Sakamayto bon a kadtalo no Allah: “Hay sekano a mga atagin a namamalityaya! Pangangkan kano sa kano mga mapiya atagin a ibangenggay nami sa lekano endu edshukor kano sa Allah amayka sekanin e pedsimban no.” (Qur’an 2:172) Hadith a napanudtol e An-Numan ibn Bashir (naliliniyan sekanin o Allah) pidtalo nin: Nakineg ko so Rasulullahi Salla llahu alaihi wa sallam a pidtalo nin: so halal na mapayag so haram na mapayag, ugid na aden san sa pageletan nilan e dili mapayag, na madakel e mga taw a di nilan katawan so ento ba. Entain e taw a panamggilan nin so nan ba dili mapayag na nalepas in so agama nin endo so maratabat in, entain menem e taw a enggalbeken in so nan ba a dili mapayag na mana sekanin bagipat sa mga kambing kano ubay no ped a taw a aden (hima) ranso nin, aden anto na makasaladat so mga ayamin kano nan ba a ranso na ped a taw na katuntutan sekanin. Mga taw! Uman e isa a datu na adem Hima nin, na ya Hima no Allah siya sa dunya na so mga inisapal in. Sabenabenal a aden sakempel a lugo kano lawas o taw, amayka egkapya so nan ba na egkapiya langon so lawas o taw, amayka mabinasa baynan na mabinasa so langon o lawas o taw. Sabuti no! ka nan ba so pusong.
Pidtalo no Allah sa Qur’an: Hay sekano a mga taw! Pangangkan kano sa kano nadalem sa dunya a mga halal endu mga mapiya; endu di no bagunuti so mga sangkad o mga shaytan, ka sabensabenal na sekanin na satro no a mapayag. (Qur’an 2:168) Amayka sabuten tano sa tidto so kasla na kapantag a Halal ania kano uyag-uyag o Muslim, na so agama Islam na inipamamantag ign gaid endo pinakasela nin so kalimpio no pangengken endu so baginumen. Ya nin sabap na kagina so pegken endu baginumen na dikena ya nin bo galalagit so lawas o taw ka galalagit tin pan so pantag kano ibadat endu agama a lo nin ibagenggay sa Allah. Ikaduwa, na dait bon a pakaselan o taw kano ginawa nin so katalima nin kano mga ped a aden lakit lambay nin kano Halal. So mga manggula a aden lakit lambay nin kano gabpunan no ibaguyag o taw, na ya patot na ilayn o ninto siya nin nakua sa ukit a Halal o di na kaped a ukit a inisapal o Islam. Na mayto bon ba mambo, so silan anto a nasanganan sa salig sa panguluan kano mga taw, o di na so silan anto a aden bagelin, na ya dait na itago nilan bon sa ginawa so kapanggulalan sa Halal a kakamal siya kano kapenggalbek ilan kano inisalig sa kanilan. Kagina ka mayto, na Halal ania a basa na mawlad a bityala, sa ya patot kano uman e isa a Muslim na makapagmaw nin kano langon o pidtibalangan o uyag-uyag o manusya, So kaimportanti no Halal sia sa kano kabangumbal sa mga pegken, na masla gid e kinambityala lon no mga ulama sa apiya endaw, iganat sa da pan maumbal taman den sa gapakay den pegken, endu iganat sa mapiya a kaumbal taman den sa pinakamapiya a kaumbal sa Halal a pangenengken a siya pakabpon kano inisugot o di na limpio a nabpunan endu naukitan taman den sa embaloy a mabpasa den sa padian sa dunya.
110 | Mga Pinamili A Khutba: Panduan Kano Kaiseg No Kamamagingedi Kano Manga Maginged A Muslim Sa Pilipinas