INACIU IGLESIAS: UNA MIRADA OPTIMISTA SOBRE’L FUTURU

Inaciu Iglesias, de Cartonaxes Vir: una mirada optimista sobre’l futuru de la sidre y d’Asturies

Inaciu Iglesias llanza nestes feches daqué tan pocu avezao pente los asturianos como un discursu positivu. “Podemos facer munches coses, hai que tar mui sollertes. El futuru, si lu sabemos trabayar bien, ye mui interesante”

¿Tú que dices, sidra o sidre?

Yo dicir digo sidra, nun sé si ye pola cuenca’l Nalón, que ye d’onde me vien a mi la cosa más ancestral, o pola castellanización, pero yo dicir, digo sidra.

La entruga yera pa sacate dalguna declaración sobre l’asuntu de la oficialidá del asturianu, pero como nun saques el tema, entrúgotelo direutamente. ¿A favor o en contra?

A esti altor de la película la entruga nun tendría, de ser esa, por supuestu que toi a favor de la oficialida porque toi en contra la prohibición. La entruga ye cómo ye posible que nun tea a favor tol mundu. A mi gústame debatir pero cuando la xente entama a falar de prexuicios y complexos yá me da galvana.

¿Pegástite con daquién esti añu?

Dialéuticamente, sí, físicamente, non.

Depués d’esti añu tan complicau ¿en qué situación ta agora mesmo la industria asturiana?

Diba decir que dir a peor ye difícil pero vamos dexalo ehí. La pallabra ye potencial. Podemos facer munches coses más de lo que tamos faciendo, pero hay que tar mui sollertes. El futuru, si lu sabemos trabayar ye mui interesante.

¿En Cartonaxes Vir seguís faciendo les caxines pa la sidra, de regalu y eses coses?

Sí, cada día más.

¿En serio hai daqué n’Asturies que vaiga a más?

Sí, por supuestu. Ye verdá que los asturianos tamos tan avezaos al discursu negativu, a la crítica de tou, que mos cuesta reconocer cuando vien daqué bueno, y el mundu de la sidra, en xeneral, y más del regalu de la sidra va a

más, a meyor, y tien un gran futuru per delantre,

¿Qué te ta prestando que se ta faciendo nel mundu la sidra?

A nivel políticu yo pienso que la sidra vivió munchos años a pesar de les istituciones, cuasi con elles en contra y veo agora que vamos toos por primer vegada na mesma direción. A títulu más personal, de lo que se ta faciendo nuevo nel entornu de la sidra voi dicítelo en tres pallabres: Sidre de xelu. Ensin dubia lo meyor que se fizo en muncho tiempu.

¿A quién convidaríes a un chupito de sidre de Xelu?

A cualquier persona que s’arriesgue y a dalgun políticu de los que lu necesiten pa que tranquilizaren un pocu.