Nalaannerlunneqaataasinnaasut

Nakkutilleeriaaseq aamma niuernermi ileqqorissaarneq

Sulisut, pisisartut imaluunniit allat pinerluuteqarnerannik pissuteqartumik annaasaqarnissap killilersimaarnissaa ilaatigut siunertaralugu suliffeqarfik nammineerluni nakkutilliinermik ingerlataqarpoq. Ulluinnarni atugassanik, ilaatigut immiaaqqanik, viinninik aamma tupatanik nioqquteqartuunermigut aningaasanillu akiliisoqartarneratigut pissusissaanngitsumik pisoqarsinnaaneranut KNI A/S nalaataqarnerlussinnaavoq. KNI-mi sulisut tamarmik pisussaaffeqarput pissusissamisuunngitsunik pasitsaassaqarunik tamakku pisortanut nalunaarutigissallugit. Nalunaarutigineqartut tamaasa suliffiup nammineerluni nakkutilliisuisa paasiniartarpaat, aamma peqquserlunnerujunnartunik paasiniaanissaminnut namminneq iliuuseqartarput. Tamakkununnga ilaapput nalunaaruteqaqqaarnani pisiniarfinnut nakkutilliiartorluni alakkaasarnerit aamma aningaasanut karsinik ilisimatitseqqaarnani misissuisarnerit. KNI A/S pissutsinik eqqunngitsuusorisanik nalunaarsinnaanermut aaqqissuussinikuuvoq, taannalu suliffeqarfiup nittartagaatigut tamanit atorneqarsinnaavoq. Ingerlatseriaatsit aamma suliffeqarfimmi namminermi nakkutilliinerit

2020/21-mut ukiumoortumik nalunaarusiornermi uninngasuutit atortuutinut sanaartukkanullu pigisat nalilerneqarnerat allanngorsinnaasoq nalunaarutigineqarpoq. Tamakkununnga tunngatillugu naatsorsuutinik saqqummiussisarnerup pitsaassusaa annertusarniarlugu naatsorsuinermut atatillugu uninngasuutinik naatsorsuisarnermi nakkutilliilluni misissueriaatsimi ingerlatseriaatsit suli annertunerusumik malittarisassalersorlugit aaqqissuunneqarput. Atortuutinut sanaartukkanullu aningaasaliisarnernut tunngatillugu ukiut siuliini tunngavigineqartarsimasut misissorneqarput, kiisalu atortuutit sanaartukkallu pigineqartut nakkutigineqarlutik misissuivigineqarnikuullutik. Tamakku saniatigut tuniniaanermi, pisinermi, uninngasuutini, sanaartugaatini qaammatillu naanerini suliaqartarnerit nioqquteqarnermi ingerlatsivimmi, ikummatissanik tuniniaanermi ingerlatsivimmi Neqi A/S-imilu nakkutilliinermik misissueriaatsit misissorneqarput. Nakkutilliilluni misissueriaatsip nutaamillu ilusilersuinerit naleqqussaanerillu qanoq ingerlanneqarnissaannut siunnersuusiortoqarnikuuvoq. Ingerlatseriaatsinik nakkutilliillunilu suleriaatsinik pitsanngorsaatissat ukiumi naatsorsuiffiusussami tullermi tamarmik atulereersimassapput. Nalaannerlunneqaataasinnaasunik aqutsineq

Ikummatissanik imerpalasunik nioqqutissianik uuliamillu tunngaveqarluni nioqqutissianik KNI pisiortortuuvoq. Nioqqutissiat taamaattut nunarsuarmi niuernermi akigitinneqartut, assut nikerartuusut, tunngavigalugit pisiarineqartarput. Akigitinneqartut nikerarneranni nalaannerlunneqaataasinnaasut paasiniarlugit, aamma atuisartunut akigitinneqartut aalaakkaasut qulakkeerniarlugit, uuliap akiata nikerarnerani nalaannerlunneqaataasinnaasut, taamatuttaaq nunat allat aningaasaasa atorneqartut nikerarnerat, KNI-mit misissorneqartarput. Tamakkulu qulakkeerneqartarput Naalakkersuisut piginnaatitsissummik akuersereerneratigut. Akigitinneqartut ukiut ataatsip sisamallu akornganni tikillugit qulakkeerneqartarput. Suliffeqarfiup allanit aningaasalersueqataaffigineqarnerata annersaa nikerartumik erniaqartumik taarsigassarsinikkut pisarpoq. Nalaannerlunneqaataasinnaasoq tamanna minnerpaaffilerniarlugu suliffeqarfik isumaqatigiissuteqarpoq sillimmasiinertalinnik erniat nikerartut aalajangersimasumik ernialerneqarnerannut inissiisartumik. Ukiumoortumik naatsorsuutit naammassineqarneranni erniatigut nalaannerlunneqaataasinnaasut affai matussutissaqartinneqarput. Suliffeqarfiup aningaasanik tigoriaannarnik sillimmateqarnera nalilerneqarpoq ima annertussuseqartoq tamanna naammassalluni suliffeqarfiup sukkulluunniit pisussaaffimminik naammassinnissinnaaneranik. Atuisinnaanermut pisinnaatitaaffiit atorneqanngitsut sillimmatitut inissisimapput. Allanit aningaasalersorneqarnerup atorunnaarsinnaaneranut ernumassuteqarsinnaaneq minnerpaaffilerniarlugu KNImit suleqatigineqarput aningaaseriviit aningaasaliisarfiillu iluarineqartut tutsuiginartullu nunatsinniittut avataaniittullu. Aningaaseriviit arlaalluunniit KNI-p aningaaserivinni attartugaasa tamakkiisut 33 procentii sinnerlugit taarsigassarsititsisinnaanngillat. Ajutoornerit pisinnaasullu suulluunniit sillimmaserneqarsinnaasut pillugit KNI ataatsimoortumik annertuumik sillimmasiinikuuvoq. Sillimmasiisarneq pillugu pitsaanerpaamik inissisimanissaq siunertaralugu sillimmasiinermik suliaqartut KNI-mit suleqatigineqarput.