249
Загьирани Зуьгьреди хтулриз, Къадиранни Седефан аялриз, туьмерзава, хзанри гузвай
ц1ийи хабаррихъ яб акалзава. Са хабарди абурун рик1ериз мелгьемдин
раб яна: гъвеч1и хва Надира вичиз к1ани рушан т1вар кьунва. Купидиз к1анзавайди Гьашуман руш тирди чир хьайила, Загьиран сивикай хъвер фена. Ада фикирна: «Шаз чун туьхк1уьн хъувунат1ани, арада гзаф йисара гьатай къай амай, гила, къавумар хьайила, ам михьиз акъатда», ван акьалтна лагьана: - Гьашумни зун виликдай дустар тирт1а, гила чун мукьваяр-кьилияр, къавумар жеда. Жегьилриз гьак1 к1ан хьайила, чуни рази я. Бубани диде Гьашуман рушак лишанар кутаз, зулуз мехъерар ийиз гьазур я. - Чан хва Надир, чан зи Купи! Зи рик1ин эрзиман ви мехъеррин югъ акун, закай ви балайрин бадени хьун тир, - лагьана Зуьгьреди. – За жуван хтулар ви копиярни галаз гагь Самургандиз, гагь Кц1ариз хутахда. - Ваз гьахьтин йикъар гзаф аквада, чан диде, - лагьана Надира. Ял ядай, къаткидай вахт хьана. Загьирни Зуьгьре куьчедал экъеч1на, йифен серин шагьвардал акъвазна, электрик лампайри ишигълаван авунвай куьчейда къекъвена. Рик1е гъвеч1и хцин мехъерар аваз, папа хабар кьазва: - Загьир, яраб чи Купидин свас гьихьтин жедат1а? - Зуьгьре гъед хьтин, - галк1ун тавуна, жаваб гана гъуьлуь. - Вув, ваз чидайди гьа са гъед яни? Цава гъетер гзаф ава хьи! – паб вичел алай т1вар Надиран сусал эцигунал рази хьанач. - Зуьгьре виридалайни гуьзел гъед я. Чи ч1ехи хцин свасни, чан бике, гьа и вун хьтин гуьзелди я, гъвеч1и хцин свасни гьа и вун хьтин гуьзелди жеда! Магьачкъала, 2009-2011-йисар.
www.lezgichal.ru