DÍA DE LES LLETRES Día de les Lletres Asturianes ye la fecha qu'instituyó l'Academia de la Llingua Asturiana nel añu 1982, col oxetu de festexar la llingua y cultura asturianes y too aquello que se relaciona con elles. Col pasu del tiempu, esta celebración non solo perdió puxu, sinón que se convirtió nun puntu de referencia obligáu nel calendariu cultural del añu n'Asturies. Ye un día en que s'afalaga les lletres, la creación lliteraria en tolos sos aspeutos. Son, entós, protagonistes los nuestros narradores, poetes, dramaturgos, ensayistes y traductores, que col so trabayu ayuden a caltener vivu y dignu esti idioma. Faise una reflesión crítica del presente, respetando y valorando a les vieyes figures (a les que debemos lo muncho o poco que tenemos), pero tamién espardiendo una g|eyada al futuru. Festéxase tamién a la llingua popular d'Asturies, l'aportación quiciabes más orixinal que'l pueblu asturianu fizo (y fai, porque les lling|es nun son productos perfechos, sinón que se faen día a día) a la cultura peninsular, continental y universal. Una llingua sometida a circunstancies abegoses que punxeron y ponen en peligru la so sobrevivencia, pero qu'entá vive, alita y ye ferramienta de futuru. Festéxase tamién la cultura asturiana en toles sos manifestaciones. Ensin grandonismu nengún, porque nun ye la cultura asturiana meyor que les d'otros pueblos. Pero, de la mesma manera, ensin aforrar nengún emponderamientu, dándo-y el tratu xustu que merez. Festéxase, en resume, a la mesma Asturies, coles sos escelencies y les sos miseries. Nun ye aventurao dicir que'l Día de les Lletres Asturianes llogró ser una celebración con munchu más conteníu y pesu asturianísticu que l'oficial Día d'Asturies que se fai en setiembre. A munchos paeznos casi que l'auténticu día d'Asturies, non porque esti de mayu seya estraordinariu, sinón pola absoluta falta de conteníu y de convicción con que se faen les celebraciones oficiales. D'aende'l caráuter inconformista y críticu que tien el Día de les Lletres Asturianes.
Exposición de los libros de la sección de Asturias. Biblioteca I.E. S. Sánchez Lastra. (2, 3 y 4 de mayo)