36
CHIGRERU... DE TOLA VIDA José Álvarez El Paneru Hai yá 22 años que José Manuel Álvarez (Tinéu, 1964) decidió istalase n’El Cerilleru y armar El Paneru. A los sos 54 años echa’l güeyu atrás y remembra lo sacrificao que ye esti negociu, pero eso nun-y impidió esfrutar de la so familia y de la so otra gran pasión, los rallyes. Amás, prefier quedase colos momentos bonos y con toes eses presones qu’a lo llargo d’esti tiempu pasaren pellí. ¿Cómo escomenzó nel mundiu la hostelería? Tendría unos quince años y trabayaba nel Bar Campiello. D’aquella, deprendíase a echar sidre llevantando la botella y echando culinos. Llueu pasé per otros dos o tres negocios enantes de decidime a armar El Paneru en 1996. ¿Qué recuerdos tien de toos estos años? Munchos, tanto bonos como malos, pero hai que quedar colos bonos y, lo más importante, cola xente que pasó pequí, y a la que tenemos de dar les gracies por tenemos sofitao y enfotáose en nós. Esti ye un mundiu persacrificáu, que te tien mui amarráu, pero pude esfrutar de la mio familia y correr col mio fiu en rallyes. Al entamu corríemos xuntos, pero cuando fexo los 18 años ecomencemos a competir per separtáu y yo seguiré faciéndolo fasta que pueda. ¿Qué diferencies hai ente El Paneru de enantes y el d’agora? Que yá nun teo pelu (rises)... De veres, práuticamente denguna. Dende’l primer díi, nacimos cola intención de dar bien de xintar y creo que lo conseguimos y que, anguañu, seguimos faciéndolo, gracies a una cocina con productos y de calidá, ente los que destaca’l pexe y el mariscu, y al gran equipu profesionales que pasaren pequí, y col que cuento anguañu, con Emiliano de cabezaleru, qu’escomenzó con nós con 25 años y yá lleva seyes al frente la cocina. Tamién notemos qu’en branu vien muncha xente mozo, que mos conoz al traviés de les referencies qu’hai de nós n’internet y eso enantes nun pasaba, en branu la xente nun venía a los barrios. 180