endu su kasampay tanu kanu mapya a kauyag-uyag siya sa dunya, labi lawan den lu sa Akhirat.

Ya Allah! Tabangi kami ningka sa kadsindit nami indu kapangimbaban nami salka. Talima ka su manga sambayang ngami. Ya Allah! Ipagedam ningka salkami kalingaw nu kinapadtaubat 242 | Mga Pinamili A Khutba: Panduan Kano Kaiseg No Kamamagingedi Kano Manga Maginged A Muslim Sa Pilipinas