Paasissutissat siulersuisunut tunngassutillit

Ingerlatseqatigiiffiit Namminersorlutik Oqartussanit pigineqartut aqutsilluarnissaannut najoqutassat KNI A/S-ip malippai. OECD-ip ingerlatseqatigiiffinnut naalagaaffimmit pigineqartunut kaammattuutai, taamatuttaaq ingerlatseqatigiiffinnut børsimi allattuiffinni nalunaarsorneqarsimasunut sukumiisumik kaammattuutai, najoqqutassiani naapertorneqarput. KNI A/S-imi aqutsisut tassaapput siulersuisut aamma qullersaq. Inuit qulingiluat siulersuisuni ilaasortaapput, taakkunannga pingasut sulisunit qinikkat ukiut sisamakkaarlugit qinerneqartarput, ilaasortallu arfinillit ataatsimeersuarnermi qinerneqartartut ukiut tamaasa qinerneqartarput. Siulersuisuni ilaasortat arfinillit ataatsimeersuarnermi qinigaasut sumulluunniit attuumassuteqanngillat, tamannalu inassuteqaammut “Ingerlatsivimmik pitsaasumik aqutsinissamut komité”-mut naapertuuppoq. Siulersuisunut ilaasortaanissami ilaasortat ukiui killilerneqanngillat. Siulersuisuni ilaasortat Kalaallit Nunaanni, Danmarkimi nunanilu allani inuussutissarsiornermik misilittagartuujupput, nunani tamalaani soorunami aamma Kalaallit Nunaanni inuussutissarsiornermik ingerlatsivinneersuullutik. Siulersuisuni Svend Hardenberg siulittaasuuvoq. Siulittaasumik ukiut tamaasa qinersisoqartarpoq. Siulersuisut ataatsimiititalianik marlunnik pilersitsinikuupput: • Kukkunersiuinermi ataatsimiititaliaq • Akissarsiarititat pillugit ataatsimiititaliaq Ukiumi naatsorsuiffiusumi qullersaqarfimmi Jeppe Jensen pisortaaneruvoq. Siulersuisut pisortaqatigiillu atuuffii allat innersuussutini 28-mi allattorsimapput. Akissarsiat

Siulersuisut akissarsiaat suliffeqarfimmi ileqquusumik ataatsimeersuarnermi akuerineqartarput, taakkulu innersuussutini 6-imi ersarissarneqarput. Akissarsiaritinneqartut tassaapput tunngaviusumik akissarsiaritinneqartoq aamma ataatsimiititalianut ilaasortaanermut akissarsiaritinneqartoq. Ukiup ingerlanerani siulersuisuni ilaasortat ataasiakkaat aningaasanik killilinnik ataasiartumik akissarsitinneqarnikuupput. Pisortaanerup akissarsiai siulersuisunut isumaqatiginninniutaanikuusut tassaapput ukiumut aalajangersimasumik aningaasarsiat soraarnerussutisiassallu 10 %-iusut biileqartitaanerlu ilaallutik. Qullersaqarfiup akissarsiai innersuussutini 6-imi allassimapput. Atorfimmiit tunualernermi immikkut ajunngitsorsiassaqartitsinneqarnissamik qullersaqarfik isumaqatigiissuteqarfigineqanngilaq. Nalilersuineq

Ukiumut ataasiarluni siulersuisut nalilerneqartarput. Ukioq allortarlugu naliliineq suliffeqarfiup avataaneersunit ingerlanneqartarpoq. Suliaqarsimanerit

Ukiumi naatsorsuiffiusumi siulersuisut sisamariarlutik ileqquusumik ataatsimiipput. Akissarsiarititat pillugit ataatsimiititaliaq sisamariarluni ileqquusumik ataatsimiippoq. Ataatsimiititaliap qullersaqarfiup akissarsiassai sinaakkusersornerisa saniatigut pisortatut atorfillit akissarsiassaat aamma sinaakkusersortarpaat, angalanermullu politikkit allallu aamma suliarisarlugit. Kukkunersiuinermi ataatsimiitsitaliaq sisamariarluni ileqquusumik ataatsimiippoq. Ukiumoortumik nalunaarusiamik kukkunersiuisullu nalunaarutaannik nalilersuinerup saniatigut naliliiffigalugillu suliarisarpaat aningaasaqarnermut politikki, isumannaallisaaneq sillimmasiinerlu pillugit politikki, suliffeqarfissuarmi kukkunersiukkat, aningaasaqarnermi pissutsit kiisalu kukkunersiuinermik naliliineq. Ukiumoortumik ileqquusumik ataatsimiinnissat saniatigut siulersuisut ataatsimiititaliallu immikkut ittumik ataatsimiittarnikuupput. Nioqqutissarsiniarneq imaluunniit sullinneqarnissamik akiliuteqarneq

KNI A/S ukiuni kingullerni arfinilinni imeq – Imivik, nunatsinneersoq pisiarisarnikuuaa tuniniartarlugulu, imerlu Greenland Waterbank ApS-imit nioqqutissiarineqarpoq. Suliffeqarfiup piginnittuisa ilagaat KNI A/S-imi siulersuisut siulittaasuat. Siulersuisuni ilaasortanit, taakkuluunniit qanigisaaniit, nioqqutissanik imaluunniit sullissinernik allanik suliffeqarfissuaq pisiaqartanngilaq.