Aden bun siya kanu kadtalu nu Allah san sa Qur’an sa tigin:
”Kuwanu su sadeqa (Zakat) ebpun kanu mga tamuk- kakawasan nilan sa endu malimpiyu endu masuti nin silan, endu epangeni nu silan kanu Allah. Sabensabenal embu! Ka su manga pangeni (Sambayang) na kadsabapan nu kalepas nilan, endu su Allahu Ta’ala na langkap su kataw nin endu su kasabut nin.” (9:103) Epegkalimua a manga suled ku a manga mama endu babai kanu Islam! Su Zakat na ika-Tlo (3) ebpun kanu Lima(5) ruku nu Islam, Kanu, namba na sekitanu na dayet a egkatawan tanu endu panulimanen tanu nentu ka nalabit siya kanu takuyuga nu sambayang sa naka duwa-pulo endu walu (28 times) nambalinganan san sa dalem a Qur’an. Ade lun ey masla a tudtulan endu panduan kanu ma’na nu zakat siya kanu matakapala a kanggula. Zakat endu Sambayang na embidaya inya a fardu kanu isa a muslim sa ula-ula a paliugat salkanin sa makatunay nin kanu Allah sa isa a ibadah. Su Zakat na isa ey nan a pasad kanu kadnan a para kanu manga miskinan endu kanu pamakanisisita a benal, sa kanu kagkapya nu maginged ebpun kanu silan antu a manga tao a masla ey sangan nilan kanu suwat-suwat lu sa Allah. Idzan su endaw den kanu manga pegkamal kanu kakawasan taw tatamukan nu manga kawasa a dalpa, mana su Saudi Arabia endu su Malaysiya, su secretu nu kina pas nu kakawasan nilan, endu yanilan edtalun salkanau sa da kanduwaduwanin sa yanilan edtalun na su kina aden o kinatindeg nu pedtuganul kanu zakat ebpun kanu maginged taw ka su mga kakawasan nu gubilnu sa kanu kabpagawida nilan kanu manga kumpanya sa tigu kibasa lun na ’governmentowned and controlled corporation”, sa maytubun su kinapagawida sa kadtumpuk(Mudarabah) kanu kina inggay sa kapital siya kanu manga banku nu Islam (islamic Banks) kanu mga negosyu a Halal. (lawful) Su Zakat siya kanu manga kawasa a dalpa nu muslim na pakaaden sa kapital sa kanu kapegkatatap nu zakat (sa katuganul sa mapya) endu pakangulalan sa mana da den kadtaman nin su kabpagiseg nin taw su kabpangengetu nin. Su kina-limbag lun na dayet a kay-ilingan nu manga muslim a maginged, kagina su kagkapital kanu kultan nu zakat na pembalayin su manga gugudan nin sa pedsanggilan a benal sa mapagusal kanu haram a manga a kabpagawida (transaction), mana su riba, su kapapagisig kanu kapagutanga; su kapagusal kanu kulta nu zakat siya kanu manga factory, kanu manga pamagedan sa endaw den embalangan nin a egkasimbulan nu manga pruduktu a katendu a haram. Na namba ey sabap a ka nentu su endaw den kanu manga Islam a Banku na su ukit (system) na epebpaliugat su ka Umpung kanu manga Ulam sa isa silan a lumpukan a makatuganul kanu kadtakena nu manga kabpagawida (transactions) sa katawan su haram ensu su halal. Siya kanu manga Muslim a pagingedan, niya den kasalilidan a sabap siya kanu masla, nangasasangan endu su masla a kandagang na su kambantangan kanu kapayag kanu langun o katimuan nu napantiyali endu su manga tamuk a dayit a ped-Zakatan. Endu sa niya den ba a manga gay, na niyaba ey secretu nu kapegkapas nilan sa mapya. Nanden ba ey masiken a benal a kasulagidan kanu hustu-hustu a kasabut kanu kina-papata nu Allah kanu zakat san sa Qur’an sa naka-upama sa isa a unud a pagetu sa pitu timan ey lawas nin taman sa madtakeptakep pan.
Mga Pinamili A Khutba: Panduan Kano Kaiseg No Kamamagingedi Kano Manga Maginged A Muslim Sa Pilipinas | 187