Pipiwharauroa

Waru tekau ma rima, koi te hinengaro me te arero, Ko koe tēra Tangiwai.

Nō tō hingahinga tūpāpahu ana te whenua kua ngaro koe, Kei whea tētahi i tua atu i a koe. Te wahine manaaki, whakakatakata

Te Kaiawhi, Ohorere ana te ngākau i te rangona

Kua whetūrangihia koe

Haere i tō haere, e kore e taea te pēhea.

Ki ōku whakaaro, ka ora koe mo ake tonu atu

Haere e te hoa, te whaea, te kuia

Haere te ringa rehe

Haere ki te tini, ki te mano e tatari mai rā ki a koe.

Haere te Rōhi o Mangatū, o Whatatutu Ā te wā!

Arohanui

Ko Tangiwai Tomoana te tamāhine ā Rusty rāua ko Vine Tamanui, 85 tau te pakeke i wheturangahia nei i te marama kua pahure. Koi te hinengaro, koi te arero, āe ko Tangiwai tēra. He wahine pono, pūmau ki tana whānau me te hapori. He toki, he ringa rehe hoki ki ngā mahi toi, raranga, tāniko, whatu kākahu, whakakai, putiputi, piupiu, korowai me te netineti poraka mai i te wūru hipi. Tino kino hoki mo te raranga pōtae, pēke waha.

I ngā tau kua pahure ake, i kapea ana kōrero mo tōna ao i a ia e pakeke haere ana ki te Pīpīwharauroa.

Nā tēnei āhuatanga ka puta ōna whakaaro ki te raranga. Ko ana kaiako ko tana whāea Heketerangi Te Maipi,engari i taua wā i te purere tonu ōna whakaaro he wāhi kē. Ko tana māmā me Aunty Lucy Rurehe ana kaiako ana he ōrite tonu a rātou akoranga. Kaua e kōrero, whakarongo, titiro, ka mōhio koe.

Ka haere te wā ka mahi tahi rāua ko Te Wai Irwin, he tino hoa ki a ia. Tino pai ki a ia ka noho tahi, ka mahi tahi ana rāua ko Te Wai. I ētahi wā ka moea te pō ki tō Te Wai.

Ko ngā wānanga kete, ka rāwharatia ngā kete i ngā pō wharewhare hei kohi pūtea mā rāua, ka huihui mai hoki ngā wāhine o te hapori ki te raranga ki te taha o Gladys Ruru. E ai ki a Tangiwai ka whakairihia e ia ana kete koretake ki ana rākau i waho i tōna whare, engari iti noa.

Mai anō ia ka whaiwhai haere i ngā wānanga ki te ako ki te hanga kete waha. Mai i Kawerau, ki Papaioea, ki Coromandel. Ka haere ia ma runga pahi, ka tōtō haere harakeke. Ka haere ia ki ngā wānanga a-rohe, a-motu hoki, a, he mema hoki nō ētahi roopu whakariterite e pā ana ki ngā toi Māori.

Ki a ia i kapohia e te tāne a Te Wai, a Rutene he pikitia i a rāua e raranga, engari kua kore e aro kei whea. Tēra pea kua tukuna kē ki Hollywood

Tino koi tonu ana, ka tū te ringa ki te haere manene ki Hīruhārama hei kanohi mo te hāhi Ringatu. Kua tau kē tana mahere haere ki ngā Moutere ki te whakanui i tana huritau 80, engari i whakanuia e te whānau i te White House. Mōhio tonu ia ki ngā whakaaro o ētahi o ngā tāngata ki tana tono. Heoi anō, pūmau tonu a ia ki te kaupapa, ara te haere manene.

Ā te wā ka tūtaki anō.