Гондыр сюан, яке шимес уйвӧт by invozho magazine

Пѐтр Захаров

ГОНДЫР СЮАН, ЯКЕ ШИМЕС УЙВӦТ Кык действиен драма

ШУДӤСЬ МУРТЪЁС: ЭБРАЙ — кылбурчи, 35 арес. ОБЫДА — Эбрайлэн сюлэмыныз (шӧдонэныз) кивалтӥсь инмар. ЙЫРКОБЫ — Эбрайлэн йырвизьмыныз кивалтӥсь инмар, со ик — ИМПЕРИЯ. ПРИНЦЕССА — Обыдалэн но Йыркобылэн нылзы, Эбрайлэн музаез, Обыдалэн яратоно нылыз. ЭБЕК — Обыдалэн но Йыркобылэн кыкетӥ нылзы, Эбрайлэн кыкетӥ музаез, Йыркобылэн яратоно нылыз. КОРТӴОГ — система, закон, улон кужым, мукет сямен вераса, Империлэн улон кужымез, Кощей Бессмертнойлэн венез кадь. Озьы ик татын сокем ик кыкетӥ радэ султӥсьтэм рольѐсты шудо на: МАЙТАЛ — тюрьмаысь потэм воргорон, туала бомж. МУЧОЛО — Майталлэн туганэз, туала бомжлы берытскем кышномурт. КОПАР — туала бомжлы берытскем интеллигентной кышномурт. СЭРЕГПУМ — Копарлэн туганэз, туала бомжлы берытскем воргорон, сыномем атеист. ТАЗ — экономист-бухгалтер, воргорон.

туала

бомжлы

берытскем

ЖУГ-ЖАГ — Тазлэн туганэз, туала бомжлы кышномурт, следователь луыса ужам мент.

берытскем

КОНГЫРЧО — туала бомжъѐс пӧлы йыромем егит кылбурчи.

Действие мынэ куанер Йориклэн йыркобы пушказ пуксем мунчоын но тапалан ик будӥсь дунне писпу вӧзын.

НЫРЫСЕТӤ ДЕЙСТВИЕ Сценалэн огпал сэрегаз мунчо но отысь атрибутъѐс: гур, веник, лапча, ӟус, бунлэсь лэсьтэм ӵаж-ӵаж выль мучоло, копар, таз, туж бадӟым хозяйстенной майтал, кытын ке но кыллѐ, вылды, жуг-жаг но сэрегпум, мунчо гур вӧзын — конгырчо (эгыр суран). Мунчолэн учкисьѐс паласен адӟиськись борддорез пиялаен лэсьтэмын. Та мунчоын париськыны но мед луоз. Адӟись доры парем вениклэн но мунчолэн зыныз вӧлдӥськыны мед быгатоз. Нош али та пияла борддор палэнтэмын. Соин ик адӟись ачиз но мунчоын кадь пуке, малы ке шуоно мунчо учкисьлы матын сылыны кулэ. Со али ик мед шӧдоз ни эстӥськись мунчолэсь зынзэ. Мунчое пырало зэмос мунчо ӧстӥ. Со ӧс сьӧрын мунчо сарача*, кудӥз учкисьлы одно ик адӟиськыны кулэ.

НЫРЫСЕТӤ СУРЕД Мунчоын бергась креслоын пуке Эбрай. Со азьын пичи ӝӧк но печатлан машинка. Эбрай шалтыр гинэ мар ке печатла. Выж вылын кӧня ке погмам бумагаос кыллѐ ни. Сарачаын пуко бомжъѐс: Майтал, Сэрегпум, Таз но Конгырчо картаен шудо, Копарен Жуг-Жаг японской телевизорысь видик учко, Мучоло пеляз наушникъѐс понэм, солэн выросъѐсызъя валаны луэ, со туж тунсыко крезьгур кылзӥське шуыса. ЭБРАЙ (печатламысь дугдыса). Ӧвӧл, тӧдьы горячка та ӧвӧл. Соку малы мон мунчоям пегӟи? Мар ке но йӧспӧртэм мон адӟыны кутски. Адямиос табре мыным тӧдьы шаръѐс кадь адӟисько. Мон кылӥсько соослэсь малпанъѐссэс. Писпуос но, турын куаръѐс но, тылобурдоос но, пӧйшуръѐс но табере монэн верасько. Та нырысез югдур. Но вань на ай кыкетӥез, мон пель сьӧрам весь кылӥсько кыӵе ке куараез, кудӥз котькуд юанэлы валэктонъѐс сѐтэ чырты берысеным. Кин со сыӵе, мар со сыӵе? Песятае мынам, ведӥн, шуэ вал кадь: кылзӥськоно со куаралэсь. КУАРА. Абсолютно шонер вера вал со тыныд. ЭБРАЙ (куаляк усе). Тырмоз, я вера ни мыным, кин тон сыӵе? КУАРА. Тынад эмиссаред. ЭБРАЙ. Мынам эмиссаре? Нош мар со эмиссар? КУАРА. Дышетӥсед, валэктӥсед, проводникед тынад… ЭБРАЙ (йырзэ вуэ донге). Тырмоз, йӧнатсконо та кызьы ке. Та огшоры тодэ ваѐн… Песятайлэн верамъѐсыз йырам берытскыло. КУАРА. Дырдэ гинэ юнме тон быдтӥськод… Вай ай тодад песятайдэ… Со дышетӥз тонэ… ЭБРАЙ. Ӧвӧл, ведӥн дунне — со выжыкыл, пеймыт адямилэн дунне шоры учкылонэз! КУАРА. Та малпанэд тынад шонер ӧвӧл. Соку малы тыныд адямиос но пӧйшуръѐс тӧдьы шаръѐс кадь адӟисько? Малы тон кылӥськод писпуослэсь вераськемзэс?

ЭБРАЙ (буйгатскыса но тунсыкъяськыса). Уг тодӥськы, со валантэм мыным… КУАРА. Валэктонэз татын одӥг — тон адӟыны кутскид лул кужымез. Табре тон борддор пыр но адӟиськод, озьы-а? ЭБРАЙ. Бен, адӟисько. Соин мыным шурдыт. Тон вера ай, кинъѐс отын сарачаын пуко? Соос зэмзэ кыӵе ке но бомжъѐс яке — мынам фантазие? КУАРА. Соос зэмзэ улэп лулъѐс. ЭБРАЙ. Но мон ачим ук соосты малпай. Кызьы соос мынам йырысьтым татчы потӥзы? КУАРА. Соос йырысьтыд ӧз потэ. Соос город ульчаосын костаськыса ветло вал. Тон соосты мылкыд кужыменыд та мунчояд ӧтид. ЭБРАЙ. Озьыен, мон соосты ачим ӧй малпа?.. Мон соосты кыӵе ке но гипноз кужыменым адӟи но собере татчы ӧти? КУАРА. Абсолютно шонер. Вылаз ик валатэк мар каремдэ, тон кармаед борды со лулъѐсты герӟад. ЭБРАЙ. Мон кармае борды со лулъѐсты герӟай? Кызьы-о валано сое? КУАРА. Тон соослы инмар луид. Гипноз кужыменыд бордад думид. Азьлань кошкон понна, табере тон соослэсь мозмиськыны кулэ. Эрик тон сѐтыны кулэ со лулъѐслы. ЭБРАЙ. Кызьы? КУАРА. Мон тыныд верай. Со понна тыныд кулэ гозы, кортӵог, мылкыд но Библия. Мынам верамея, кызьы кулэ озьы обряд лэсьтӥд ке, ваньзы кошкозы. ЭБРАЙ. Кытчы кошкозы? КУАРА. Котькудӥз аслэсьтыз сюрессэ шедьтоз. ЭБРАЙ. Нош мар монэн луоз? КУАРА. Тон мозмиськид ке соослэсь, тыныд кужым пыроз. ЭБРАЙ. Нош собере? КУАРА. Соберезэ ачид адӟод.

ЭБРАЙ. Загадкаосын тон вераськиськод. Ярам, ярам, лэсьто мон обряддэ, тырмоз мыным одӥг интыям пукыны, азьлань ке азьлань, адӟом, мар отыназ луоз. КУАРА. Абсолютно шонер малпаськод. Вот тазэ ини зэмос пӧйшурась, зэмос ожчи тон пушкысен вера. ЭБРАЙ. Ярам, эн быдты кылъѐстэ. Абсолютно шонер пӧйшурась, зэмос ожчи… Ачид кытын-о тон луод? КУАРА. Вӧзад. Мон котьку но вӧзад. ЭБРАЙ. Марысь мар ке, тон шонерты монэ… КУАРА. Ваньмыз ортчоз умой. Кортӵогед сярысь эн вунэты. ЭБРАЙ. Ярам. (Куаразэ будэтыса). Э-эй, Майтал! (Бомжъѐс ваньзы куалекто). МАЙТАЛ. Чус кариське. Жуг-Жаг, Копар, кысэлэ видиктэс. Мучоло! (Соиз наушникъѐсын уг кылы. Наушниксэ кыскыса). Кыс крезьгурдэ. МУЧОЛО. Малы? Мар луиз? ВАНЬЗЫ. Эбрай ӧте! МУЧОЛО (шумпотыса). Монэ? (Пыд йылаз султэ). ЖУГ-ЖАГ (берен сое кыскыса пуктэ). Майталэз, Майталэз со ӧте. Мучоло шуак крезьгурзэ кысэ но кирос пуктэ. Ваньзы кирос пукто. Собере Майтал мунчо ӧс пала вамыштэ. МАЙТАЛ (пилеш йырзэ мунчо ӧсэтӥ мычыса). Кылзӥсько, Эбрай. ЭБРАЙ. Чаль ай матэгес. МАЙТАЛ (мунчо ӧсэз умой-умой ворса но матэктэ). Туж сак кылзӥсько, маэстро. ЭБРАЙ. Шедьтӥд-а тон мыным гозы? МАЙТАЛ. Шедьтӥ. (Бызьыса сарачае потэ.) Таз, кытын гозы? ТАЗ. Мон уг тодӥськы. МАЙТАЛ. Сэрегпум, кытын, ӝоггес! СЭРЕГПУМ. Мон но уг тодӥськы. МАЙТАЛ (кыкназылы ик йырберазы бур киыныз но паллян киыныз ӵош чабке). Кызьы уд тодӥське, в натуре? Конгырчо?!

КОНГЫРЧО (гожъяське). А? МАЙТАЛ. Кытын гозы? КОНГЫРЧО. Кыӵе гозы? МАЙТАЛ (киыныз шонтыса). Э-эй! Копар, Жуг-Жаг?! КОПАР. Мон уг тодӥськы… ЖУГ-ЖАГ. Мон но уг тодӥськы… МАЙТАЛ (чиньыоссэ веер кадь карыса). Ма, кызьы уд тодӥське, тӥ мар, в натуре? (Соосыз кышкатскыса пуксѐ.) А, Мучоло, тыныд ук мон сое сѐтӥ! МУЧОЛО. Тае-а мар-а? (Кытысь ке туж кузь гозы поттэ). МАЙТАЛ (шуак гозызэ басьтэ но зынъя). Маин-о тон сое зырад? МУЧОЛО. Майталэн… МАЙТАЛ. Кыӵе майталэн? Ческыт зыноеныз? МУЧОЛО. Бен… МАЙТАЛ. Но мон тонэ хозяйственной майталэн зыраны косӥ ук! МУЧОЛО. Тон шуид: Эбрайлы та гозы кулэ. Соин ик мон ческыт зыноеныз зырай. МАЙТАЛ. Мар

пайдаез

со

ческыт

зыно

майталлэн,

сое

хозяйственной майталэн зырано! МУЧОЛО. Ма, кытысен мон тодӥсько. МАЙТАЛ. Ӝоггес шедьтэ хозяйственой майтал. (Утчало, шедьто, сѐто.) Кутэлэ ӝоггес. (Кин ке гозызэ кутэ. Майтал майталэн зыра.) КОПАР. Нош малы солы гозы, малы сое майталэн зырано? ЖУГ-ЖАГ. Хе-хе-хе… Ошиськыны, вылды, турттэ яке кинэ ке ошыны… Ваньзы куалекто. МАЙТАЛ (кышкатскыса). Кытысь тон тодӥськод, Жуг-Жаг? ЖУГ-ЖАГ. Нош марлы, иське? Малы гозыез майталэн зырало? Вольыт мед луоз, вӧсь медаз кары шуыса… МАЙТАЛ. В натуре, малы ай со майталэн зыра?

СЭРЕГПУМ. Малы зыралоз на, шонер вера Жуг-Жаг, татын мар ке сьӧд коӵышлэн берпалыныз чиля… МАЙТАЛ. Ӧвӧл, братъѐс, Эбрай интеллигент, поэт. СЭРЕГПУМ. Мон но дышетӥсь вал — атеист. Нош табере мон — Сэрегпум. КОПАР. Мон но сыӵе ик вал интеллигент, учѐной, табере — Копар. ЖУГ-ЖАГ. Нош мон вал мент, табере — Жуг-Жаг. ТАЗ. Нош мон, нош мон, нош мон(синвуаське) экономист вал, табере — «Таз» шуиськоды. МУЧОЛО (серекъя). Нош мон неноку интеллигент ӧй вал. Мон котьку Мучоло вал, кӧня тодӥсько асме, нош племяше пичи дырысеныз ик — Конгырчо, озьы ке но со кылбуръѐс гожъя, Эбрай кадь ик. МАЙТАЛ. Тырмоз. Ӵошатыны уг луы асьмеосын сое. Гений но злодейство ӵош уз луэ! Ачиз тодоз мар карыны. Со куриз, мон лэсьтӥ. Ваньмыз татын ништяк. Кылемзэ мон уг тодӥськы. В натуре. ЭБРАЙ (аслыз ачиз). Кылзэс чебер тэшкылляло, китай философъѐс… (Золгес куараен). Майтал, кема-а тон отын тунаськыса сылод? МАЙТАЛ. Пырисько, пырисько ни! (Бомжъѐслы.) Я, чус кариське. Пигонды но медаз вырӟылы. (Шуак мунчое пыре). Тани, Эбрай, туж юн гозы. Буртчинлэсь пунэмын. ЭБРАЙ. Зырад-а майталэн? МАЙТАЛ. Зырай. ЭБРАЙ. Табере кортӵогме но вай татчы… МАЙТАЛ (куаляк усьыса). Кыӵе кортӵогдэс?.. ЭБРАЙ. Квадратной кортӵогме. МАЙТАЛ. Тае-а мар-а? (Паллян кисыысьтыз поттэ.) Вождэ эн вай, Эбрай. Ну, дышемын киы, уг быгатскы йылсо арберитэк… Кортэз туж юн та кортӵоглэн, пурт лэсьтоно кадь ик, в натуре… Зонаын таӵе кортӵог понна… У-у-у… Вань пиньѐсме зарни мон карысал… (Сѐтэ). ЭБРАЙ. Янгышаськод, та кортӵогед вань зонадэ адлы пӧрмытысал. Мынам ведӥн песятае юри сое та нуналлы кельтӥз.

МАЙТАЛ. Ӧйгес вала, Эбрай… ЭБРАЙ. Та кортӵоглэн лулыз, пе, вань. Со, пе, энергиез кыскись вампир. Шонер вера ке эмиссар… МАЙТАЛ (серекъя). Кыӵе-о комиссар?.. Ну, тон, Эбрай, в натуре… ЭБРАЙ. Эскеремед потэ-а мар-а? МАЙТАЛ. Комиссаръѐс, коммунистъѐс но ведӥнъѐс — со выжыкыл. Мон выжыкылъѐслы уг оскиськы, Эбрай. ЭБРАЙ. Мон но солы ӧй оскылы, Майтал. Ярам, иське, вера мыным, кинъѐс отын пуко — мунчо сарачаын? МАЙТАЛ. Серекъяськод-а? ЭБРАЙ. Мон серьѐзно юасько. МАЙТАЛ. Мон кадь ик окты-калты бомжъѐс. Мон соослэн шишкарьзы. Атаманзы... Ну, ачид тодӥськод, мынам пельпум сьӧрам кыкез университет. Кык пол срокме пуки. Звонокысен звонок дорозь… ЭБРАЙ. Ярам, бен, вера тон мыным, иське, профессор, тани тон кызьы малпаськод, нош татчы, асьме доры, соос ӧтьытэк пырыны дӥсьтозы-а? МАЙТАЛ. Тынад кабинетад, вылаз ик мон татын дыръя кин-о дӥсьтоз, в натуре? Тон соослы андан кадь ик закон. ЭБРАЙ. Тон оскиськод верам кылъѐсыдлы? МАЙТАЛ. Даур мон эрикез уг адӟы. ЭБРАЙ. Мар, бен, эскером, иське. (Кортӵогзэ кияз шона). Эй, эмиссар! Мар кароно соин? КУАРА. Бышкалты ӟус вылад. МАЙТАЛ. Кинлы тон озьы? Тон мар, Эбрай? ЭБРАЙ. Верам кылдэ эскерисько. МАЙТАЛ (инме учкыса). Хе-хе… Но ведь вазиз кин ке, оло, пелям-а кылӥське?.. Эбрай кортӵогзэ ӟус вылэ бышкалтэ. Соку ик мунчоын югак луэ. Бомжъѐсын мар ке луэ кадь. Соос интыязы кынмо. Телевизор ачиз ик лэзиське. Отын выборъѐс сярысь, президент сярысь верасько. (Татчы

луоз пуктыны котькудзэ удмурт иворъѐсты). Мучоло наушникъѐссэ сэрпалтэ но мунчое пыре. Шонерак кортӵог доры вамыштэ. МУЧОЛО (кортӵог шоры учкыса). Концерт пумысен вераськемын, сэр, калык тачак луоз. Партие но заявлениос гожъяны чакламын. Мон малпасько, партие гожтӥськытэк кылисез уз луы. МАЙТАЛ. Мучоло, кин тонэ татчы ӧтиз, бӧтьыртӥськод? Кыӵе концерт, кыӵе-о партия?

тон

мар

озьы

МУЧОЛО. Остэ, инмаре! (Тапочкизэ куштэ но Майталлэн йыраз васькытэ.) Кызьы монэ шуид? Мон — «мучоло»? Мон министр, культурая министр! (Нош ик тапочкиеныз васькытэ). Валад, быдла! МАЙТАЛ. Мон — быдла? Мучоло, тынад мар, шарикъѐсыд-а воштӥськизы? МУЧОЛО (Нош ик тапочкиеныз васькытэ) Мар, нош ик «мучоло»?! Остэ, инмаре! Полиция! Полиция! Полиция! (Полиция кылэз кылыса Майтал куалектэ). Кортӵог полицейской сирена кадь пиштылыны кутске. Котыр ласянь кылӥсько сиренаос, полицейской шуланъѐслэн куараоссы. Телевизорын но полицейской машинаос ветло. Майтал кытчы пырон инты уг шедьты. Бызьыса пыре Жуг-Жаг. ЖУГ-ЖАГ. Мар луиз? Кин кинэ жуге? Кин полициез ӧтиз? (Кортӵоглы) Тани мынам жетонэ… МУЧОЛО. Остэ, зол ужаськод, КГБ. Тон учкы ай, тани та быдла... Со монэ «мучоло» шуэ, монэ министрез, тон кылӥськод-а? МАЙТАЛ. Мучоло, тырмоз, тӥ мар, в натуре? МУЧОЛО. Тӥни нош ик, кылӥд-а? ЖУГ-ЖАГ (югдурез валаса). Та бомжара тонэ «мучоло» шуэ?! МАЙТАЛ. Жуг-Жаг, Жуг-Жаг! Мар тынад но-а быжокейѐсыд бызьылыны кутскизы?! Кылъѐстэ малпаса (Чиньыоссэ выретыса со доры матэктэ).

поттылы,

кече-пеле!

ЖУГ-ЖАГ. О, таракан! Монэ полицилэсь министрзэ — «жуг-жаг», пе (кымесаз чабке)! МАЙТАЛ. О-пля! Тӥ мар, шавалдаос, кувалда веръямды потэ? (Вожомыса Жуг-Жаг доры вамыштэ но гадьтӥз сое кырме). ЖУГ-ЖАГ. Кия! Кия! Кия! (Кык киыныз кык пеляз васькытэ, собере кӧтаз пыдесыныз ӵыже, собере кымес шораз сѐтэ но пезьдытэ.) Да мон тонэ, да мон тонэ Коломаын сисьто! Эй, адямиос, луэлэ свидетель! Кортӵог нош ик сирена кадь ӝуатскылэ. Котыр ласянь кылӥсько куараез будэтӥсь динамикъѐс: «Адямиос, луэлэ свидетель! Адямиос, луэлэ свидетель! Адямиос, луэлэ свидетель!» Мунчо сарачаын но югдылэ. Отын мыдлань-азьлань бызьыло. Собере мунчое пыро Копар, Таз, Сэрегпум. МУЧОЛО (ӝутскем мылкыдын). О-о, быдэс правительство татын! Тӥ учке ай, эшъѐс, тани кыӵе ке быдла кылзэ татын милям кымесамы шере! Монэ со «мучоло» шуэ, КГБ-ез —«жуг-жаг». Тӥ вералэ ай, кытысь со потӥз? Кин со сыӵе? МАЙТАЛ (аслыз ачиз оскытэкгес). Мон возьмато ай, мон возьмато тӥлед кинме. О-о-о-о, ну, чида, Жуг-Жаг! Копар! (Ваньзы паймытскыса «о-о» кесько). Таз! (нош ик ваньзы ӵош паймем куаразэс потто). Сэрегпум! (Нош ик ваньзы ӵош паймытско). Тӥ мар? Тӥ мар? Баламба тыремме возьмаськоды? Вунэтӥды кытысь мон тӥледды поттӥ? Вунэтӥды кытын кӧламъѐстэс? Параша сиемдэс? Яраосты-а бурмизы? Пыктэмъѐсты-а ортчизы? МУЧОЛО. Остэ, инмаре, ма, со юри асьмеды серем каре ук! (ЖугЖаглы) Пытса, пытса тон сое Соловкие сисьмытозяз! Кылӥд-а уксѐосъя министрез но со «таз» шуиз, дышетсконъя министрез — «копар», нош судьямес-прокурормес — «сэрегпум». МАЙТАЛ. Тӥ мар-о, в натуре. Да, мон тӥледды! Тодӥськоды-а мар каро! (Ваньзы ӵош паймытскыса лулӟо. Вань вераськонъѐслы тылъѐсыныз реагировать карись кортӵог ӟырданы кутске).

ЖУГ-ЖАГ (нош ик кымесаз васькытэ). Эй, вотяра, тынад сяртчыед-а мар-а шуяз?! (Майталлэсь кизэ позыртэ). Да, мон тонэ тараканэз кадь пачкато! (Ваньзы Жуг-Жаглы юрттыны кутско). МАЙТАЛ. О, чидалэ, чинарикъѐс, мон ваньдэсты параша нуллыто! А-А-А! Ой-ой-ой, вӧсь луэ ук! КОНГЫРЧО (ӧс выжыысен). Мар-о татын, Эбрай, мынэ? ЭБРАЙ. Тон валаны кулэ кадь, Конгырчо. Тон кылбурчи, соин, шӧдске, тонэ уг иса та кортӵог. Татын мынэ концерт. Удмурт спектакль. Тӥни Майтал — ачиз удмурт калык. Нош со вылын Империя Правительство. О-о… КОНГЫРЧО (туж паймыса). Зэм шу? Таиз удмурт калык, соиз Империя Правительство. Нош мар-о со Правительство каре? ЭБРАЙ. Вирзэ калыкезлэсь сюпсе. КОНГЫРЧО (блокнотаз гожъяса). О-о. Вот таиз зол сюжет! Правительство вирзэ калыкезлэсь сюпсе… Майталэз олокызьы но позыръяло. Соиз но, таосыз но кесяськыло. Майтал олокызьы но вольтчылэ, сое нош ик кырмыло, нош ик кесяськытыло. ЭБРАЙ. Я, мар, Майтал, кызьы отын Империя улын? Оскалтыса вуттӥд-а ни выжыкылдэ? МАЙТАЛ. Мозмыты, Эбрай, ишкалты со кортӵогдэ! Мон оскисько тынад инмаредлы, коть комиссар, коть коммунист соид медло — мыным али дуно потэ улон! ЭБРАЙ. Адӟид-а, Конгырчо, Империя улын рифма но ӝог кылдэ. Эбрай кортӵогзэ ишкалтэ но кисыяз понэ. Тыл кысэ. Мунчо гурысь гинэ югыт адӟиське. Ваньзы интыосазы кынмо. Синъѐссы ваньзылэн кышкамесь. Мае ке шӧдыса кадь зӥрк-зӥрк учкыло. Майтал мозмиське но Эбрай вӧзы султэ. Киосыз солэн куалекъяло.

МАЙТАЛ (кӧт гогызэ кык киыныз ик пачкатыса). Эбрай, мар-о монэн луиз… Мынэсьтым вань лул кужымме сиизы. Мынам кӧтгогыям кин ке но ӵабъяське кадь. МУЧОЛО. Мынам но озьы ик… ЖУГ-ЖАГ. Мынам но… ТАЗ. Мынам но… КОПАР. Мынам но… СЭРЕГПУМ. Мынам но… КОНГЫРЧО. Мынам но… ЭБРАЙ. Мынам аслам но, эшъѐс, аслам но… Вот, маиз зэм, соиз ни зэм… Бадӟым вис. Кытын ке уйсыос кесясько, бурдъѐслэн лопыръяськемзы кылӥське. Коӵышъѐс кесясько. Кион вузэ. МУЧОЛО (Конгырчоез китӥз кутэ). Кошким, пие, татысь. Татын мар ке нечистой дух ветлэ… (Вӧсяське.) Кошким черке… КОНГЫРЧО. Ӵужапай, отын педлон кионъѐс

вузо,

уйсыос

кесясько… МУЧОЛО. Нош татын пие эшшо но кышкытгес, кошким, шуисько. (Мунчоысь пото, сарачатӥ ортчыса, кытчы ке пеймытэ ышо). ТАЗ. Мон но, пожалуй, кошко та мунчоысь. (Потыны турттэ). Черкын, котьма ке но, оскон но юнмагес… КОПАР. Таз, ми но тон сьӧры… МАЙТАЛ (соос азе султыса). Сылэ ай, берен ӧз берытске ке, ваньмы ӵош кошкомы… Тӥ адӟиськоды-а, кыӵе шимес отын… Кыӵе ке квадратъѐс, тӧдьы шаръѐс ветло… ЖУГ-ЖАГ. Мон но адӟисько… Борддор пыр адӟисько… Мар та монэн?.. КОПАР. Эн кесяськы, Жуг-Жаг… Ми но тон кадь ик адӟиськом… СЭРЕГПУМ. Хе-хе-хе… кызьы талы оскод? Уйвӧт ук та, уйвӧт?… Кызьы борддор пыртӥ адӟод?..

Сцена сьӧрын кесяськем куараос кылӥсько. Собере, Мучолоез мырдэм пыд йылаз возьыса, мунчо ӧсэз усьтэ Конгырчо. Мучоло катьтэммыса ӧс выжые пуксе. Конгырчо мольк-мольк учкылэ. МАЙТАЛ. Мар луиз? КОНГЫРЧО. Отын кезьыт но пеймыт. Инбам но, музъем но уг адскы. Олокыӵе вужеръѐс кӧт борды кокасько, пель сьӧрын кесясько. Кезьыт киосынызы кӧтэз кырмало. Вань омыр токен шуккылэ кадь. Отын сыӵе шимес. МУЧОЛО. Отын дунне бырон. Инмар понна, дунне бырон отын. МАЙТАЛ. Сюлмы шӧдэ, соос уг пӧясько. Эбрай, оло нош валэктод, марлы кӧтгогые токен кадь шуккылэ?.. СЭРЕГПУМ. Ӧвӧл, эшъѐс, эн оскелэ, та огшоры уйвӧт… МАЙТАЛ. Чалмы, Сэрегпум. ЭБРАЙ. Зэмзэ ке, мон ачим но ай та тодмотэм выль дуннеын номыр уг валаськы … Огзэ гинэ мон тодӥсько, тӥ табере шӧдӥськоды, адӟиськоды вань дунне кужымъѐсты. Нош мукет паласен дунне кужымъѐс но табере тӥледды шӧдо. Тӥ эрикоесь луиды. Табере тӥ асьтэос быръѐды ни асьтэлэсь сюресъѐстэс… Мукет сямен ке верано, тӥ табере ведӥнъѐс но магъѐс… (Бадӟым вис). КУАРА. Абсолютно шонер. Туж ӟеч тон валэктӥд, Эбрай!. Табере мынам черодэ. Ваньзы куалекто. Крезьгур кутске. Кыдѐкысь нылпи куараос кылӥсько: — Анай, мар та таӵе? — Нош соиз мар? — Бубыли, бубыли, вай киям мон тонэ куто. — Хе-хе-хе-хе. — Шундые, пот, пот, мон тыныд чечыен нянь сѐто… — Бабыля… бабыля… бабыля… — Нош милям кучамы вань, вот. — Нош милям, нош милям, а милям, вот…

— Нош милям ыжпимы вордӥськиз… — Нош мон бадӟым будӥ ке… Мон со шур сьӧры но потыны быгато… — Нош шур сьӧры уг яра… Отын йыртэм чуньы вань… — А мон бадӟым будӥ ке… Мон со шур сьӧры ачим пото… Отын сыӵе сяськаос будо… Та куараосты кылзыса ваньзы синвуасько… ЭБРАЙ. Тырмоз, эшъѐс, буйгатске, выдэ, изе, ӵуказеозь тӥледды нокин но уз иса. Кылме мон сѐтӥсько. МАЙТАЛ. Изиськом, Эбрай, изиськом. Ойдо, эшъѐс, кошким, кошким, кошким… Ваньзы сарачае пото но выдо. Чусак умме усѐ. Эбрай ӟенеликсэ пуктэ но гозызэ кутылэ. ЭБРАЙ. Мар тон соосын карид, шайтан? КУАРА. Эрик мон соослы кузьмай. ЭБРАЙ. Жаль потыны кутско соос мыным… КУАРА. Ӧвӧл тон жаляны кулэ. ЭБРАЙ. Но соос сыӵе лябесь на ай, пичи нуны кадесь… КУАРА. Озьы ик луыны кулэ. Табере соос эрикоесь. ЭБРАЙ. Вот законъѐс та дуннеын. Нош мон? КУАРА. Тон эрико ӧвӧл ай. Тынад ай вань Принцессаед но Эбекед. ЭБРАЙ. Принцессае но Эбеке? Нош таосыз кинъѐс? КУАРА. Музаосыд тынад. ЭБРАЙ. Мар, таосыз но улэпесь? Вылаз ик кык соос? КУАРА. Юнме тон быдтӥськод дырдэ. Ӝоген вуоз ӵукна акшан, кошким писпу улэ. Таозызлэсь мозмиськыны гозы-кыӵес тыныд кулэ. ЭБРАЙ. Кытчы тон нуиськод монэ, мон уг тодӥськы, но вань отын мар ке но кыскисез. Ярам, кошким, ӧвӧл ук быръѐнэ мынам. (Гозызэ пельпумаз оше но Библиез усьтыса лыдӟе). Ӧпкелелэ, матэктэ инлэн эксэйлыкез. Дасялэ ин уромлы сюрес. Шонер сюрес тӥ дасялэ солы…

Хе-хе-хе… Библия но туннэ мыным шонер сюрес сярысь вера. Мыным та кельшыны ини кутске. (Кошке). Пеймыта.

КЫКЕТӤ СУРЕД Тѐм-тѐм пеймыт уй. Олокытысь инбамысь ваське югдӥсь гозы кыӵес. Туж аспӧртэм гозы со, гад… Шайтанлэсь но визьмо, вылды… Вераськыны но быгатэ… Но кылзэ, сволочь, уг поттылы – «ӧвӧл» но «о-о» гинэ шуылэ, «йырзэ» шонаса. Улэп-а со, ӧвӧл-а, созэ нокин но асьмелы уз вера. Эбрайлы гинэ куке-соку со усьтӥськем ни, лэся,– «Метафора» шуэм, шӧдске, ассэ. Сямаз но сокем ик сволочноез уг адӟиськы. Эбраез, шӧдске, туж гажа, соин вераськыкуз, ымдуръѐссэ кырыжак карыса пальыштылэ. Гозы кыӵес туж ненег пальыштэ. Э б р а й л э н к у а р а е з. Эн пальыша озьы. Уггес кельшы мыным тынад пиньтэм пальышанэд… Гозы кыӵес дугдэ пальышамысь. Э б р а й л э н к у а р а ез. Чебер ик тон, шайтан тонэ басьтон… Юнме шат «Гондырлэн валэз» тонэ шуо вал валлянъѐс… Гозы кыӵес нош ик пальыштэ. Э б р а й л э н к у а р а е з. Васькоз-а тон пыртӥ со – Святой Дух? Сѐтоз-а кужымзэ мыным ведӥн Гондыр?.. Гозы кыӵес уллань-выллань ӟечырске. Э б р а й л э н к у а р а е з. Но марлы одно ик туннэ? Нош ӵуказе уг луы шат? Гозы кыӵес солань-талань шонаське. Э б р а й л э н к у а р а е з. Иське, туннэ… Иське, тырмоз ни, шуиськод… Кыскалтоно ни ке, кыскалтоно, иське… Гозы кыӵес уллань-выллань ӟечырске. Э б р а й л э н к у а р а е з. Но асьмеос вераськимы: обряд гинэ ортчытӥськом, ньӧмыз понна гинэ тазьы выриськомы… Со синазькыль ведӥнъѐслэсь, музаослэсь мозмон понна… Гозы кыӵес уллань-выллань ӟечырске. Э б р а й л э н к у а р а е з. Ярам. Туннэ ни ке туннэ, иське, медло.

Гозы кыӵес нош ик пальышаны кутске. Эбрай султэ. Татӥ ик кылле вылэм со. ЭБРАЙ. Я, я, эн пальыша, тырмоз. Трагедиез шудӥсь артист тусъем тон луыны кулэ. Сотэк кин-о тыныд оскоз? Всѐ кутскиськом! Лэзь мынэсьтым вань верамме отчы инме но музъеме. Кыре мед потозы со кужымъѐс. КУАРА. Уно вераськиськод. Ӝоггес султы пуклѐ вылад. Ӵукна акшан вуиз ини. ЭБРАЙ. О, албасты, вераськисьтэм дыръяд тон мусогес вал ук. Бен, Один ошиськиз дунне писпу борды, укмыс нунал ошиськыса улӥз, нош собере выльысь улӟиз, вылаз ик рунаос солы усьтӥськизы, со маг луиз. Мар Одинлы луоз, со инмарзы вал ас-гондыръѐслэн. Нош мон так огшоры Эбрай. Оло ни мон но Ас? (Пуклѐ вылэ султэ). КУАРА. Кылдэ эн быдты, пон кыӵестэ кытчы кулэ отчы. ЭБРАЙ (кыӵессэ чыртыяз донге). Понӥ. КУАРА. Табере вера кылъѐстэ ӝоггес но чальтчы отысь. ЭБРАЙ (Эбрай вераськыку гозы неон тылъѐсын ӝуатске.) О, инбаме, о, дуннее мынам! Мынам тазьы инме ӝутскеменым Бадӟым шурлэн но кожъѐсыз воштӥськозы – Мукет сямен ӝутӥськозы ву тулкымъѐс, Бусъѐс мукет сямен бугырскозы, тӧлъѐс, Дунне черсэз мыдлань позыртыса, Выль крезьгуро бугоръѐсты сэрттылозы. Кин-о тодэ, туннэ байлыкоез, оло, Ӵуказеяз ни кураськись луоз. Солэн Ляльчиосыз ик, оло нош, шӧдтэк шорысь Шуак узырмыса, эшшо но лек, эшшо но сьӧсь Сюлооссэс но серметсэс кырмалтозы. Йырвандӥсез луоз святой, нош святоез, Оло, виресь тӥрзэ уз кушты киысьтыз.

Мон адӟисько, мон шӧдӥсько сое, Дунне ӧвӧл ке но шудон калейдоскоп, Ваньмыз татын отын кадь воштӥськоз. Но мон уг быгаты отчы йӧттӥськытэк – Уг лу мынам туннэ мукет сямен. Бен, мед монэ сьӧлыкоос пӧлы Адлэн пытсаз бӧрысь сэрпалтозы. Но мон нырысь кушто та улонлэсь дыжзэ. Мед усѐзы юрӟым лулоослэн Ымныръѐссы сьӧрысь ымныръѐссы! Ваньзы, ваньзы та дуннеын мед адӟозы Ог-огзылэсь зэмос ымныръѐссэс! (Гозы кыӵессэ чыртыысьтыз поттыса, пуклѐ вылысь тэтче. Куаразэ воштыса но гозы кыӵес шоры учкыса). Я, мар? Умой-а вераськи? Тылзэс мон ӝуатӥ-а, малпаськод? (Гозы кыӵес пальыштэ). Я, я, эн пальыша! Трагедиез тон шудӥськод! Тӥни ваське ни кадь огез. Нимыз солэн, шӧдске, Принцесса. Нош мукетыз ӝоген музъем улысь потоз. Созэ «Эбек» шуо, вылды. Адӟид-а, усьтӥське ни куинетӥ синмы мынам. Сѐтӥз, шӧдске, ведӥн ГондырОшед мыным кужым. Ярам, кошки мон вузыны. Адӟод, кызьы мон вузыны быгатӥсько! Кошке. Гозы кыӵес серьѐзной кариське. Сцена пумын адӟиськись кыз йылъѐс вылтӥ лобыса ваське Принцесса. Со туж чебер нылаш. ПРИНЦЕССА (Кыӵес шоры учкыса, куалектэм куараен). Кинлы лэсьтӥз со Одинлэсь валзэ? Малы пуклѐ пуктӥз солэн улаз? Мар со каре? Мар со малпаз?

Гозы кыӵес пичи пальыштэ но шуак серьѐзной кариське. Эбрай вузыса лэзе. Принцесса куалектэ. Гозы кыӵес нош ик пичи пальыштэ но шуак серьѐзной кариське. Кытысь ке музъем улысь потэ Эбек. Со но Принцесса кадь ик чебер нылаш, только дӥсяськемын туала модая.

ЭБЕК Хе-хе, Кагаз вылэ сое со суредаз, Адреналин, дыр, со аслыз кыске. Гозы кыӵес шоры учке. Котыр ласянь сое эскере. Гозы кыӵес пичи пальыштэ но шуак серьѐзно кариське. Эбек куалектыса палэнске. Синъѐсызлы оскытэк гозы шоры учкылэ на. Малы ай та милям Принцессамы Вылӥлыко, чебер дуннеысьтыз Та сьӧлыко сумбрес музъем вылэ Васькиз? Гозы кыӵес пичи пальыштэ но шуак серьѐзной кариське. ПРИНЦЕССА Кош син азьысь, юрӟым эбек. Кытысь ке тӧл потэ, Эбекез пелляны кутске. ЭБЕК (Тӧллы пумит сылыса.) О, инбамъѐс! Вылӥлыко дунне! Кылӥськоды-а тӥ Принцессадэс, Кудӥз мыным, аслаз сузэрезлы, Ноку-ноку ӧз вера урод кыл?

Кудӥз монэ умоезлы гинэ Дышетылӥз? Тӧл лябоме. ПРИНЦЕССА Кош, тяпылес комок, Мыным тон синазькыль! Нош ик тӧл потэ. ЭБЕК О, Инбамъѐс! Кытысь бальзам та кисьтӥське мыным? Мар кариды тӥ, инбамъѐс, апаеным? Нош ик тӧл чусоме. ПРИНЦЕССА Эн бичаты лек пилемлэсь вожпотонзэ, Эн витьы ку солэн гудыртонэз Ӵашъѐн тылзэ сюлмад ыстоз! ЭБЕК Ох, ох!… Ӵашйид ни тон озьы Эбрай вылэ. Куашкатыны уно шат визь кулэ… Синучконлы мон берыктӥ вал Эбрайлэсь Тынад юрттэмедъя чырсам визьзэ. Нош тон сое выльысь векчи пилетъѐслы Тэшкатыса кельтӥд. И – мар тон малпаськод? Али солэн йыраз вить-куать пумо малпан Одӥг дыре вордске но одӥгез но кисьмаса

Уг вуы пумозяз радъяськыны. Нош мон дыръя со чилекъя вал визьмыныз! Гозы кыӵес пичи пальыштэ. ПРИНЦЕССА Чилекъяны… озьы ке луысал… Туж мур шоканы кутске. Солэн шокамезъя но киосыз выремезъя тӧлъѐс вырӟыло, инбамын чилектэ, гудыртэ. Гозы кыӵес шуак серьѐзной кариське. Пыкмем тыос вӧзысь эбекъѐслы Кваккетыны кутскиз со тонэныд ! Кылӥське Эбрайлэн вузэмез. Принцессаен Эбек шуак луыса кылзӥсько. Гозы кыӵес пичи пальыштэ но шуак серьѐзной кариське. Тӥни ужед кисьма ни бусыяд. Быдэс толэзь уг сазьтӥськы ни со! Эбрай мукет паласен потэ но сусыпуос улэ ватӥське. ЭБЕК Нош кин понна кутскиз со вузыны? Кин-о солэн бурмись яра вылаз Выльысь гижыоссэ мертчытыса кельтӥз? Куштӥд ни тон сое огпол, тырмоз, Эн люкеты ни табере мыным! ПРИНЦЕССА Вордскем дырысеныз мон ноку но сое Ӧй кушты на.

ЭБЕК Эшшо кызьы куштӥд! Кучапиез кадь сэрпалтӥд кезьыт шурлэн Шимес бугыръяськись тулкымъѐсаз! ПРИНЦЕССА Озьы вал Эбрайлы соку кулэ. Шуак лыктэм данлэсь поромыса, Ассэ инмар со карыны кутскиз! Нош тон сое гинэ, шӧдске, возьмад, Шуак сое кыскид зынмем тыад. ЭБЕК Кыӵе-о тон камена, кыӵе муза тон? Мар умойзэ сетӥд тон Эбрайлы? Тонэн ӵош улыкуз сурон сапегъѐсын, Куфайкаен ветлэ вал со, шароварен. Нош мон дыръя со смокинген ветлӥз. Мерседесэн. Пачкаосын-пачкаосын Кисыосаз уксѐ нуллӥз. Улон юртэз Ньыль этажен но фонтанэн ни вал солэн. Нош тон выльысь вуид но ваньзэ со келяз. Со табере кыӵе ке мунчоын. Кыӵе ке бомжъѐсын улэ. Ӧвӧл, визьмад ни тон сое, тырмоз. Монэ гинэ со табере возьма! Мон музаез ни табере солэн! Мынам дыры ӝужа та инбамын – Монэ принцессае поттэ ини вакыт! ПРИНЦЕССА Нош мон ке малпасько, малы сыӵе югыт?..

Тӥни вылэм – вакытэдлэн пумыз Вань дуннелы озьы пиштэ. Кыӵес шоры возьматэ. Гозы кыӵес пичи пальыштэ но шуак серьѐзной кариське. Эбрай мыжыксэ солы возьматэ. ЭБЕК Мыным ӧвӧл, тыныд со ошемын! ПРИНЦЕССА Ӧвӧл, юнме шорысь Эбек со нимамтэ Тонэ – атай… Шонер со мертаськем. ЭБЕК Атай? О, кыӵе зӧк авторитет со мон понна! Коть воргорон кадь луысал ке ай, Кыӵе-о со атай, со копак кышномурт кадь ук. Юнме шорысь-а Обыда сое шуо? Тон анайлэсь тани адӟем коть кары вал. Со котьку но ассэ воргоронлэсь но зол возе. Малы ке шуоно йырвизьмызлэсь со кылзӥське, Атай нош сюлмызлэсь, мылкыдызлэсь. ПРИНЦЕССА Сюлэм вӧзтӥ уг луы ортчыны, Нош визь вӧзтӥ котьку капчи ортчо! Соин атай — эксэй, анай нош — зэк. Кош, палэнскы Эбрай дорысь, Эбек, Уг пот ке луэмед зэмос бака. ЭБЕК Ма, веднаськы: бака луи ке, мед луом бака — Ачид нош кинлы тон соку берыктӥськод? Бодыедлэн кык пумъѐсыз уга...

Лѐго-лѐго луоз вань ымнырыд, Кияр быдӟа луоз, вылды, нырыд… Ачид мын кошкы сюлмыныд валче! Уг сѐты мон сое табре тыныд! Кытын ай со вузэ вал, мусое, Мыно ай, утчало сое… Эбек кошке. ПРИНЦЕССА О, Инбамъѐс! Адӟиськоды, ӧвӧл ни быръѐнэ мынам. Тани шуккиз со дыр, кудӥз понна Улэ лэзиськоно мон луисько. Бен, мед луо мон кӧшкемыт но шуш, Но берыкто сое мон бакалы. Пеймыт луэ. Кесяськыны кутско коӵышъѐс, уйсыос, шуралиос но пӧртэм ишанъѐс. Адӟиськыло веднаськись вужеръѐс: огез бака кадь тэтчаны кутске, мукетызлэн нырыз бадӟыма. Кӧшкемыт тӧл пелля. Отчы-татчы шоналляське кыӵес. Собере ваньмыз чуска. Эбрай ватскем интыысьтыз султэ. ЭБРАЙ. Ну, ведӥнъѐс! Кылзэс кыӵе тэшкылляло! Нош синъѐссы кыӵе ворекъяло! Вань дуннеез сайкатӥзы! Ма, нѐжто музаосы вал соос мынам? Огез Эбек, нош мукетыз Принцесса… Тӥни малы, иське, попса но классика куспын мон тэльмыри. Тӥни малы йырме борддоръѐсы кокай… Эй, эмиссар, кытын-о тон? (Гозы кыӵес пальыштэ). Тырмоз ни мунѐен кадь шудыны со гозыен. Тон малпаськод, пӧрмиз маке но со? КУАРА. Созэ ачид тон тодыны кулэ. Капчи-а тон пушкын луиз? ЭБРАЙ. Капчи?! Ӧвӧл, секыт, секыт мыным луиз, кышкыт! Монэ мар ке котыр ласянь нюртэ! КУАРА. Иське, пӧрмиз. Тодмотэмлык тонэ озьы нюртэ. Но тон ӝоген солы дышод.

ЭБРАЙ. Кыӵе тодмотэмлык? Тон мар сярысь? КУАРА. Музаосыд тонэ тодмо сюресъѐсы гинэ кыскаллязы, тодмотэмзэ ӧз лэзе тон доры. Тон соослэн дуннеязы улӥд. Нош табере тон мозмиськид тодмоезлэсь, тодмотэмез ни котыртэ тонэ. Али тынад азяд зэмос дунне. ЭБРАЙ. Мынам пушкам укыр шыпыт, укыр сайкыт кылиз. Таӵеезлы мон дышемын ӧвӧл. Лулы созэ ик, азьлозэ куре… КУАРА. Лулыд уг кур, йырыд но сюлэмыд сое куро. Тынад йырыд но сюлэмыд пичи дырысеныд тодмо дунне борды думылэмын. Соин ик кышкало соос тодмотэмаз вамыштыны. Тодмотэмаз кылѐн понна табере тыныд йырдэ но сюлэмдэ мозмытоно. ЭБРАЙ. Та малпанэз кылӥ ни мон куке. «Зэмос ожгарчиос ож бусые йыртэк но сюлэмтэк пото», — озьы мыным шуиз ведӥн песятае. Йыртэк но сюлэмтэк кылем мугор, ачиз тодэ ни, пе, мар карыны. Солы, пе, усьтӥське куатетӥез шӧдон. Ярам, соглаш, йыр ке йыр, пыд ке пыд, уг поты ни мынам берытскеме тодмо сюресъѐсам. Вера, кызьы йырме но сюлэмме мозмытоно? КУАРА. Обряд ортчытоно. Гозы кыӵесэныд… ЭБРАЙ. Иське, нош ик та Один-Гондырлэн тямыс пыдо валэз борды чыртыеным йӧттӥськоно?.. КУАРА. Абсолютно шонер. ЭБРАЙ. Валай. Ярам, абсолютно ке ни со шонер, мон кутскисько. Эбрай тэтче пуклѐ вылэ, йырзэ кыӵесэ донге но вань мылкыдзэ поныса вераны кутске. ЭБРАЙ Эй, Святой Дух, я, васькы ни, мон дась, Герӟа монэ Инмысь Атаеным! Коть Один со медло, коть пӧйшурась, А коть Гондыр, коть Ош, коть ожгарчи, А коть ведӥн но Ас, коть сюанчи, Тырмоз мыным, медам ни лу курдась, Пери кужым табре кулэ мыным!

Эбрай вань кужмысьтыз гозыез кыске. Гозыез солэн югак-югак чилектэ. Эбрай воштӥське. Пальпотыны кутске. Со котыре пилемъѐс васько. Монэ котьку ӧтиз тодмотэмез, Но мон визьтэм луонэлэсь кышкай. Нош тодмоез уг гажа ке визьме, Солэн пумаз монэ возьма ке шай, Малы мон думыны кулэ асме, Солы кузьмалляса кылбуръѐсме? Ӧвӧл, тырмоз, я ну монэ, Атай, Аслад та Нагалят дунне вылтӥд, Кытын мыным кулэ уз луы шай, Кытын мыным кулэ уз луы визь, Кытын мыным кулэ уз лу сюлэм, Кытын мугор ноку-ноку уз изь, Кытын ваньмыз пумтэмлыко улэ! Кытын ваньмыз тыныд усьтӥськемын — А коть вамышъяса инбамъѐстӥ тон мын! Пуклѐысьтыз васькыса кошке. Гозы кыӵес со сьӧры омыртӥ кыстӥськыса мынэ. Эбрай гозы кыӵессэ кусказ вуытозь лэзе но, сцена пумысь инвис вылтӥ вамышъяса, инбаме тубыса кошке. Тӧдьы пилемъѐс пӧлы инбамысь усѐ Обыда но Йыркобы. Обыда – чебер воргорон. Йыркобы пиосмурт тусъемгес кышномурт, вылды. Ымныраз солэн лыз пуксемъѐс, кымесаз лѐгъѐс. ОБЫДА (Йыркобыез адӟытэк, палэнэ.) Ох, кыӵе зол ӵыжиз… Кытысь-о со Сыӵе бадӟым ӵашъѐн кужым шедьтӥз? Пегӟиз, мозмиз, пилиз ачамазэ*,

Тэльбугоме ик тӥяса кошкиз. Кыӵе сюлэм эксэй мон табере? ЙЫРКОБЫ (Обыдаез адӟытэк, палэнэ.) Мозмиз, карась музэн киысь мозмиз… Кызьы-о йырвизьлэсь озьы пегӟод? Ох, кыӵе синъѐсме со мальдытӥз, Тылын кадь сутыса монэ кельтӥз… Кыӵе мон Йыркузѐ табре луо, Йырам ке пелляны кутскиз луо?.. Йыркобыен Обыдаос ог-огзэсты адӟо но шузи пальышаны кутско. ОБЫДА О, Паньгие, ӟечбур! ЙЫРКОБЫ О, Обыда! Ӟечбур, мусо картэ! Кыӵе кема Ӧй адӟы вал ни йӧн-йӧн ымнырдэ! ОБЫДА Ачим но вунэтӥ ини тустэ. Ох, кыскалтӥз таид, ох, кыскалтӥз! ЙЫРКОБЫ Ӧз кыскалты, тон шу ни вал: «Ӵыжиз!» Тон туп сямен сюлэмысьтыз пештӥд… ОБЫДА Ачид кызьы кымесысьтыз тэтчид! Шӧдске, тӥяз со вань герӟетъѐстэ?..

ЙЫРКОБЫ Тон но лэзид, шӧдске, тэльбугодэ?.. ОБЫДА Тӥяз, мозмиз, мар бен карод табре?.. Принцессаме но со кулэ уг кар… Ваньмыз тынад йырыд понна, Паньги. Тон Эбектэ Эбрай доры ыстӥд, Принцессалэсь сое талан понна! ЙЫРКОБЫ Ӧвӧл татын номыр умойтэмез, Соос одӥг кадесь Эбрай азьын! ОБЫДА Ноку ӧй вал соос одӥг кадесь. Мынам нылы сое кыре поттӥз, Нош тынадэз дасьсэ гинэ возьма Та дуннеысь! ЙЫРКОБЫ Со визьмогес уга Тынадэзлэсь! Ӧвӧл та дуннеын Кулэтэмез: дуринчиос но вань, Мушъѐс но вань – Аслаз Кылдытӥсьлэн Озьы, шӧдске, потӥз кылдытэмез. Созэ гинэ кыле на учкыны, Кудзы-о кужмогес?.. ОБЫДА Уз лу тӥляд! Эбрай ноку уз данъя йырвизез!

ЙЫРКОБЫ Сялӟиз ни со эксэйлыкед вылэ, Адӟом, кинэ со данъяны кутскоз… ОБЫДА Мынам кылиз на герӟетэ, кылиз! ЙЫРКОБЫ Соин-а тон ведӥн кадь эктӥськод Ӝуась таба вылын?.. Эбек, Эбек, Кытын ай тон мынам визьмо нылы? (Серекъя.) Кытын ке туж зол гудыртэ. Сое Обыда гинэ шӧдэ, нош Йыркобы уг ик кылы. Обыда юла кадь интыяз позырске. ОБЫДА (Палэнэ.) Ӧвӧл, сое уг яра лэзьыны, Со сюлэмен пластилинэн сямен Шудэ! Кучапиез кадь куасалоз Со Эбраез. Нош Эбрае монэ Ӧз данъя ке, кыӵе-о мон эксэй? Соин ик кут ай кужымдэ, пересь, Но пазьгы вань йырвиымзэ солэсь! Ыжпи кадь мед со дыректоз кион азьын, Музэ мед лаптӥськоз, зугыр куалекъяса! (Шара.) Паньги, шӧдӥд-а тон? ЙЫРКОБЫ Тон мар сярысь?

Оло, яратэмдэ ни верамед потэ? ОБЫДА (Палэнэ.) О, кыӵе пинь мынам солы лыдэ! Малы сое юнме кышкатъянэз – Пушкын таӵе кужым золъяськыку, Уд вормы шат кыӵе ке кунянэз?! (Шара.) Сиѐ мон, албасты, тонэ, сиѐ!

ЙЫРКОБЫ Сиѐд? Кызьы-о валано тонэ? ОБЫДА (Позыртыса сое лэзе.) Сиѐ, Паньги, эшшо кызьы сиѐ! Я, кынмы ай отчы ик интыяд! Уд пыры тон ноку Эбрай пушкы, Мынам шыд пуртыям туннэ пырод! ЙЫРКОБЫ (Интыяз кынмыса.) Тон мар-о, мусое, монэн карид? Кытысь-о кужымед таӵе потӥз? ОБЫДА Ачиз инбам мыным сое сѐтӥз! Обыда одӥг кизэ азьлань урдэ но, вань саклыксэ огазеяса, сцена сьӧрысь бадӟым пуртыез кыскыса поттэ. Оглом, ачиз со потэ, бусаськыса улӥсь пурты. Соин ӵош пото мудор писпу, ярдур но выж.

ЙЫРКОБЫ Соиз нош мар сыӵе? ОБЫДА Со пуртыед, Кытчы али тон пӧзьыны пырод… ЙЫРКОБЫ Тон мар, зэмзэ ик-а монэ сиѐд? ОБЫДА Сиѐ, мусокае, тонэ ӝутон понна сиѐ. Ато укыр улэ тон лэзиськид… (Синвуаське.) Курбон тонэ каро инмаръѐслы… Озьы гинэ, шӧдске, чылкыталод… Озьы тон шонерак инме лобӟод… Вождэ эн вай, Паньги, яратыса Мон тон понна тазьы йӧндырисько. ЙЫРКОБЫ Кызьы сиѐд? Тон мар, мусокае? ОБЫДА (Бӧрдыса.) Кунян сӥлез кадь пӧзьтыса сиѐ… Верай вал мон, эн шуы «Обыда»… Мынам нимы Сюлэм вал ук, Сюлэм! ЙЫРКОБЫ Уг шуы, мусое, мон ноку но озьы Уг шуы ни, кылме мон сѐтӥсько.

ОБЫДА Уд шуы ни, Паньги, уд шуы ни… Мон берытски ни, шӧдӥське, Обыдалы… Мон табере зэмзэ тонэ сиѐ… ЙЫРКОБЫ Эн си монэ, мусокае. Мар тон карод монтэк? Кин пыдъѐстэ миськоз? Кин яратоз тонэ? ОБЫДА О, Паньгие, мусокае мынам! (Бӧрдэ.) Йырвиымад пырем кыйдэ гинэ Мон сиисько, астэ уг сииськы. Простить кар, мусое, мон вӧсясько Тынад лулыд понна. Я, мын ни мын, Я мын ни пуртыяд. ЙЫРКОБЫ Ох, каръян лул, Асме ачим ук пуртыяз пыртӥ! Ну, паразит! Уд мозмы мынэсьтым, Мон берыкто на пунэмзэ тыныд! Ай, ай! Ай-яй! Кыӵе тыбыр лыдэ! Коть тыбырме ке но тон кормалты вал, гад! (Пуртые ыше). Туж зол гудыръяны кутске. Кӧшкемыт чилекъя. Тӧлъѐс бергало, вузо. Музъем дымбыр тэтча. Обыда вуберганэ сюрем шелеп кадь шуккиськылыса лоба, погылляське. Тупез кадь тэтчатэ сое музъем. Обыда пуртыысьтыз Йыркобыез поттэ но, тӧл медаз басьты шуыса,

мудор писпу борды кырмиське. Кӧшкемыт чузъяське Йыркобылэн серекъямез. ОБЫДА Паньги, мусокае, мар та таӵе луиз? Малы музъем тэтча. Малы сильтӧл монэ Дунне вылысь пешкытыны турттэ? ЙЫРКОБЫЛЭН КУАРАЕЗ (Серекъямысь дугдыса.) Кызьы ачид нош малпаськод? А, мусое? Уд мозмиськы тон мынэсьтым озьы гинэ! Мыным тон сѐтэмын инбамъѐсын. Мынам киям тынад усьтонъѐсыд: Кулэ ке коть рае тонэ донго, Кулэ ке коть адлэн пӧсь пуртыяз. Монэ бадӟым ни каризы татын. ОБЫДА (Йыркобыез музъем вылэ поныса, пыдес вылаз лэзиське.) Мусокае, мон ляльчиед луо – Мон ваньзэ быдэсто, мае курид… Тон эн ысты монэ отчы тодмотэме… ЙЫРКОБЫЛЭН КУАРАЕЗ Кытчы тон учкиськод, муспотонэ? Оло, уд тодмаськы ини? Малы Музъем вылэ куштӥд? Ӝут ки вылад! ОБЫДА (Йыркобыез берен кияз ӝутэ). Ӝутӥ, мусокае, тани ӝутӥ…

ЙЫРКОБЫЛЭН КУАРАЕЗ Туж зол-а кышкаськод тодмотэме Сюремедлэсь? ОБЫДА О-о, мусокае… Тон чалмыты вал тӧлъѐстэ… Ато Секыт мыным тазьы кутӥськыны… ЙЫРКОБЫЛЭН КУАРАЕЗ Я возь на, возь монэ кияд ӧжыт, Ичи ке но коть дунъяны дышод. ОБЫДА Эн лобӟыты монэ, Паньги, эн лобӟыты. Инбамез исьнерен ӵужыса, задник вылтӥ вамышъяса ваське Эбрай. Кустӥз сое югдӥсь гозыез кутыса возе. Со гозы каллен лэзиськемъя, Эбрай инбам вылтӥ вамышъяса кадь ваське. Обыда та шоры кӧшкемаса ик учке. ЭБРАЙ Вань дуннеез, вань инбамез Кыӵе ке вотэсэн вотэсаллям Кыӵе ке адскисьтэм тараканъѐс… Мед тодозы, сьӧсьѐс, мон табере Нунал потэм ӵужо та инбамез! Ваське, гозыезлэсь мозмиське но эктыса лэзе. О, кыӵе каньылаз мынам пушкам! Эрикелэн пумыз уг адӟиськы! Ӟечбур, визьтэм дунне, мон – вордӥськи!

Я, возьматы ини шузи узырлыктэ! (Обыдаез адӟе.) О, учкы ай, татын но Гамлет курадӟе… Ӟечбур, сюлэмо лул! Мон усьтӥськи… Я, тон но усьты табере кошелѐктэ: Кин тон сыӵе, кызьы тынад нимыд, Маин та дуннеын дано луид? ОБЫДА Мон Обыда, Эбрай, мон Обыда, Кудӥз тонэ туж яратэ, гажа! ЭБРАЙ Иське, тон ӵапак со, кудӥз нырысь Вань сюлэмзэ та дуннелы сѐтӥз?.. Марлы куалекъяськод? Тыныд кышкыт? ОБЫДА Кышкыт, Эбрай, тонтэк сыӵе кышкыт… Монэ кыӵе ке тӧл но басьтыны турттэ… Вань вылтыртӥм ветлэ кезьыт кужым… Сѐт вал, Эбрай, берен герӟетъѐстэ… ЭБРАЙ Уно кылӥ ни мон нискетэмдэ, Жаляд ке но, тон ӝог вунэтӥськод, Шуак возьматӥськод арысландэ… Кинэ озьы кияд тон возиськод? ОБЫДА Йыркобыме, Эбрай, Йыркобыме… Со Паньгие мынам, кудӥз монэ Яратыкуз Лѐги гинэ шуэ вал…

(Викыштэ.) ЭБРАЙ А, ӵапак со, кудзэ котьку тышкад, Кудзэ сииз арысланэд тынад?.. Ничѐ, ничѐ, сюлэм со ӝог бурме… Мон кузьмасько тыныд ӝож луэмме… Мыкырскыса Йыркобыез веша. Ну, ӟеч-а бур-а, бедной Йорике? Ма, нѐжто тон вал та куке но, гыдыке? Татын вал ымдурыд… Со чупалляз… Серекъяса кылъѐс со куялляз… Татын вал синъѐсыд… Татын вал пельѐсыд… Чебер, чебер луэм тынад тусыд… Обыдалэсь йырзэ маялтэ. Я, возь на возь, чебер сюлэмо лул… Яратӥсько зэмос актѐръѐсты! Тӥ шутэтске на кӧня ке татын, Ӝоген кулэ тӥ луоды мыным — Выль пьеса тӥледлы туннэ гожто, Но тодэлэ, ачим сое пукто… (Кошке.) ЙЫРКОБЫЛЭН КУАРАЕЗ Ало? Ало? Уф…Уф…Алло?Алло?! Кылӥськыны кутско пӧртэм радиотулкымъѐс. Кин ке но, оло, кыӵе ке радиоканалэз утча кадь… Олокыӵе но куараос татын чузъясько. Обыда Йыркобыеныз зыр берганы кутске. Йыркобызэ вылэ ӝутэ но,

куараос чалмо кадь, улэ лэзе но, нош ик кужмояло. Писпу доры нуэмезъя соос калленало, нош писпуэ ошем бераз воксѐ чалмо.

ОБЫДА Паньги… ЙЫРКОБЫЛЭН КУАРАЕЗ (Синберъѐсыз ӝуаны кутско.) А, мар? Мар-о шуид, Лѐги? ОБЫДА Тон мар, мусокае, нош ик монэ Лѐги-а шуыны кутскид? Иське, Тон воштӥськид? ЙЫРКОБЫЛЭН КУАРАЕЗ (Синъѐсыз югдо, кысо, югдо, кысо…) Ой, кыӵе тыбыры мынам лыдэ… Лѐги, уд кормалты-а, мусое? ОБЫДА Чеберае мынам, кызьы уг кормалты, Кызьы уг кормалты мон, мусое… (Йырберзэ корма.) ЙЫРКОБЫ Ай, ай, а-яй, а-яй! А! А! Аааааааа! Аааааааа! (Чалме.) ОБЫДА Мар табере луоз? Мар табере,

Кыӵе-о пьесаез со шудытоз? Кытын ке туж кӧшкемыт уйсы кеське. Обыда киросъѐс тыре. Ой, Остэ Инмаре, мусокае! Кыӵе кышкыт мыным! Кыӵе кышкыт. ЙЫРКОБЫЛЭН КУАРАЕЗ (Ум йылтӥз вушйылыса.) Возьма монэ, Лѐги… Возьма монэ… ОБЫДА Мон ваньзэ радъяло, эн кышка тон, Мон ваньзэ радъяло, мусокае. Кытчы ке уе учке. Чиньыосыныз выретэ. Чик-чирик, ку-ку, ку-ку, Султы пересь изьыку, Пазьгисько мон кенэм вӧй, Лыкты татчы, часовой! Ку-ку, дим-бом карыса жугыны кутско курантъѐс. Мавзолей вӧзысь часовой кадь карабинэн потэ Конгырчо. Шукко курантъѐс. Часовой постэ султэ. Обыда куаныса ик учке та суред шоры. ОБЫДА Вот, вот… Озьы, пие, озьы… Шонер… Сыӵе ик мон ӧвӧл на ай куанер… Озьы гинэ уд куштэлэ шуре… Ой, куанӥсько, кыӵе чебер суред… Ой, мусое, мынам… Ой, мусое… Табре тынад аслад часовоед…

Шудбурен пачылмись крезьгур вӧлъяськыны кутске. Сцена вылын каллен пеймыта.

КУИНЕТӤ СУРЕД Мунчо но солэн сарачаез. Мунчо сарачаын ошиськыса улэ югдӥсь гозы кыӵес, выж вылын сылэ кык фляга ву, кыллѐ кортӵогъѐс, бышкась ез, тӥр но огзы вылын огзы кирос кадь улӥсь кык бадӟымесь пулъѐс. Борддор вӧзысь кузь ӟус вылын, Индиысь йог кадь, пыдъѐссэ купыръяса пуке Майтал. Солэн мугорыз из кадь кынмемын, синъѐсыз ворсамын. Мучоло ымзэ ик усьтыса Майтал шоры долкаса улэ, танитани со Майталлэн ымаз пыроз ини. Копар мыдлань-азьлань ветлэ, мар ке туж мур малпаське, лэся. Дырын-дырын со, сарачалэн педло пала потӥсь ӧс выжыяз дугдылыса, кытчы ке, отчы пеймытэ учкылэ. Тазэн Жуг-Жаг кыӵес улысь арбериос азьын йырзэс тӥяло. Бызьыса пыре Сэрегпум. Синъѐсыз солэн эгыръѐс кадь ӝуало. Ваньзы, Майтал сяна, Сэрегпумез котырто. КОПАР. Я, мар ни, Сэрегпум? Мар со отын каре? СЭРЕГПУМ (оло нош вина, оло нош ву юыса). Уг тодӥськы. Пу пильылэ… Кызьпу пуклѐосты, тазьы тани (киыныз шонтыса возьматэ) и-ях! карыса… Тӥртэк-мартэк… КОПАР. Эшъѐс, мар ке но тӥ валаськоды-а коть? Малы-о пу со пильылэ? Озьы, тӥртэк-мартэк? ЖУГ-ЖАГ. Таз, тынад экономической образованиед, бен валэкты ук, мар-о со сыӵе? ТАЗ. Кин-о сое тодэ, мар со сыӵе малпаз... СЭРЕГПУМ. Уг тэры та мынам йырам, уг, нокызьы уг тэры… Нош мар шуэ Майтал? А, Мучоло? МУЧОЛО. Пуке… Ӧз васькы на… Уг вазьылы… Майтал, лул гыдыке, я, мар-о ни, валад ни-а мар ке но со? СЭРЕГПУМ. О-о, кылоз ай со тонэ озьы гинэ… Ведь тӥ ваньды, озьы пуксьыкуды, кезьыт изъѐс кадесь луиськоды. Тани тӥ учке ай… (Кирпич кутэ но вань кужмысьтыз Майталлэн йыртышказ васькытэ. Кирпич кир-пазь луыса кошке, нош Майтал уг ик выры, озьы ик пуке…) МУЧОЛО. Тон мар, Сэрегпум, кабзэ-а шузимид!

СЭРЕГПУМ. Бен, шузимод татын! Кӧты мынам кизер кошке ини… МУЧОЛО. Мар тон сое карид?! Тон учкы ай, кыӵе кезьыт луиз! СЭРЕГПУМ. Кезьыт бере, ваньмыз умой. Ӟырдыт ке луысал, соку ини мукет ужпум… Мар-о солы луоз? Оло ке, нырысьсэ тазьы шуккылӥсько кымесады... (Майталлэн йыр тышкысьтыз кирпич тузонъѐссэ ӵушылэ.) Ма, учкы, учкы, кытӥыз-о пилиськиз? Кытын лѐгез? Мон шуисько ук, ваньды из кадесь луиськоды… Тодӥськоды-а, кыӵе со кышкыт, куке ваньды тӥ сыӵеесь пукиськоды, куке огнам мон кылисько тӥляд таӵе мугоръѐсты вӧзы… Пуке со мумия кадь ик… Оло ке, васькытоз со мае ке отысь… МУЧОЛО. Шузи! Кош, палэнскы татысь! (Сюлэмзэ кылзэ.) Уг жугиськы ук сюлэмыз! СЭРЕГПУМ. Ма, куддылэн со жугиське, озьы та дуннеысь кошкыкуды?! Кыӵес, малы-о со кыӵес ошиз? Малы-о ву кык флягаен пуктӥз? Малы-о та пулъѐс, малы-о кортӵогъѐс, малы-о бышкись ез, малы-о тӥр? Малы-о пу со пильылэ серекъяса? ЖУГ-ЖАГ. Оло, басьтоно отысь со кыӵесэз? Оло, тӥрзэ но, кортӵогзэ но, пулъѐссэ но, езъѐссэ но ватоно? МАЙТАЛ (сайкаса). Мар, мар? Эн йӧттэ киостэс! Солэн та мунчоез, эн вунэтэ. Кузѐ, соин ик со — кузѐ! Мар каремез потэ, сое ик со каре… СЭРЕГПУМ. О-о, сайказ… МУЧОЛО. Майтал! Тодӥд-а, мусое? МАЙТАЛ. Тодод сое озьы гинэ… Отын но ваньмыз буш… Буш… СЭРЕГПУМ. Буш! Мон верасько ук – буш! МАЙТАЛ. Я, буйгалэ ни тӥ… СЭРЕГПУМ. Буйгалод татын. КОПАР. Хемингуэй шуиз вал… СЭРЕГПУМ. Дугды, Копар, эн копыръя кулэтэмзэ! Хемингуэй гинэ татын уг тырмы на! МАЙТАЛ. Мед вералоз. Копар, мар-о отын Хемингуэй? КОПАР. «Ӧвӧл,— шуэ со, — сыӵеез, кудзэ уг луы валаны…» Потон сюрес котьку, пе, усьтӥське…

СЭРЕГПУМ. Усьтӥськемын ни со, шӧдске! (Укыр ини зӧк бинялтэм тамаксэ кенжытэ). ТАЗ. Нош кытын Конгырчо? МАЙТАЛ. Зэмзэ но, кытын со? МУЧОЛО. Кызьы кытын? Пие? Пие? Пие? СЭРЕГПУМ. От, нушы йыр! Вунэтӥськем мон вераны. Тӥ изьыку, соин ук мон сайкай. Мар ке со ӝуштыны кутскиз… Сюлэм палзэ весь кутылэ… Мон сайкатӥ сое, нош со монэ уг адӟы кадь, кытчы ке пеймытэ учке… Нош собере Эбрай вуиз — гозы кыӵесэныз… Таиз но нокинэ уг адӟы кадь… Куштӥз чыртыысьтыз со гозызэ, ачиз кыӵе ке но сыӵе – весь пальыша… «Я, мар,— шуэ,— пырид-а мон пушкы, святой духе? Озьы ке со,— шуэ,— мон сюрестэ тазьы тани сознаниям тодмостыса кельто». И — гозызэ тӥни отчы кутскиз думылыны… Думиз но, нош ик пальыша: бен, бен, шуэ, Иоанн доры мыно ай мон, шонерлыкез быдэстыны… МАЙТАЛ. Кыӵе Иоанн доры? Кыӵе шонерлыкез? СЭРЕГПУМ. А кин сое тодэ… Нош собере кошкиз флягаосын… Паймеменым мон интыям катӥ: уг луы выреме, кӧт гогытӥм кезьыт бызьылыны кутскиз… Тӥни соку султӥз ук Конгырчо – чорк- чорк гинэ берыкъяське… Нош собере каллен гинэ, мавзолейысь часовоед сямен, отчы — уе кошкиз… Нош кылемзэ тӥ асьтэос тодӥськоды, мон ваньдэс сайкатӥ. МУЧОЛО. Мар, армие-а со кошкиз? Пие, пие, тон мар-о дауртӥд?.. ТАЗ. Кыӵе-о со тынад пиед?! Со пи тынад апаедлэн, кудӥз тордэм бӧрсяз калъяськыса кулӥз. Кошкиз ке ни, кошкиз. Солы ик умойгес луоз! Лобатоно татысь, эшъѐс. Тани, тӥ учке, мар мында татын уксѐ… Та телевизор миллионлэсь ятыр сылэ комиссионнойын. Нош вань арберизэ ке басьтӥмы – быдэс толэзь со улыны тырмоз… МАЙТАЛ. Нош собере куктэ-а сюпсьыса пукод? Ӧвӧл, мынам уг пот ульчаостӥ костаськеме. СЭРЕГПУМ. Кыӵес но тӥр улын ӟечгес, иське? Куке кӧт гогыез кинъѐс ке но сюпсѐ? ТАЗ. Ойдо, Майтал, ӝоггес ни вера ас кылдэ… Тон – голова…

СЭРЕГПУМ. Вунэтӥськем, «Глава,— шуиз на со – глава!» Шуиз: «Кутскиз куинетӥез глава…» КОПАР. Куинетӥез глава? Нош мае со берло дыре лыдӟиз? ТАЗ. Евангелиез… Матвейлэсьсэ… СЭРЕГПУМ (усьтыр-табыр гинэ Эбрайлэсь Евангелизэ вае, лыдӟыны кутске). Тани со мар ке тодмостэм татын. «Со нуналъѐсы лыктэ Иоанн Креститель но Иудей кыр луд вылысен тодытыса вера, ӧпкелелэ, матэктӥз Инлэн Эксэйлыкез. Со доры креститься кариськыны лыктӥсь уно фарисейѐсты но суддукейѐсты адӟыса, Иоанн шуэм: «Кескич кыйлэн вордосъѐсыз! Кызьы-о тодӥды на вуоно вожпотонлэсь утиськыны? Бен, ӧпкеле но будэтэ ук емышсэ ӧпкелѐнлэсь. Но эн ик малпалэ асьтэ пушкады, милям атаймы Авраам шуыны, угось, мон верасько тӥлед, Инмар быгатэ та изъѐслэсь но Авраамлы нылпиос ӝутыны. Ини тӥр но писпу выжыын кылле…» МУЧОЛО. Мар, мар? СЭРЕГПУМ. Ини тӥр но писпу выжыын кылле, котькудзэ умой емыш сѐтӥсьтэм писпуэз ӵого но тылэ кушто. Мон тӥледды ӧпкельытыса вуэн гинэ крестить карисько, но мон сьӧры лыктӥсез мынэсьтым кужмогес: мон солэсь пыдкутчанзэ но нуллымон уг сылӥськы: Со тӥледды Святой Духен но Тылыныз крестить кароз. Солэн сускичез но солэн кияз ини, сузялоз со Аслэсьтыз итымзэ, Аслэсьтыз чабейзэ кеносэ люкалоз, нош курозэ кысылӥсьтэм тылын сутоз… КОПАР. Шузимемын таид, эшъѐс. ЖУГ-ЖАГ. Всѐ валамон, ассэ инмар со кожаны кутскем. ТАЗ. Солэсь луоз: ӵогоз, ошоз, сутоз! МАЙТАЛ. Злодей ӧвӧл ук со, братъѐс… МУЧОЛО. Шонер, Евангелиез ук со лыдӟем… Инмар сярысь вылаз ик тодмостэм… Быдэс артана мында пу ӟыгыртыса пыре Эбрай. Пузэ бомжъѐс азе куштэ но тӥр кутэ. Ваньзы сьӧрлань чигнало. Эбрай тӥрзэ чиньыеныз зыралтыса эскере но вӧзаз выж вылэ мертчытэ. Бадӟым квадратной кортӵогзэ кисыысьтыз поттэ. Уг ик адӟы кадь со бомжъѐсты.

ЭБРАЙ Квадрат сямен йылсаськыса кошке, Маиз ке вань талэн йылсаськоназ… Тазьы ик йылсасько вань пирамидаос, Мертаськыса инлэн сьӧд ньылоназ… Малы-о Гиза пирамида азьысь Сфинкс Ньыль сюрс вить сю арлэсь ини кема, Калыкъѐслэсь визьзэс урмытыса, Луо шорын быдэсмонзэ возьма? Кинлы-о со турттэ пӧрмытскыны: Арысланысь тушо фараонлы Яке фараонысь арысланлы? Малы мукетъѐсыз пичи сфинксъѐс Я арыслан-така, я арыслан-ӧрӟи, Яке нош арыслан но кышномурт? Оло нош пирамида но — со пурт?.. Кыӵе ке хирурглэн дӥсьтӥсь кияз?.. Кудӥз сфинксэз весь лусйылӥз, вошъяз?.. Кариз сое поэт яке философ, Яке ведӥн, яке туно-пелѐ, Яке тупик, яке инбаме ӧс, Кытын лулмы быроз яке кылѐз… Озьы ке мон но Удмурт сфинкс: Мон ӟуч удмурт, яке удмурт бигер, Оскон ласянь ке Христианин-язычник, Шунды потон пала учкылӥсько, Шунды пуксѐн пала кыстӥськисько. Мон сфинкс сямен ик ас кожам гинэ Чалмыт но тодмотэм быдэсмисько Ортчись дырлэн луо зарезьѐсаз. (Вис.) Эй, эмиссар, малы та кортӵогез

Ведӥн песятае мыным дасяз? КУАРА Мед усьтӥськоз шуиз, дыр, Сфинкс… ЭБРАЙ Тон мар, серекъяса-а вераськод? КУАРА Мон абсолютно шонерзэ ивортӥсько. Тон табере эксэй но арыслан. Тон котьма карыны быгатӥськод, Мылыд потӥз ке, нуллы така сюр, Мылыд потӥз ке, ӧрӟилэсь йырзэ, Потӥз ке лобамед, коть лэсьты бурд, Мылыд потӥз ке, лу коть кышномурт. ЭБРАЙ (Кортӵогзэ гадь кисыяз поныса.) О, тон, кезьыт пумтэмлыко дунне, Кыӵе тон умойтэм пальпотӥськод! Мон табере аслыд кыӵес думо, Ачим луо тыныд — пиртэш толэзь! Но возьма ай, нырысь мон мунчоме Инме пазьгиськонтэм кортӵогало. Бинѐ сое бышкись езъѐсыныд, Мед со луоз ачид кадь ик пинѐ. Электропуконысь ӵушъял сямен Мед бышкалоз со тынэсьтыд синдэ. Оло соку вакчи дырлы ке но, Уг адӟы мон шорам пальпотэмдэ.

Еззэ, кортӵогъѐссэ, пулъѐссэ, тӥрзэ басьтэ но, педло пала потыса, мунчо сарачаезлэсь ӧссэ вамен пулэн кортӵога, мунчозэ бышкись езэн котыръя. КУАРА Тон мар озьы, шузи, дауртӥськод? ЭБРАЙ Ачид тон, эмиссар, шузи. Мынам Табре, тынад мусо юрттэменыд, Та дуннеын ӧвӧл ини каре, Кытчы эн учкы, котькытын шаръѐс, Кыӵе ке ишанъѐс но ведӥнъѐс, Чик кылемын ӧвӧл шокчон пасьѐс. Ваньмыз киултэмын но басьтэмын. Шунды но кытын ке но шутэтске. Кулэ ук пегӟыны мон кытчы ке. Соин сьӧсьѐс киултэмлэсь азьвыл Приватизировать мон карисько Та мунчоме. Медаз со луы кинлэн ке, Со котьку мед луоз мынам аслам. КУАРА Нош малы тон сое кортӵогаськод? Малы бышкись езэн котыръяськод? ЭБРАЙ Медаз сое сэртты бадӟым сильтӧл, Яке тудву, яке дунне зуркан. Али дыре бышкись езтэк уг лу. Вылаз ик ток лэзѐ на мон отчы. КУАРА

Нош мон сямен юнме курадӟиськод, Тон веднаны но ук быгатӥськод. Кут кортӵогдэ но вера кылъѐстэ — Нокин отчы уз пыр соку тонтэк. ЭБРАЙ Ӧвӧл, эмиссаре, пӧяськиськод, Милям приватизировать каро Вулэн вылаз гожъясь саникъѐсын, Квадратной кортӵогтэк но кылъѐстэк. Соин ик мон ини ачим сямен, Кызьы кулэ озьы ваньзэ лэсьто. КУАРА Малы бон тон ӧстэ но кортӵогад? Муръѐ гырктӥд-а мар-а ни ветлод? ЭБРАЙ Кызьы мылы потӥз, озьы ветло, Кулэ ке укнотӥ, кулэ ке нош Муръѐ гырктӥ аслым сюрес усьто. СЭРЕГПУМ (ӧс висъѐстӥ учкыса). Вамен пулэн кортӵогаса понӥз. Бышкись езэн ни бинялля… Кирос пуктӥз кадь асьмеос вылэ… Озьы ик ас понназ вераськыса ветлэ… МАЙТАЛ. Всѐ, быриськиз, братъѐс! МУЧОЛО. Ма, нѐжто ӝуатоз со асьмеды? ЭБРАЙ (Йырзэ мунчо укнотӥ мыче.) Луэ на кадь татӥ донгиськеме, Ну табере эсто мон мунчоме! (Нош ик ыше но кокаськыны кутске.)

КОПАР. Шӧдске, со асьмеды нырысь миськоз, пароз, нош собере вуэн, тылын, Святой Духен крестить кароз! ТАЗ. Миськиз ни со, миськиз! Печать гинэ кымесамы пуктылонэз кылиз. ЭБРАЙ Ӧвӧл, эмиссаре, Эбрай тодэ — Мунчо со вань мертэтъѐсты тӥя. Вань дуннелы со кукиш возьматэ, Тылэн вуэз герӟась поэзия! (Бышкись еззэ позыръяса мунчо сьӧры ыше). МАЙТАЛ. Эшшо ке, сволочь, серекъя на ук! Кыӵе-о тон поэт?! Тон – промокашка огшоры – зырым кышет! КОПАР Кин со, инмар шат асьмелы? Малы сое возьмаськоды? Уд адӟиське шат, шиза кутскемын солэн… Со – быремын! ТАЗ. Шонер. Ведь асьмелэн сыӵе компания люкаськемын. Озьы бере, ойдо кылдытомы асьмелэсьсэ империмес. Ӧвӧл шат асьмелэн режиссѐрмы? Тани ук со – Майтал кадь режиссѐр ӧвӧл дунне вылын! Копар – со оператормы но композитормы! Мучоломы – художник но ачиз ик парикмахер. Кин быгатэ со кадь буяськыны, причѐска лэсьтыны?! Нош мон – продюсерды луо. Жуг-Жаг луоз кырӟась. ЖУГ-ЖАГ. Ох, кыӵе зол! Кызьы валад тон, Таз?! Мон уйвӧтам но сцена вылын кырӟасько! СЭРЕГПУМ. Нош мон?.. КОПАР. Тон мастер ук тылмес ӝуатонъя но кысонъя… ТАЗ. Тужгес но ӵын поттылонъя. Тыныд но уж сюроз, эн кышка, Сэрегпум! Мылкыдзы ваньзылэн умойгес луэ. Пальышаны соос кутско ини. СЭРЕГПУМ. Мар-о кароз со асьмелэн империмы?

ТАЗ. Сое ик, мар лэсьтэ вал Эбраед, клипъѐс гожъяломы кырӟанъѐслэсь. СЭРЕГПУМ. Нош кытын-о кылбурчимы? ТАЗ. Ма ваньмы асьмеос кылбурчиос. МАЙТАЛ. Шонер. СЭРЕГПУМ. Нош кудды ке ни гожъяды-а одӥг пол ке но? Мон шуисько сыӵеоссэ, кудзэ калык басьтоз?.. ТАЗ. Ма, Эбрайлэсь ик басьтомы нырысь. СЭРЕГПУМ. Нош кытын-о солэн кылбуръѐсыз? ТАЗ. Тӥни ук пазясько. СЭРЕГПУМ. Мын, учкы ай, со одӥг чур но гожтымтэ! Быдэс толэзь юан пусъѐс печатласа пукем… МАЙТАЛ. От, паразит! Быдэс толэзь чырты вылын пукиз! Гожъяськисько, пе, мон, гожъяськисько! Эшшо ке нылъѐсты солы мон ысъясько. СЭРЕГПУМ. Тани огзэ шедьтӥ вал мон лапча улысь… Уг тодӥськы вот только, яралоз-а уз-а? МАЙТАЛ. Ну, ну, я лыдӟы ай… СЭРЕГПУМ. Мунчоям кортӵог шукки но, Мучоло отчы оши… МУЧОЛО. Тӥ мар, кыӵе-о та кылбур? Малы-о одно – Мучоло? Ку со монэ… КОПАР. Ну, мукетыз ӧвӧл ук асьмелэн… Лыдӟы, Сэрегпум. СЭРЕГПУМ. Собере эшшо шукки но, Копарме отчы оши… КОПАР. Тон мар, исаськиськод-а, Сэрегпум? СЭРЕГПУМ. Мар гожтэмын, сое ик лыдӟисько. КОПАР. Зэмзэ но, кыӵе та кылбур?.. МАЙТАЛ. Лыдӟы, Сэрегпум. СЭРЕГПУМ. Собере эшшо шукки но, Нош ик мучоло оши. Собере эшшо шукки но, Нош ик копарме оши.

МУЧОЛО. Всѐ, мыным тырмиз. Вай сое татчы, Сэрегпум! КОПАР. Бен, юри серекъян ук та! Вай, вай! МАЙТАЛ. Лыдӟы, Сэрегпум. СЭРЕГПУМ. Собере эшшо шукки но, Ӧй ни шедьты ошыны. «Эй,— кеськи бускелелы мон,— Вай мардэ ке ошыны…» МАЙТАЛ. Нош мон сямен та туж умой кылбур! Тӥ учке, формаез кыӵе, повторъѐсыз! Шуак со син азе пуксе, шуак йыре кыле! СЭРЕГПУМ. Татын ӧз быры на… МАЙТАЛ. А кылемзэ бӧрысь лыдӟом. Умой кылбур! (Тазлы) Барыш но поттэмы татысь луоз. МУЧОЛО. Иське, мон, тон сямен, номыр уг валаськы ни кылбурын? МАЙТАЛ. Малы-о одно валано сое? Асьмеос сое крезьгур вылэ пономы, шлягер сое каромы. КОПАР. Мон пумит! МУЧОЛО. Мон но! МАЙТАЛ. Я, мар-о тӥ, эшъѐс? Ма, кылъѐссэ, конешно, воштомы. Тӥ интые дэрем, лифчик, трусик ошыломы. Ӧжытак эротичной каромы – туала шӧмъем. Жуг-Жаг чуп каронъѐс ке пыртылӥз на ай, мынам малпамея умой видеоклип пӧрмоз! ЖУГ-ЖАГ. Кыӵе умой! Мынам аслам клипе луоз! ТАЗ. Ӟечкыласько, эшъѐс! Тазьы ке со луиз, ужмы мыноз! КОПАР. Тазьы ке со, мыноз. МУЧОЛО. Тазьы, конешно, со мыноз! МАЙТАЛ. Иське, лобӟиськомы! ТАЗ. Мон малпасько, ум кельтэ ни котыръѐссэ солэсь? Малы кулэ на ай соос визьмыз тӧлӟем адямилы?.. МАЙТАЛ. Эн кельтэ, ваньзэ басьтэлэ! Мед чупалоз со буш интыосмес! Эбрайлэсь арбериоссэ октыса, ӟус вылазы пуксѐ.

МАЙТАЛ. Всѐ, лобиськомы! Брахма, ми кыниськомы синъѐсмес… ВАНЬЗЫ. Брахма, ми кыниськомы синъѐсмес… СЭРЕГПУМ. Нош монэ, монэ кельтӥськоды ук тӥ… МАЙТАЛ. Вот ведь, «Вишнѐвый садын» кадь ик адямимес кельтӥськомы вал ук. (Ваньзы кильтыр серекъяло). Эх, Вишнулэн рай садысьтыз атеистмы милям… Пуксьы но кутӥськы ми бӧрды, Сэрегпум. СЭРЕГПУМ. Тау, эшъѐс, тау, мусоосы… МАЙТАЛ. Брахма, ми ворсаськомы пельѐсмес… ВАНЬЗЫ. Брахма, ми ворсаськомы пельѐсмес… МАЙТАЛ. Таиз дунне – со ваньмыз майа… ВАНЬЗЫ. Таиз дунне — со ваньмыз майа… Крезьгур пумен кужмоя. Мунчоын но, сарачаын но пеймыт луэ. Муръѐ гырктӥ огез бӧрсьы огез лобӟыса кошко тылъѐс. Кытын ке бурдоос кесясько, кикимораос. Нош ик мунчоын югдыны кутске. Сарачаын нокин ӧвӧл ини. Мунчо укноетӥз пыре Эбрай. Буш но югыт кылем мунчоезлы паймыса, лэся, котыр чаклаське. ЭБРАЙ Бабыльскымон ик луыса кошке ай та: Педло ласянь ке шушоме но пеймыта, Пушкыз, лэся, югдэ но чылкыта. Таӵе мусо, ненег шыпытлыкын Куинь нуналзэ ке сайкатэк изид, Уз поты ни та дуннеед кезьыт — Тон выльысен улӟем кадь ӝутӥськод!— Озьы-а, Инмаре, тон шуиськод? Тау, мусое, таӵе югытлыке Монэ вуттэм поэзиед понна… КУАРА Тон малпаськод, пегӟид ни дуннелэсь?

ЭБРАЙ Я, чалмы, сѐт ӧжыт шутэтскыны, Татын ини мынам эксэйлыке — Приватизировать со каремын, Мон табере татын тыныд закон, Ӧд ке чалмы, тонэ но улляло, Валад? КУАРА Валай, тӥни со мар вылэм Приватизировать карон… ЭБРАЙ Нош тон, Бен мар малпад… Татын ваньмыз ништяк… Эбрай лапча вылаз пуксе но каллен гинэ тыбыр вылаз лэзиське. Собере каллен гинэ урдэслань позырске но пичи нуны сямен мусо соргетыны кутске. Борддорез палэнтыса пыре Принцесса. Ымнырыз солэн шӧтэмлэсь но шӧтэм луэмын. Ымнырыз лѐго-лѐго, нырыз кияр быдӟа. Ачиз со чильпырась тӧдьы дэремен. Йыраз коронаез ворекъя. Принцесса, мунчоез эскеронъяз, сыӵе яратыса учкылэ Эбраез шоры.

ПРИНЦЕССА Пичи нуны кадь шутэтскись поэт – Шайтан-а со, оло, чылкыт со ангел? Кыӵе кужым со бордысен лыктэ! Уй пеймытысь сюсьтыл сямен кыске со, Нош матэктӥд ке, бурдъѐстэ сутэ… Тӥ ваньды со вӧзын ӟигартэмесь – Шушесь, кӧшкемытэсь но бездытэсь!

О, уй тӧлъѐс, я, ӝутске ук ӝоггес Но султэ борддорен мон пумитэ! — Мынам та вань шузи мугореным Солэн бордаз лякиськеме потэ… Но уг, уг яра, шушомо ук мон Шайтан тылын сутӥсь ӟыгыртэтаз! Мон бурдъѐсы ванен гинэ кужмо, Нош бурдъѐстэк мон – погмаськем кагаз… ЭБРАЙ (Сайкаса.) О, вакчи дыр куспын тонэ адӟон! О, музаез ватскем чеберлыклэн! Ох, Нифертити! Ух, какие тити! Вай, лифчиктэ мыным коллекцилы – Дырын-дырын мон поттыло сое Аслам ӝӧке вылэ но малпало, Тани кыӵе, пӧй, вал мынам жар-птицае! И трусиктэ но вай! Ведь трусиктэк, Куалялюльы кадь со марӟанэзтэк! Со ӝыныѐ озьы, кыӵе ке но палэс, Озьы ик, кызьы кузпалтэк валес! ПРИНЦЕССА Ох, кыӵе луэмед тон юрӟымес! Борддорез палэнтыса, бӧрдыса кошке. Мукет борддорез палэнтыса, лоп тэтчыса потэ Эбек. Эбек тусъем луэм ни со – туж эротичной адӟиське, озьы сьӧр пыд вылаз тэтчакуз: гадьѐсыз зарезь кадь тулкымъяськыло, пыдъѐссэ но, валамон ини, Эбек кадь возьылэ. ЭБРАЙ О, инмаре! Быдэс симфония!

Чукоткаысь тӧдьы ин ворекъян! О, вдохновение мынам! ЭБЕК Квак! Квак! ЭБРАЙ Тонэн, вылды, пустыняын умой – Куке луллы сыӵе кулэ салкым! Ӟырдам таба кадь шундыед улын – Ачиз, дыр, тон кезьыт зарезь тулкым! ЭБЕК Квак-квак! Квак-квак! Квак-квак! (Синвуаськыса борддор сьӧры кошке). ЭБРАЙ Мон малпасько вал: кӧня ке изѐ, Нош таосыз ай весь вылэм пӧзѐ… КУАРА Быдӟым ожгарчиос кадь дӥсьтыса, Тон кошкыны кулэ тодмотэме, Тодмо пала кыскись кужымъѐслэсь Тонэ приватизациед уз возьма… ЭБРАЙ Эшшо кызьы со возьмалоз монэ — Татын умой мон шӧдӥсько асме. Пустыня шоры Сфинкс кадь дугдыса, Уг пот мынам излы берытскеме. КУАРА

Уг валаськы, марлэсь тон кышкаськод? ЭБРАЙ Мон кышкасько асме вунэтонлэсь! Сфинкс котькинлы одӥг юан сѐтказ: Мар со сыӵе — ӵукна ньыль пыд вылаз, Нуназезэ кык пыд вылаз, нош ӝыт Куинь пыд вылаз та дуннетӥ ветлэ? Нош куке солы веразы, кин со сыӵе, Тодаз вайиз со аслэсьтыз кинзэ, Но со уг быгаты ни вал выльысь Шудо адямилы берытскыны, Ӧй вал ини солэн та дуннеын Приватизировать карем дорез. Соин ик Сфинкс кулӥз. Кылиз отчы — Дыр луоен пеллясь зарезь шоры, Из мугоро загадка луыса. КУАРА Уг валаськы, кин-о тонэн валтэ: Йырдэ но сюлэмдэ тон мозмытӥд… Я, мар эшшо тынад пушкад кылиз? ЭБРАЙ Монэн валтэ зэмос поэзия! Кудӥз лыктӥз Гондыр валэд пыртӥ! КУАРА Мар карыны табре тон турттӥськод? ЭБРАЙ Адӟод, эмиссаре, ӝоген адӟод! Мон табере тынад проводникед!

Эй, музаос! Кытчы тӥ пыриды? КУАРА Тон соосын, Эбрай, эн ни шуды… ЭБРАЙ Эшшо кызьы мон соосын шудо! Пыро ог паласен Эбек но мукет паласен Принцесса. ПРИНЦЕССА Ойдо, ӵошен, ӵошен мыном, Эбрай! ЭБЕК Ӧвӧл. Эбрай, мон визьмогес солэсь! Мунчоын бус ӝутӥськыны кутске. Югдэ но пеймыта, югдэ но пеймыта. ЭБРАЙ Ну, ӟеч-а, полюсэн экваторъѐс! Огез ӟырда, кыкетӥез кынме! Ма, кызьы мон таӵе эрвалъѐслы Оско чылкыт шокась поэзиме? Мын ай, Принцесса, пӧсь пустыняяд – Мын адӟы аслэсьтыд уйвӧтъѐстэ! Нош тон, Эбек, мын, лобӟы Уйпалад, Мын, веръя аслэсьтыд люкмесъѐстэ! Эбрай

кӧшкемыт

серекъяны

веднаськыны. ПРИНЦЕССА

кутске.

Принцессаен

Эбек

–

Мар тон сое карид! Жук-жук акат! ЭБЕК Ачид сое сыӵе карид! Ат! Бат! ПРИНЦЕССА Тон, быжокей! Ус мус рак рак акат! ЭБЕК Гоно нумыр! Ус мус жук-жук ат бат! Тӧл

пелляны

кутске. Гудыръя, чилекъя.

Эбекен

Принцесса

олокызьы но киоссэс позыръяло. ПРИНЦЕССА Арсь парсь нурс нурс – тон кыргаяк! ЭБЕК Ачид тон кыргаяк нурс-нурс ат бат! ПРИНЦЕССА Рака ака така-бака акат зият! ЭБЕК Юрӟым курег, комак но кыргаяк! Шӧтэм золэсь тӧлъѐс ӝутско. Чилекъя, гудыръя. Кӧшкемыт тӧлъѐс Принцессаен Эбекез ӝуто кадь омыре но кытчы ке нуыны кутско. Эбекъѐс тюргето, шуралиос кесясько, Кикимораос, лэся, серекъяло. Оглом, олокыӵе но сволочной ымныръѐс татын потыны быгато. Та сьӧд кужымъѐслэсь мунчо каллен-каллен пилиськылэ но, со мунчо кесэгъѐслэсь кылдэ кыӵе ке фантастической дунне, кудӥз тодэ вайытэ йыркобыез. Эбрай потэ бушаны кутскись сцена азе.

ЭБРАЙ Я, мар, адӟид, кызьы дунне быре, Куке поэт кошке кыре-буре! КУАРА Тон зол ини монэ паймытъяськод, Кытчы-о лобӟытӥд тон соосты? ЭБРАЙ Экваторе но Уйпала, вылды,— Созэ ини тодоз ачиз Шунды. Ну, табере мынам дыры вуиз, Нырысетӥ ке действие быриз, Мар ай отын луэ, эмиссаре? КУАРА Мон кышкасько ни вераны табре… ЭБРАЙ Артистъѐслы вылез кужым пыре… Мон малпасько, соос ни султӥзы Чалмыт улӥсь ожгар лудзы дуре. Тодскод-а, мар отӥ воректылэ? Со Йыркобы, мынам светофоре, Рользэ ни аслэсьтыз озьы куре. Кошким ӝоггес, ато со тэльмыре… Пеймыта. Крезьгур тулкымъяське. Катанчи.

* Сарача — мунчо азь * ачама — ярмо 59

КЫКЕТӤ ДЕЙСТВИЕ Нырысетӥ суред Сцена шорын дунне писпу сылэ. Со туж примитивной. Сое тӧлын куке но чигем ни. Урдэсаз кыӵе ке но лесник, тӥреныз лусйылтыса, печатьсэ шуккем. Погыртоно шуэм, дыр. Улваез кык гинэ. Одӥгез куасьмемын но тӥялскемын, мукетыз улэп на ай — кык куарез адӟиське. Та вай борды кыӵе ке тылобурдо кар лэсьтэм. Мукет улвайѐсыз сисьмылэмын.. Соин ик азьвыл улъѐсыз интыын лѐгъѐс гинэ адӟисько, пӧртэм ымныр тусбуйѐсты тодэ вайытыса. Мугораз пӧртэм губиос будӥллям. Улвай борды йыркобыез думиллям. Со маятник кадь отчы-татчы шонаське. Синберъѐсыз светофоръѐс кадь ӝуатскыло. Татын ик писпулэн чигем йылыз сисьмыса но куасьмыса кылле. Та йыл борды кин ке тӥреныз ымныръѐс лусйылэм. Тапалан ик меӵ ярдур, выж адӟисько на. Обыдаен Конгырчо писпулэн вайѐсыз борды кырмиськиллям. Турникын кадь соос ӟечырало. Йыркобы шузи куараен дугдылытэк серекъя. Обыдалэн нырыз бадӟым но горд-горд луэмын. Йыраз со кӧня ке куака тылы юнматэм, индеец кадь. ОБЫДА (Писпу бордысьтыз лэзиськыса.) Тырмоз, мусокае, эн серекъя, Сотэк но дырекъя мынам сюлмы. Кытысь-о та шимес сильтӧл потӥз? Кинъѐс-о асьмеос вылтӥ озьы, Ракетаос музэн зыр бергаса, Буре но паллянэ лобатӥзы? ЙЫРКОБЫ Со нылъѐсмы, инмез кымалъяса, Кылбурчизы понна жугиськизы.

ОБЫДА Тон мар-о оломар вераськиськод? Мынам нылы жугиськыны уг тод! ЙЫРКОБЫ Малы, иське, тон кормаськод нырдэ? ОБЫДА Уг тодӥськы, малы ке но лыдэ… ЙЫРКОБЫ Тынад ни со сяртчы кадь будэмын… ОБЫДА (Горд нырзэ кутылыса.) О, нагалят, зэмзэ но пыктэмын… ЙЫРКОБЫ (Серекъяса.) Нош табере тодад, оло, ваѐд, Малы нырыд мертэтъѐссэ уг шӧд? ОБЫДА (Туж мур малпаськыса.) Веднаськизы… Нылъѐс веднаськизы… (Мыдлань-азьлань бызьылыны кутске.) Веднаськизы бере, жугиськизы… Ведь табере соос шушомозы — Парсьлы я ишанлы берытскозы!.. Нош кудзы вормизы? Я, вера, чѐрт!

Пелез вандӥсь, ӟизгетӥсь крезьгур вӧлъяське. Конгырчо кужымыз лябӟыса усе, нош ик ошиське. Йыркобылэн синберъѐсыз шузимем светофор кадь ӝуатскыло. ЙЫРКОБЫ Ӧйтӧд, ӧйтӧд, ӧйтӧд, ӧйтӧд, ӧйтӧд, Ӧйтӧд, ӧйтӧд, ӧйтӧд, ӧйтӧд, ӧйтӧд… ОБЫДА (Йыркобы борды кизэ йӧттэ. Соизлэн синберъѐсаз ӵуж тылъѐс воректо.) Паньги? ЙЫРКОБЫ (Вож тылъѐссэ ӝуатыса.) Мар, мар, Лѐги? Мар тон шуид? ОБЫДА Малы кикы кадь сильыны кутскид? ЙЫРКОБЫ (Нош ик тылъѐсыз кысо.) Ӧйтӧд, ӧйтӧд, ӧйтӧд, ӧйтӧд, ӧйтӧд… ОБЫДА Паньги, тон мар? Кытын-о тон али? Обыда нош ик йыркобы борды йӧттӥське. Соизлэн ӵуж тылъѐсыз ӝуатско. ЙЫРКОБЫ Йырам ветлэ кыӵе ке кенӟали…

ОБЫДА Кыӵе-о кенӟали отчы пыроз, Мынам киы бордад йӧтскиз, луоз?.. ЙЫРКОБЫ (Вож но горд тылъѐссэ ӝуатыса.) Уг тодма шат мон тынэсьтыд кидэ, Йырам кин ке ыстӥз кенӟализэ… ОБЫДА Кин-о отчы ыстоз кенӟализэ? ЙЫРКОБЫ Со мурт, кудӥз вуриз солэсь ымзэ… ОБЫДА (Малпаськыса. Палэнэ.) Йыраз ветлэ кыӵе ке кенӟали, Вылаз ик ай ымыз, пе, вуремын… Татын мар ке уг кельшы ни мыным… ЙЫРКОБЫ Нош кормалод-а тыбырме, Лѐги? ОБЫДА Кызьы уг корма мон сое, Паньги… Ошиськыса улӥсь йыркобыез корманы кутске. Соизлэн тылъѐсыз шудыны кутско. ЙЫРКОБЫ А! А! Ай-ай! А! А! Золгес, мусокае… Ай-ай, кыӵе умой, кыӵе умой, кыӵе умой...

(Чалме. Тылъѐсыз кысо.) ОБЫДА О, мусое мынам, изь, изь… (Ошиськыса улӥсь Конгырчолы.) Нош тон Малы сосиска кадь отчы ошкид? КОНГЫРЧО Ма асьтэос ук косӥды… ОБЫДА Молчать! Я султы ай ӝоггес караулад! КОНГЫРЧО (Чорк! гинэ султэ.) Есть! Эксэе мынам! ОБЫДА Вот, сыл озьы! Нылме мон утчаны ветло… Валад? КОНГЫРЧО Так точно, эксэе мынам! ОБЫДА (Кизэ пель дораз поныса.) Мар ке урод мон кылӥсько тонэ… КОНГЫРЧО (Туж зол кеськыса.) Так точно, эксэе мынам!

ОБЫДА Вот, нокин но медаз корма сое! Мукетъѐсыз ке йӧтскизы бордаз, Со выльысен секытаны кутскоз, Музъем вылэ усѐз. Али нош со Тӥни кыӵе чылкыт, кыӵе капчи… Инмар кадь со, шунды кадь тылсия… Соин ик нокинэ эн лэзьы со вӧзы! Марысь-мар ке, кияд карабинэд, Тон ыб но кушты соосты, валад? КОНГЫРЧО Так точно, эксэе мынам! Обыда нош ик кизэ пельдораз понэ. КОНГЫРЧО (Эшшо но золгес кеськыса.) Так точно, эксэе мынам! ОБЫДА Умой! (Старослужащий солдат кадь, Конгырчолэсь езэ эскере, воротниксэ, котыртӥз котырске.) Но тод огзэ, пие… — та нылкышно Мозмиз ке, дуннемес ик бералтоз, Адлы сое пӧрмытыса куштоз. Вылаз ик табере солэн йыраз Кыӵе ке кенӟали, пе, каръяськем…

КОНГЫРЧО (Туж зол кеськыса.) Так точно, эксэе мынам! ОБЫДА Умой! Тон кельшиськод мыным таӵе дыръяд! КОНГЫРЧО Служитьтӥсько аслыз Обыдалы! ОБЫДА Вот, вот! Озьы ик служитьты, салага… Нош мон пыро ай со дуннеосы, Кудзэ тон шуиськод «уйвӧтъѐсы»… КОНГЫРЧО Так точно, эксэе мынам! Обыда медитацие пуксе. Инбамысь кияз бубенэн но пельпумаз кенӟалиен, задник вылтӥ вамышъяса ваське Эбрай. Со шаман кадь дӥсяськемын. Васькемез бере Эбрай шӧдтэк шорысь шимес куараен кеське но бубензэ кокаса эктыны кутске. Обыда, кытчы пырон инты шедьтытэк бызьылэмез бӧрсьы, дунне писпу сьӧры ватске, собере йырзэ каллен гинэ поттыса пал синмыныз учке. Конгырчо Эбрайлэн эктон тактэз улсын я карабинзэ кияз кутылэ, я гипнозэ усьылыса кадь нурылыны кутскылэ. Обыдалэн но мугорыз эктыны ӧдъя. ЭБРАЙ (Эктыса, бубензэ кокаса кесяське.) Хумбаба убу-убу! Хумбаба убу-убу! Хумбаба убу-убу! Хумбаба убу-убу! Хумбаба убу-убу! Хумбаба убу-убу!

Хумбаба убу-убу! Хумбаба убу-убу! ОБЫДА Паньги, Паньги, пумтэм шумпотонэ, Вера мыным, кин эктытэ монэ? ЙЫРКОБЫ (Синъѐссэ ӵуж, вож тылъѐсын ӝуатыса.) О, нагалят, мынам со ӝутсконэ! Эбрай вуиз мозмытыны монэ! ОБЫДА (Сайкиськыса.) Эбрай! Мынам быдӟым эмеспие! (Эбрай азе бызьыса потэ). ЭБРАЙ Ӧвӧл, эше, шудӥм ни со рольдэ! Одӥг бугор инме кык пол уг туба. Тон вунэты табре ас дуннедэ, Табре мон — Гильгамеш, нош тон — Хумбаба! Эбрай вылӥ дӥськутъѐссэ куштэ но Обыдаез дӥсятэ. ОБЫДА Валай, Эбрай, табре тон — Гильгамеш… Нош мон — Хумба-буба… Хумбу-абу … (Кӧня ке малпаськемез бере пыдес вылаз усе.) Жаля, пие, эн кар монэ Хумба-бубу… ЭБРАЙ (Сое султытыса.) Хумбаба со — кедраосты возьмась!

Нокин тонэ уз кар хумба-бубу… Хумбаба со эктэ, кырӟа, шула: (Шултэ но, гадяз кокаса, пыдыныз шуккылыса возьматэ.) Хумбаба убу-убу! Хумбаба убу-убу! Хумбаба убу-убу! Хумбаба убу-убу! ОБЫДА (Эбрай кадь.) Кумабаба бубу-бубу! Кумабаба бубу-бубу! Кумабаба бубу-бубу! Кумабаба бубу-бубу! ЭБРАЙ (Кымысаз шалбан сѐтыса.) Тон юри-а вожме поттытӥськод? Кызьы косӥ озьы ик кырӟаськод! Мукет кылыд тынад ӧвӧл! Валад? ОБЫДА (Кышкатскыса, вань кужмысьтыз.) Хумбаба убу-убу! Хумбаба убу-убу! Конгырчо дӥсьтытэкгес серектылэ. ЭБРАЙ Вот, котьку но озьы гинэ луоз. Валад? ОБЫДА Хумбаба убу-убу! Хумбаба убу-убу! Конгырчо дӥсьтытэкгес серектылэ. ЭБРАЙ Шонер кылбур шузи-мази уг лоба,

Шонер кылбур шӧдэ ас крезьгурзэ. Мон малпасько, валад, кин со — Хумбаба, Нош Гильгамеш — со ожгарчи-эксэй. (Обыдалэсь дунне писпу бордысь короназэ изьыя.) Табре мон эксэед тынад, абу? ОБЫДА Хумбаба убу-убу! Хумбаба убу-убу! Конгырчо куараен ик серектэ. ЭБРАЙ Вот одно ик озьы, талант со ӝог пыре! Нош кытын ай мынам светофоре? ЙЫРКОБЫ Татын, Эбрай, татын мынам доре… ЭБРАЙ (Йыркобыез адӟыса.) Ой, ѐ-моѐ! Нош мон ке малпасько, Кинъѐс та пель сьӧрам весь верасько? Ух, зол пуке тынад мавзолеед, Таиз, шӧдске, зэмос часовоед?! ОБЫДА (Шумпотыса султэ.) Так точно, Эбрае — часовое! (Конгырчолы кӧтурдэсаз донгыса.) Мар-о ӟудӥд, я, ӟечъяськы, салага… КОНГЫРЧО (Карабинзэ мугор котыртӥз Иккетыны кутске.)

бергатъяса

чорк-чорк

султэ.

Ик! Чик-чирик, кирдык ку-ку! Скоро дембель старику! Ик! ЭБРАЙ Тон учкы ай, кедра возьмась малай! Со уставез но туж умой тодэ! ОБЫДА (Шумпотонэныз синвуаськыса.) Тодэ, Эбрай, тодэ! ЭБРАЙ Я, генерал, Эн будэты нырдэ… КОНГЫРЧО И-и-и-ик! ЭБРАЙ (Конгырчолы.) Мар тон сиид, Мар ке курег зын тон бордысь лыктэ?.. КОНГЫРЧО (Викыштыса.) Со дембель-квартирант Кумбаба, Монэ… ЭБРАЙ Я, я, олокытӥ эн лоба, Кутскид ке, вера, вера кышкатэк!

КОНГЫРЧО И-ик! Со дембель-квартирант Кумбаба Та йыркобы доры лыктӥсь Куакаосты монэ ыбылытэ — Медаз, пе, исалэ йыркобызэ. Нош собере котькуд ӝытэ… Салага шуыса, весь кышкатэ — Куакаосын гинэ монэ сюдэ… ЭБРАЙ Куакаосын гинэ тонэ сюдэ? КОНГЫРЧО (Вань кужмысьтыз.) Так точно, эксэе! ОБЫДА Куака сыӵе ик со курег… ЭБРАЙ Молчать! Нош тон малы чалмид ай, Йорике? ЙЫРКОБЫ Мон учкисько, кытчы та йыръяське… Мыным но тон уд йыбыртты, шӧдске … ЭБРАЙ Конфликт ке вань, номыр уг йыръяськы, Конфликт ке вань, улон азьланьтӥське… (Кортӵогзэ поттэ.) Зэмос улон — со толлозэ быдтон —

Озьы мыным шуэ квадрат усьтон! КУАРА Сое лэсьтӥд ке, мар али малпад, Нагалятлэсь уд мозмиськы ни тон. Выльысь та дуннее тон вордӥськод, Пумтэмлыке тон ноку но уд пот. ЙЫРКОБЫ Шонер вера тынад эмиссаред, Таӵе учыр огпол гинэ луэ, Монэ ӝутӥд ке тон, потод кыре, Ноку-ноку уд сюры шайгуэ. ЭБРАЙ Малы мыным — лултэм пумтэмлыкед? Мынам вордӥськеме потэ выль калыке, Кудӥз ноку уз ул толлоеныз, Кудӥз шудо луоз туннэеныз. Кудӥз луоз чылкыт но туж мусо, Кудзэ ноку уз турналты кусо, Кудӥз пӧлын котьку вордӥськозы Зэмос ожгарчиос, зэмос эшъѐс, Кудӥз пӧлын котьку но сюрозы Лул сяськаез утись Гильгамешъѐс! Соин ик пытса тон курег ымдэ Но сѐт ни куакалы сисьмем визьдэ — Вай, утчалом ай, мар тонэн луоз, Кымес шорад тае бышкалтыса? Сыӵе усто со тон пушкы пыроз, Сыномондэ аслыд возьматыса! Я, шымырскы, пространство, тэтчы, дыр! Мед табере ӵашъѐс ачиз учыр!

(Бышкалтыны турттэ.) ОБЫДА О, сюлэмы-кӧты! Уг яра, эн дӥсьты! А-аааааааааааааааа! (Эбрай вылэ тэтче но кортӵогзэ басьтыса яр сьӧры ыргытэ.) А-аааааааааааааааа! Хе-хе-хе! Озьы гинэ уз лу ай со, эке, Малпад, Кумабаба карид ни ке, Мынам киям ӧз кыль ни санике?.. (Йыркобылы.) Паньги, мусокае, адӟид-а тон, Кыӵе луэ зэмос со яратон?! ЙЫРКОБЫ Мар та монэн, ох, кыӵе рай! Мар тон монэн карид, Эбрай?.. Йыркобы инме лобӟыса кошке. Обыда ымзэ гинэ усьтыса кыле. ЭБРАЙ Эх, валантэм тон куддыръя, сюлэм. Тонэ нырысь бышкалтоно вылэм. Йыркобыяд, шӧдске, пыриз ни лул — Мын, табере ачид ни соин ул. Обыда кияз йыркобыез кутыса кадь эктыны кутске. Яр сьӧрын ворекъяло тылъѐс. Экран вылын цивилизацилэн азьланьсконъѐсыз сярысь сюжетъѐс возьматскыло. ОБЫДА (Эктыса.) Эшшо кызьы мон табере уло —

Со табере монэ ӟыгыръялоз! Ческыт кылъѐсыныз мусоялоз, Нуныялоз, мусо серекъялоз! Котькуд ӵукна сое мон вешало, Вань гопъѐссэ солэсь мон чупало… Гудыриос, тылворекъянъѐс бырем бере, яр сьӧрысь воргорон тусъем луыса потэ Йыркобы. Солэн гадяз бадӟым зарни кирос. Обыда но, мукетъѐсыз но интыязы кынмо. ЭБРАЙ Шӧдске, улӟиз тынад Йыркобыед… Оло картэд, оло нош кышноед… ЙЫРКОБЫ О, кыӵе кайф, Эбрай! Друган! Луоз, Луоз табре дунне — мынам киям! Век воли не видать мыным, Эбрай, Озьы ӧз луы ке! Табре лыктод, Ачид лыктод тон мон доры! Империя, мон табере, валад?! Ачим табре мон рай но ад! (Обыдалэн йыртышказ васькытыса.) Нош тон, Кума-баба, тон – ляльчие! Я кискаче луод, я качые! (Кытчы ке ярдур сьӧры шултэ.) Кортӵог, эн кыльы сьӧрысьтым! Я, мон кошки, эшъѐс, ужъѐс туж трос! Кылэз так быдтыны жаль потэ ым, Эх, лобӟы азьлане тон, шай корос! Йыркобы тӧл пери кадь кошке. Яр дур сьӧрысь олокызьы гинэ потэ Кортӵог мексиканской шляпаеныз.

ЭБРАЙ Таиз, шӧдске, улӟиз ини Кортӵог. КОРТӴОГ (Шляпазэ Эбрай азе куштыса.) Система нипель, пыртонзэ пыртод, Нош поттонзэ ке, киреньзэ поттод! Тау, Эбрай, мон ӟеч шудо рольдэ, Адӟод, кызьы со выль улон пульдэ! (Обыдалы.) Эй, Кумбаба, тон ӧд кылы шат, Мар-о тыныд шуиз Империя? Тон табере Кумбаба но ишак, Тынад вылад пуксѐз Империя! (Берпалаз ӵыже.) Кошким ӝоггес отчы, чуко-беко, — Кытын улон ачиз кадь зэмлыко! Я, кырӟа ай, кызьы кырӟа Кумбаба: ОБЫДА Хумбаба убу-убу! Хумбаба убу-убу! КОРТӴОГ Золгес но шулдыргес, кедра возьмась! А то синмад пежъян мон бышкалто! ОБЫДА Хумбаба убу-убу! Хумбаба убу-убу! Хумбаба убу-убу! Хумбаба убу-убу! Кортӵог, эшшо но золгес ӵыжыса, Обыдаез сцена сьӧры лобӟытэ. Ачиз но со сьӧры тӧлпери кадь кошке.

ЭБРАЙ «Приплыли» нимаське таиз суред… КУАРА Сценарийлэсь кошкид кадь тон, поэт… ЭБРАЙ Мон ивортӥ али луэм фактэз — Загадка со, кызьы пуштэ пуртэс: Малы Кармен воргоронэн шудэ, Малы Отелло сяськазэ быдтэ, Малы-о Моцартлы Сальери вань, Малы улон ӵемысь мынэ мыдлань. Мае ватэ со вашкала куала — Кин-о сое та дуннеын вала? Куалялюльы пушкын ке Минотавр, Тон луыны кулэ така-бака, Яке ыж-парсь, яке бака-куака. КУАРА Малы сое тодын тон турттӥськод, Отчы пырид ке, тон отысь уд пот… Юнме лэзид кадь тон тэльбугодэ, Кызьы тон эскерод Йыркобыдэ? ЭБРАЙ (Кисыысьтыз вурем синмо кенӟализэ поттэ. Кеӟализэ пель дораз нуэ.) Эн сюлмаськы, созэ но мон чаклай, Мон адскисьтэм кари тэльбугоме… Солэн йыркобыяз мон печатлай Вурем ымо пересь кенӟалиме.

Со табере вань малпанзэ солэсь Вурем синмо сузэрезлы вера. Нош сузэрез солэсь вань верамзэ Мынам пелям лушкем кыла-бура. Ваньмыз мынэ мынам малпамея… КУАРА Кин дышетӥз тонэ со амаллы? ЭБРАЙ Одӥг куко ведӥн песятае. (Конгырчолы.) Выль праздникен тонэ, часовое, Эрик шокыштонэн ӟечкыласько! КОНГЫРЧО (Зол кеськыса.) Аслыз Гильгамешлы служитьтӥсько! ЭБРАЙ Кинлы, кинлы озьы служитьтӥськод? Кинэ-о табере тон возьмаськод? КОНГЫРЧО Уг тодӥськы. ЭБРАЙ Тон эрико табре, Тон нокинэ уд возьмаськы, валад? Мар ай сыӵе нош юамед потэ? КОНГЫРЧО Эбрай, уд тодмаськы шат тон монэ?

Мон, Конгырчо… Сарачаяд улӥ… Мучололэн апаезлэн пиез… ЭБРАЙ Мучололэн апаезлэн пиез… Тон атайдэ вунэтэмед, шӧдске… Тыныд юбка кулэ вал сѐтыны, Уд сылӥськы тон ожчилэсь дӥсьсэ! (Конгырчо пыдес вылаз усьыны турттэ. Эбрай сое берен султытэ.) Эн дӥсьты мон азьын конгырскыны — Воргоронэз уг чеберты ляльчи! Тон вордскемын татчы ожмаськыны – Ожчи луид ке, лу ини ожчи! Туннэысен тон Косьтонтэй луод! КОНГЫРЧО Тон Инмаре мынам! ЭБРАЙ Ачид шуид… Евангелиеын ӧй вал на таӵеез глава. Ӝоген аслад синъѐсыныд адӟод, Кызьы лулмы та дуннеын ӝуа. Пеймыта.

КЫКЕТӤ СУРЕД Пазьгиськем мунчо сарача. Татын ик Арктика но, татын ик экваториальной полоса. Пото Майтал, Копар, Таз, Мучоло, Жуг-Жаг, Сэрегпум. Соос Эбрайлэн дӥсьѐсыныз дӥсяськемын – кин кызьы но мае вылаз кыскыны быгатэм ини, калгись клоунъѐс кадесь адӟисько. Киосазы Эбрайлэн чемоданъѐсыз, съѐмочной аппаратураез. МУЧОЛО. Кыӵе эрик, кыӵе эрик пелля! ЖУГ-ЖАГ. Дано мед луоз демократия! КОПАР. Ох, кыӵе зол! «Ох, макем та чебер улон»,— шуиз вал Кобо Абе! Татын ик Арктика, татын ик тропика, субтропика! Экватор но азьын шукыяське! Эдем садын кадь кактусъѐс, лианаос, магнолиос сяськаясько! Попугайѐс Ямайкаын кадь тюргето! СЭРЕГПУМ. Крокодилъѐс ветло, кыйѐс – кор зӧктаесь… Нош кыӵе ке сяська пичи гинэ монэ ӧз ньылы… ТАЗ. Уждэс эн вунэтэ, эшъѐс… Мынам кошелеѐке со пыдэстэм ӧвӧл… (Калькуляторзэ поттэ, лыдъяны кутске). МАЙТАЛ. Эй, эй! Всѐ, дугдэлэ! Тани татын ик ваньзэ лэсьтомы. Талэсь но чеберзэ инты уд шедьтэлэ. ТАЗ. Сизьым миллион вылэ кык но ӝыны лимон ке ватсано – со луэ укмыс… О-о, укмыс но ӝыны… Эшшо ӝыны апельсин ке ватсано со луэ укмыс… Ӧвӧл, дас… Дас! МАЙТАЛ. Ма, берытскоз со Таз! Эн кышка тон, со ваньмыз берыктоз! Эй, Сэрегпум, вай мон доры ӝоггес чемоданэз! Нош тон, Жуг-Жаг, мын султы ай тӥни труба доры! Копар, кытын-о декорация?! Тон, Сэрегпум, тылъѐстэ югдытыны эн вунэты! СЭРЕГПУМ. Нош ӵынъѐсты ку лэзѐно? МАЙТАЛ. Созэ ачим мон верало. Тон, Мучоло, «фанераез» лэзѐд. Копар, всѐ, кут кияд объективдэ! (Громкоговорительзэ поттэ.) Всѐ, кутскиськом! Раз, два, три, четыре, и —… ЖУГ-ЖАГ

(Кырӟаны кутске.) Мунчоям кортӵог шукки но Штаниме отчы оши. Собере эшшо шукки но Лифчикме оши… МАЙТАЛ. Стоп, стоп, стоп! Тон, мар, Жуг-Жаг, в натуре? Тон шузимид-а мар-а? Кин-о нырысь трусиксэ оше? Нырысь дэремез ошо, бӧрысь ини – трусикез. И собере… мар тон озьы сылӥськод танцплощадкаын кадь? ЖУГ-ЖАГ. Нош кызьы мыным сылоно? МАЙТАЛ. Мунчоын кадь сылоно, мунчоын кадь! ЖУГ-ЖАГ. Кызьы мунчоын кадь? МАЙТАЛ. Тон мар, ноку но мунчое ӧд ветлы-а мар-а? ЖУГ-ЖАГ. Ветлӥ. МАЙТАЛ. Нош кызьы мунчоын тон сылӥськод? ЖУГ-ЖАГ. Смотря кинэн ведь пыриськод… СЭРЕГПУМ (чидатэк). Бускеленыд тон пыриськод али, бускеленыд! ТАЗ. Кыӵе бускеленыз? Кыӵе бускеленыз? СЭРЕГПУМ. Ну, кудӥз гожтэмын отын! Тон мар-о, Таз? ЖУГ-ЖАГ. Ну, бускелен ке, валамон… МАЙТАЛ. Кыӵе бускель? Кыӵе бускель? Тон огнад на, огнад на мунчоын! Собере ини отчы бускель пыре! МУЧОЛО. Майтал, мынам гениальной дэмланэ вань… Солэн кияз кортӵогъѐс сѐтоно…Собере… Собере… маин ай со отын шуккылэ вал? КОПАР. Тӥрен. (Сэрегпумлэсь). Кызьы-о со тӥрен шукке? Кызьы-о кортӵогез тӥрен шуккод? СЭРЕГПУМ. Тышкыныз! Тани тазьы – тышкыныз! МУЧОЛО. Вот, тӥрлэсь тышсэ солы сѐтоно на! СЭРЕГПУМ. Веник но сѐтоно, веник но! Ато кызьы со, мунчо, вениктэк луоз? МУЧОЛО. Вот, вот, нырысь со кортӵогзэ шукке, собере отчы трусиксэ оше.

Таз пӧсям вуоссэ ӵушылэ ни. МАЙТАЛ. Кыӵе трусик, кыӵе трусик?! Нырысь со дэремзэ оше! МУЧОЛО. Бен, озьы… нырысь со дэремзэ оше, нош собере веникен шонаса ассэ ӧжытак веша… МАЙТАЛ. Кортӵоген но тӥрен со умой уз адӟиськы. Озьы со чурыт луэ, нош татын туж ненег кырӟан… МУЧОЛО. Иське, со кортӵогез туж ненег пыртоно… СЭРЕГПУМ. Пыртэ…Кин-о кортӵогез пыртэ?! Сое шукко! Сое тӥрен, яке чӧкисен, яке изэн шукко! МАЙТАЛ. Малы-о асьмелы кортӵог кулэ? Малы кортӵог, в натуре?! КОПАР. Кызьы-о тон, Майтал, уд валаськы?.. Та кырӟанын ваньмыз ук кортӵог бордын возиське. Кортӵогтэк со ваньмыз ышоз. МАЙТАЛ. Ярам, ярам…Иське, тон, Жуг-Жаг, озьы карод: оло ке, тон кияд кортӵог кутӥськод но, оло ке, тӥрен сое шуккиськод. МУЧОЛО. Нош собере астэ, оло ке, веникен вешаськод. СЭРЕГПУМ. Эн вунэты трусиктэ, оло ке, куштыса ошыны. КОПАР. Нырысь дэремзэ. СЭРЕГПУМ. Со блузкиен ук. МАЙТАЛ. Иське, блузкизэ мед куштоз. Нош собере – лифчиксэ. ЖУГ-ЖАГ. Нош мынам лифчике ӧвӧл…Трусике но ӧвӧл… МАЙТАЛ. Но тон ведь сое, оло ке! – куштӥськод! Оло ке! ТАЗ. Ойдо ни, эшъѐс, кутске ни, кутске. (Пӧсям вуоссэ ӵушылэ). Дыр бызе. МАЙТАЛ (громкоговорительзэ кутыса). Всѐ, кутскиськом! Раз, два, три, четыре, и-… ЖУГ-ЖАГ Мунчоям кортӵог шукки но Трусикме отчы оши. Собере эшшо шукки но Лифчикме оши…

МАЙТАЛ. Стоп, стоп, стоп! Малы нош ик трусик, нырысь лифчиктэ ошиськод, собере трусиктэ! Сцена вылэ лобе скамья. Кытысь ке усе трон, ӝӧк. Лобе миндэр, веник, ӵужон. Тӧлъѐс вузыны кутско. Чилектэ, гудыртэ. Кыӵе ке пиратской знамяез кутыса, берпалаз ӵыжем мурт кадь, потэ Обыда. Со сьӧры Кортӵог но Йыркобы. Обыда знамязэ трон вӧзы бышкалтэ но кытысь ке кыскыса поттэ кыӵе ке декорациез. Со аспӧртэм куинь борддоро маке. Одӥг борддорез солэн залысь зрительѐс пала учкоз, нош мукетыз сцена вылын шудӥсьѐслэсь висъялоз. Зал пала учкись борддораз вань на пичи укноез. КОРТӴОГ. Кин-о отын монэ сыӵе ненег шуккылэ, штаниоссэ ик йыр вылам ошылыса? О, Клеопатра! Клѐво, клѐво кырӟаськод! Кытӥысьтыд-о куараед тынад потэ! (Блузкизэ кыскыса гадяз учке). О, кут монэ, Маэстро, пограсько! (Мучололы). Нош тынад кыӵе чебересь бабляосыд! Культура кадь тылсияськод! (Кутэ но чупа). (Майталлы). Эн учкы мон шоры озьы, ато синмад пежъянэн бышкалто! (Тӧлпери кадь вань поттылэм арбериоссэ интыосаз пуктылыса ортче. Обыдалы берпалаз ӵыжыны вуэ на. Пичи корка пушказ но пыра. Укнотӥз учке, борддор вылтӥз кечырскыса учке.) Мон дась, Маэстро, можешь кутскыны – система нипель радъямын! ЙЫРКОБЫ. Ӟечкыласько эрик шокыштонэн! Мон периды тӥляд луо – Империды! Тон Президент луод, Шампунь… МАЙТАЛ. Мынам нимы – Майтал… ЙЫРКОБЫ. Какая разница: Майтал-а тон, Шампунь-а? КОРТӴОГ (электрошокен сое обработать карыса). Ӧй кылы мон, мар, мар шуид, нимыд тынад Майтал? МАЙТАЛ (ымтӥз шукы поттыса). Шампунь, Шампунь, Шампунь… КОРТӴОГ. Я шу ай: «А-а-а…» МАЙТАЛ. А! А-а-а-а…

КОРТӴОГ. Вазер пиньыд мыным уггес кельшы…Ничѐ, созэ ишкалтомы но фикса пономы…Образованиед кыӵе? МАЙТАЛ. Куинь коридор… КОРТӴОГ. Ничѐ, тынад куинь дипломед луоз… Вылаз ик иностранной кылъѐсты тодод на ай… Кошким сьӧрам. (Бӧлемаз пыре. Майтал солэн бӧлем азяз дугдэ). Пото Эбрай но Конгырчо. Соосты нокин уг адӟы на. КОНГЫРЧО О, тӧлпери, кыӵе вал со кужмо! Дано мед луоз со — Эрико тӧл. Куашказ тиран! Калык ульчаосын кырӟа! Ну табере сяськаяськоз шаер! ЭБРАЙ Вазьгес ай, Косьтонтэй, тон кырӟаськод… Попугайлы али тон кельшиськод. Я, сыл ай, пие, дугды, учкомы, Кыӵе меда луоз солэн сюлмыз… МАЙТАЛ (сьӧрлань чигнаса). Малы-о, тазаесь ук пинъѐсы мынам… КОРТӴОГ (оломар быдӟа пинь кысконзэ поттыса). Кошким, кошким! Президент чебер со луыны кулэ – чебер пальышаны мед быгатоз! (Чырты бертӥз кыскыса пыртэ аслаз бӧлемаз). Кылӥськыны кутске Майталлэн кӧшкемыт кесяськемез. КОРТӴОГЛЭН КУАРАЕЗ. Бадӟымгес усьты ымдэ! Бадӟымгес усьты, шуисько! Ато кылдэ ишкалто! Уд вала ни, кудзылэн куараез золгес кылӥське. Туж кӧшкемыт соос кесясько. Сое кылыса, Йыркобы но шымырскылэ. Обыда олокызьы но

позыръяське ни. Нош сцена вылысь геройѐс сярысь веранэз ик ӧвӧл: соослэн киосысьтызы арбериоссы ик усьылыны кутско. МУЧОЛО. Ой, инмаре, лулы-кӧты… Майтал, мусокае… (Йырсазьзэ ыштыса пограны кутске. Ваньзы сое куто.) Кортӵоглэн бӧлем вылаз ӵабъяськыса тубе Майтал. Нырысь киыз адӟиське, бӧрысь йырыз. Йырсиосыз солэн тӧдьы-тӧдьыесь но сылӥсесь луиллям ини. Сое нош ик кортӵог берен кыске, лэся. Кӧня ке улыса ваньмыз чалме. Потэ Кортӵог. Киыныз Майталэз ӧте. Потэ Майтал. Пизь кадь кудӟемын. Йырсиез туж ӟеч сынамын. Нош костюмез солэн зэмзэ но кыӵе ке президентской – выль модая шуода мар-а. Майтал ӧжытак гинэ губырске но, Кортӵог сое шуак шонертэ – токен, лэся, шуккыса. Майтал нош ик шузи пальышаны кутске. МАЙТАЛ (киыныз солань-талань шонаса). Ӟечбуресь, россиянъѐс… Кортӵог Майталэз кузь ӝӧк сьӧрын сылӥсь тронэ пуктэ. ЭБРАЙ Чебер пальышаны кутскиз, куанер. КОНГЫРЧО Сыӵе ик луыны кулэ солы, шонер! Ох, кыӵе ӝог, чебер ужа система! ЙЫРКОБЫ. Тон, Тазик Безразмерной, Мина-Финамы луод… ТАЗ (куалекъяса). Малы-о Мина-Финады? Кулэ ӧвӧл, мынам уг пот… КОРТӴОГ. Татын юан уг сѐткало! Валад? Кошким! (Тазэз китӥз кутыса сьӧраз пыртэ). Йыркобы шымырске. Мукетъѐсыз пельѐссэс ӵоктало. Обыда ньыль пыд вылаз бызьылыны кутске. Вунэтӥськем вераны – сое нылкышно дэремен дисятӥллям ини.

ТАЗЛЭН КУАРАЕЗ. Ой, ой, ой! Бичие потэ… Хо-хой-хой! Ой, ой… Ай-ай! КОРТӴОГЛЭН КУАРАЕЗ. Вот, вот, озьы. озьы… умой… ЖУГ-ЖАГ. Ой, кутэлэ монэ, эшъѐс… Жуг-Жаг пограны кутске. Сое куто. КОРТӴОГЛЭН КУАРАЕЗ. Тапалгес берытскы! Тазлэн йырыз зал палась укнотӥ мычиське. Синъѐсыз бадӟымало. «А-а-а!»,— кеське со. Нырулысьтыз мыйыкез усе, бакенбардъѐсыз усѐ. Кортӵог зал пала шуак гинэ потэ но ымдуръѐссэ солэсь помадаен зыра, пельѐсаз угыос оше. КОРТӴОГ. Луиз. Мар сылӥськод на ай, кошким… ТАЗ. Кызьы луиз? Сыӵе-а ӝог? КОРТӴОГ. Я, пот ни, пот, тырмоз…Ческыт со, пичиен ческыт… Таз потэ нылкышно костюмен. Кортӵог сое ӝӧк сьӧры пуктэ. КОНГЫРЧО Со воргорон вал ук… Кызьы озьы, Эбрай? ЭБРАЙ Табре, шӧдске, луиз со трансвисти… Озьы, вылды, системалы кулэ… КОНГЫРЧО Ничѐ, ничѐ, озьы со умойгес но ай, Калык коньдон ӟеч лыдъямын луоз! ЙЫРКОБЫ. Тон малпаськод, солэсь пӧрмоз-а Мина-Фина?

КОРТӴОГ. Эшшо кызьы пӧрмоз! Тӥни ук синъѐсаз копейкаос ӝуатскизы ини. ЙЫРКОБЫ. Тон, ӵындӥсь пис, монах луод – архиепископмы милям. Калык праздникъѐсты со яратэ, одӥг праздник но вот медаз кыльы, ятэ! КОРТӴОГ. Я, усьты ай пельдэ… (Пеляз бадӟым отвѐртка бышкалтэ но позыръяны кутске). СЭРЕГПУМ. Куку! Куку! Ку! Ку! Ку! Ку! Кука-ре-кук! Кук! Кук! Кук! Кок-Кок-Кок! Аллилуя! Аллилуя! Господи, прости меня грешного! Сьӧлыкоез, сьӧлыкоез простить кар монэ, Инмаре… Дим-бом! Димбом! Бо-бо-бо дим-дим! Бо-бо-бо дим-дим! В роще калина, тѐмно не видно, соловушки не поют … Ку-ку! КОРТӴОГ. Луиз. КОНГЫРЧО Зол! Гениально! Гениально! Туж зол! ЭБРАЙ Оло курег, оло кикы, оло атас… ЙЫРКОБЫ. Нош тон, Тыбыр Зырет… МУЧОЛО. Мон – Мучоло! КОРТӴОГ. Мар, мар? МУЧОЛО. Мон — Тыбыр Зырет, Тыбыр Зырет… ЙЫРКОБЫ. Туннэысен луод Минкультпривет! Кортӵог оломар быдӟа уколзэ поттэ. КОРТӴОГ. Вай, кушты штанидэ но бекырскы! (Штанизэ куашкатэ но небыт интыяз бышкалтэ). Мучоло нырысь кесяське, собере шузи серекъяны кутске, собере шуак чалме но штанизэ ӝутыса кырӟаны, эктыны кутске.

МУЧОЛО Наплевать, наплевать, Надоело воевать, Хата моя с краю, Ничего не знаю… Эх, яблочко, куды ты катишься, Ко мне в рот попадешь — не воротишься! Эх! Эх! Эх! Я! КОРТӴОГ. Тырмоз! Вуод на кырӟаны но эктыны. Пуксьы интыяд! ЙЫРКОБЫ. Нош тон, Копар Копарович дон-дон Кобыловна, милям учѐноймы но Бакалаврамы луод… КОРТӴОГ. Кӧня луэ кык пол кыкед? КОПАР. Ньыль! (Кортӵог сое электрошокен обработать каре, соиз зугыр куалекъя). КОРТӴОГ. Кӧня луэ кык пол кыкед? КОПАР. Вить… Вить! КОРТӴОГ. Тон мар-о, Бакалавра, шузимид-а мар-а? Кык пол кыкед луэ со – куать! КОПАР. Бен, куать, куать, куать, куать… КОРТӴОГ. Луиз,Маэстро! Нош ик кылиз на ай огез… Тазэ чеберайзэс уд веша шат? ЙЫРКОБЫ. Кызьы, кызьы-о Жуг-Жагез уд веша, Империлы кулэ уз лу шат Кегебеша? Кортӵог туж бадӟым тӥр кутэ но зугыр куалекъясь Жуг-Жаглэсь йырзэ пуклѐ вылэ интыя, чыртызэ поттыса йырсиоссэ палэнтэ, собере кияз сялӟе но тӥрзэ кутыса вань кужмысьтыз Жуг-Жаглэн йыр вӧзаз мертчытэ. ЖУГ-ЖАГ. А! А! А! А! А-а-а…

КОРТӴОГ. Синмыд пельыд умой медло, тӥред но сӥяса медаз вуы. Валад?! ЖУГ-ЖАГ. Валай, валай, валай! КОРТӴОГ. Мын, пуксьы интыяд! Всѐ, бирдыяй мон ваньзэсты, Маэстро! Правительствоед табере курант кадь ужалоз! Оло, Маэстро, табере пусъѐм таӵе ӟеч ужаммес? ЙЫРКОБЫ. Давай! КОРТӴОГ. Кошким, Хумабаба, провизия ваѐм! Обыдаен Кортӵог ящикъѐсын сиѐн-юонъѐс поттылыны кутско. Ӝӧк выл трос сиѐнъѐс кылдо, ӟенеликъѐс, приборъѐс. КОНГЫРЧО Ох, кыӵе зол! Ох, кыӵе юмор, а?! ЭБРАЙ Мура, пие, со, ваньмыз со мура! КОНГЫРЧО Тон пресьмид, шӧдске, Эбрай! ЭБРАЙ Ох, вож тулыс, ох, югыт май… ЙЫРКОБЫ Ойдо ини, Эбрай, ӝӧк сьӧрамы, Тыныд но приборъѐс ми дасямы… ЭБРАЙ Эн сына йырвизьзэ инмаредлэсь… Ваньзы серекъяло.

КОПАР. Царь Иудейской! Ха-ха-ха! СЭРЕГПУМ. Кызьы-о дӥсьтӥськод тон, дьявол? Сотона? ТАЗ. Сына, шуэ ук, йырвизьзэ сына… Хи-хи-хи! МУЧОЛО. Тон хам. Кытын тынад культураед?! МАЙТАЛ. Адӟом, кызьы тон кырӟалод на ай, быриз ке сиѐнэд… ЖУГ-ЖАГ. Оло, Соловкие сое, казѐнной харчаен, эсьма, улоз… КОНГЫРЧО Ох, кыӵе зол правительство! Кыӵе визьмо, кыӵе лэчыт! ЭБРАЙ Ӧвӧл на ай, пие, тынад синмыд… ЙЫРКОБЫ (Аслыз вина лэзьыса.) Эбрай, я мар-о тон, в натуре, Эн кыль отчы — Империя дуре… КОНГЫРЧО Оло, коть ӝамдэлы пуксѐм, Эбрай?.. ÝÁРАЙ Сыл интыяд, дырыд ӧз шуккы ай… Потэ Эбек. Со зугыр куалекъя. Йӧэн шобырскемын, лэся. Обыда бубензэ жугыса эктыны кутске. Со аспӧртэм крезьгур кадь, ритм кадь чузъяське татын. Ваньзы воштӥсько, ужрад ортчытон мылкыдлэн наркотической кужымезлы сѐтско. Йыркобы но Кортӵог кыӵе ке симфониез кылыса кадь эзыло. МАЙТАЛ. Так, так! (Печатеныз лаш карыса ӝӧк вылэ шукке).

ТАЗ. Витьтон миллион но куамын кык манет – Поволжие. Сизьым вагон саник – Удмуртие, ато сютэм кулӥськомы, шуо, тиф, пе, ветлэ. (Майтал — ту-дух, ту-дух! — печатьсэ шуккылэ). СЭРЕГПУМ. Храм пуктоно куамын куатьсэ. выжыеныз ик быдтоно. (Майтал — шуккылэ). КОПАР. Меркуриез Юпитере васькытоно. «Волгаосы» пуктылоно. (Майтал — шуккылэ).

Язычникъѐсты Чиновникъѐсты

МУЧОЛО. Бекмановез калык кырӟанъѐсты кырӟатоно. Чайковский удмурт гур мед малпалоз, иське, медаз улы Удмуртиын. Нош Быкова удмурт дэремъѐсын мед тэтчалоз! (Майтал — шуккылэ). ЖУГ-ЖАГ. Тӥрен кулэ! Тазэ ведраосын! Зырен! Сюлоосын! Таиз нош гильотина пумысен! Таиз кыӵес! Тазэ ачим ыбо! Тазэ газэн, тазэ токен. (Майтал — шуккылэ). ЭБЕК Ох, нош ик со ик суредъѐс! Кыӵе кезьыт, кыӵе татын кезьыт! Эбек кошке. Обыда озьы ик бубензэ жугыса эктэ на. Майталлэн печать шуккылэмъѐсыз кылӥсько. Правительство огез бӧрсьы огез бумагаос сѐтка. КОНГЫРЧО Кыӵе йырвизь! Кыӵе лэчыт йырвизь! Нош кыӵе механизм! Кыӵе дисциплина! Потэ Принцесса. Со быдэсак ӝуамын ни, лэся, жадемын. Призрак кадь ветлэ. Обыда позыръяськыны кутске кесяське. ЙЫРКОБЫ (Сазѐмыса.) Кортӵог, малы гурзэ воштӥз Хумбаба?

КОРТӴОГ Таӵе крезьгур мынам йырам уг лоба, Системаез басьтӥз кыӵе ке вирус, Мон номыре уг адӟиськы, Маэстро… Азям — сылэ эрвал но тылӝуа кадь Троя… МАЙТАЛ Вир, вир! Кытысь-о вир мынам киям?! Ӧй, мон тонэ ӧй ви! Кош сьӧрысьтым! Тырмоз, тырмоз! Ӧй ӝикаты ук мон, Ӧй виы мон тонэ, пичи нуны! МУЧОЛО (Вина юыса.) Ромеое мынам! Ӝоген пумиськомы… МАЙТАЛ Тон вӧсяськид-а, ӧд-а, Дездемона?! ТАЗ (Ваньзэ ас палаз кыскаса.) Уг сѐт! Уг сѐт! Мынам! Мынам! Мынам! Эй, Марфа, вай татчы со сюсьтылэз! Мынам та коньдонэ! Мынам! Мынам! ЖУГ-ЖАГ Ӧвӧл ни тон улэп! Тон ыбемын! Ачим, ачим тонэ ас киыным ыби! Кошкы татысь, эн ветлы мон сьӧрын! КОПАР О, Моцарт, кыӵе шудӥськод тон! Тыныд со огшоры кадь сѐтӥське!

Нош мон вань улонам курадӟисько. И мае со понна мон адӟисько?! СЭРЕГПУМ Ӧвӧл тон, инмаре, шустришь, братэ! Отын нумыр монэ сюпсѐз! Бен, атеист! Озьы монэ дышетӥзы! Нош тон, Кытын ачид вал тон? Бен возьматскы, Соку оско! ТАЗ Ӧвӧл, мон шуисько! МАЙТАЛ Кайся, Кассий! Курадӟы, пуны! ПРИНЦЕССА Я, мар-о, Инмаре, кари тыныд?! Малы-о нош ик со ик суредъѐс?! Кыӵе мыным ӝокыт, кыӵе ӝокыт! Принцесса кошке. Ваньзы асьсэ интыязы пуксѐ. КОРТӴОГ Система тупатскиз, лэся, маэстро! Кошкиз со вал, ӧз сѐтӥськы кадь Троя… КОНГЫРЧО Кыӵе поэзия татын! Йыр пороме! Корефанъѐс, ойдо ӵош уломе! Ӧвӧл, Эбрай, шӧдске, тон пересьмид, Мын вамышъя ачид такыр вылтӥд.

ЭБРАЙ Эсто мон мунчоме, пие, витѐ тонэ. ЙЫРКОБЫ Янгышаськод, Эбрай, уз ву ни со Ноку но тон доры. Татын ӟечгес солы… ЭБРАЙ Шуиз со: марӟанъѐс эн куя парсьѐслы… КОПАР О, Иудейской царь! Ваньзы серекъяло. Эбрай но пальыштэ. Потэ Эбек. Мукет паласен Принцесса. Обыда нош ик бубензэ кутыса тэтчаны кутске. ЙЫРКОБЫ Мар-о нош ик системаен, Кортӵог? Мар-о йырам тазьы нош ӟабыльтэ? Вурем ымо кыӵе ке кенӟали Йырме нош ик кытчы ке берыктэ… КОРТӴОГ Уг валаськы, монэ тӧлъѐс кыско… Фараонъѐс пеотъѐссэс сыско… Синъѐс азям шоналскылэ вал быж… Сьӧд шур вамен азе лыктэ кадь пыж… МАЙТАЛ. Так, так (печатьсэ кутэ). ТАЗ. Приватизация ласянь. Цветной металл. Таиз урал нефть заводлэн. Выль монополия ласянь. МАЙТАЛ. Мар-о отын шуо: кин, пе, царевичез быдтӥз?.. (Печать пуктэ).

ТАЗ. Калык шуэ: Малюталэн пиез… Шуо: со кулымтэ, выльысь улӟем но табере асьме вылэ ожчиоссэ ӝутэ… Латин попъѐс соин, пе, ӵош лыкто… ЖУГ-ЖАГ. Газэн сое, газэн яке токен мон пырсато! МАЙТАЛ (печать пуктыса). Куинь пол ыбид ни тон сое. Куинь пол ошид! Ӧвӧл со луыны кулэ улэп! ЖУГ-ЖАГ. Улэп на со, улэп! МАЙТАЛ. Мар, Цезарь, ветлӥськод сьӧрам… Ӧвӧл тыныд выль иворе мынам… (Печать пуктэ). СЭРЕГПУМ. Кош, сотона! КОПАР. Со Жуг-Жаглэн ужез! Солэн, солэн! ТАЗ. Нош ик сизьым вагон саник Казахстанэ! Уг сѐт, уг сѐт, уг сѐт! Мынам, мынам! МАЙТАЛ (ӝӧк вылэ тэтчыса, Йыркобы пала). О, Дездемонае мынам! Со тон понна ук, Яго, тон понна пуны! ЙЫРКОБЫ Кортӵог, мон номыр но уг адӟиськы… Кытын-о тон? Кытысь-о та сьӧд шур? Кытчы тазьы мон ялан усисько, Кытын пыдсыз, малы-о таӵе мур? МУЧОЛО. Тани кызьы луиз со Капулетти! Вот улӟыты табре егитъѐсты! СЭРЕГПУМ. Тон сотона! КОРТӴОГ Тае ваньзэ юри лэсьтӥз, дыр, Сфинкс… Кытысь юнме шорысь потоз та Стикс, Кытысь-о та кентавръѐс, кытысь Медуза, Кытысь Орей, кытысь та лапитъѐс? Кытысь потӥз Атлант, кытысь Паллада, Арей но Прометей, Ладон, Ехидна,

Химера но Борей, Беллерофонт, Грайѐс, Кытысь та титанъѐс но инмаръѐс, Пумтэм мер гурезьѐс, артанаос — Мае-о вераны туртто со пирамидаос?! КОНГЫРЧО Вот табере мон улӥсько! Вот табере мон шокасько! Эбрай кошке. ПРИНЦЕССА Мыным ӧжыт ке но кулэ вал лул салкым… ЭБЕК Кытын ке но ӝуасалыз ке тыл… ТАЗ. Сизьым вагон кортӵог солы, гадлы! МАЙТАЛ. Малы, малы, малы?! МУЧОЛО. Мед кырӟалоз удмурт кырӟанъѐсты! ЖУГ-ЖАГ. Майтал, оло ини сое тӥрен? Ялан улэп, улэп на со! КОПАР. Паллада, малы тон пиме синтэм кельтӥд? Вай сѐт солы кыӵе ке син! СЭРЕГПУМ. Мын, ви, Геракл, со кыез! Яблокъѐссэс но вай инмаръѐслэсь! ТАЗ. Эн сѐтэ быдтыны провизиез! МАЙТАЛ. Хе-хе-хе-хе! Монэ нош кельтӥллям… Эн курадӟы озьы Атлант, бурдоослы берытскизы нылпиосыд тынад… СЭРЕГПУМ. Хирон кулӥз! Хирон! Со тартаре ачиз тӥни кошке, конгыляса… Быдэс инкуазь сое учке, бӧрдэ… О, тон Кронлэн кескич пиез!

Обыда туж зол вузыны кутске. Шонерске, гадьзэ питыртэ но Хумбаба кадь гадяз коканы но пыдъѐсыныз ритм йыганы кутске. ОБЫДА Хумбаба убу-убу! Хумбаба убу-убу! Хумбаба убу-убу! Хумбаба убу-убу! Хумбаба убу-убу! Хумбаба убу-убу! Обыдалэн трансэз ваньзылы пыӵаны кутске. Нырысь со кадь эктыны кутске Конгырчо, бӧрысь каллен-каллен вырӟо мукетъѐсыз. Йыркобыен Кортӵог гинэ чалмыт пуко огинтыязы. Пеймыта.

КУИНЕТӤ СУРЕД Эбрайлэн мунчоез. Эбрай ӝуась мунчо гурез азьын пуке. Кенӟализэ кылзӥське. КУАРА Я, мар ини кенӟалиед вера… ЭБРАЙ Ӝоген ачид ик тон сое адӟод, Кутскиз ини куинетӥез суред… КУАРА Ӧй вазьылы ке ни, эн кышка тон, Эбрай, Куд-ог дыръя мон кышкасько вазьылыны — Инмаръѐслы кадь шудӥське тынад та пьесаед, Мон кутскисько ни кадь лулдэ но валаны… Пыре Конгырчо. Чебер со дӥсяськемын, ачиз кудӟемын. КОНГЫРЧО (Дӥськутъѐссэ куяса.) Жади, сыӵе жади мон улыны, Эбрай… ЭБРАЙ Ох, вож тулыс, ох, югыт май, Вити мон, Косьтонтэй, тонэ, возьмай… КОНГЫРЧО Жади, Эбрай, ой, кыӵе мон жади! Кытчы-о пегӟоно та улонлэсь?!

ЭБРАЙ Шӧдске, уг яра пегӟыны солэсь… Тон учкы ай, тани, мунчо шоры… Мунчо со, Косьтонтэй, ачиз поэзия… Мунчо со ноку но мыдлань уг возьматы. Тани тон пукиськод лапча вылын, Нош мунчое конгырскытэ тонэ. Я сура ай мунчо гурмес. Нош мон Юри дасям веникъѐсме пырто. Сарачаяз потыса веникъѐссэ пыртэ. Конгырчо гурез конгырчоен сура. Ӝыныѐ кылиське ини. КОНГЫРЧО Отын, гурын, адын кадь пырсатэ, Вань пигонъѐс, лэся, ӵуштаськизы… Нош йыр кыӵе ӟырдаз, али но тыл потэ… ЭБРАЙ Вот, визьмалты сое, Косьтонтэе, Нырысь поэт пигонъѐссэ ӵушка, Нош собере йырзэ тылӝуатэ… Тӥни соку, тылгизьыос кадь пештыса, Вордско нырысетӥ кылбур чуръѐс… КОНГЫРЧО Мон но, лэся, кылбур туннэ гожтӥ. ЭБРАЙ Я, я, эн кепыра, я, лыдӟы ай, Кылзом, мар сыӵезэ тон пӧрмытӥд. КОНГЫРЧО

Эше тылэ монэ донгиз, Донгиз серекъяса. «Кыӵе мон вылӥськем донгыз»,— Шуи тылэз мон веръяса. Нырысь потӥз вал туж воже, Йыры ик кур луиз солы. Но учкисько, вӧзам эше, Ачиз но пылаське тылын. — Ойдо,— шуиз со, — пыдлогес, Эн кышка тон тыллэсь, Тыл со вулэсь но мусогес, Со выйыны уг лэзь. Пырим, ӧвӧл вылэм кышкыт, Сутскон но ӝог быриз. Но вот тылысь потон кышкыт, Укыр кышкыт луиз… ЭБРАЙ (Кизэ кырмыса но пельпумаз чабкылыса.) Ӟечбур, пие, ӟечбур, Косьтонтэе! Тон пыремед ини зэмос поэзие! КОНГЫРЧО Эбрай, кыӵе мыным каньыл луиз… ЭБРАЙ Тӧлэд тон пушкысьтыд али кошкиз, Озьы луэ со ожмаськон азьын… Кылӥсько Йыркобыен Обыдаослэн кесяськемзы. КОРТӴОГЛЭН КУАРАЕЗ. Уд пегӟы мынэсьтым, Империя! Ачид тон кылдытӥд монэ! Мон улонэд тынад! Мон кулонэд!

МАЙТАЛЛЭН КУАРАЕЗ. Эй, Йыркобы, кытын тынад Эдем садэд! Малы-о тон кыйлы сое вузад?! Тон вӧсяськид-а, ӧд-а вузакуд?! КОПАРЛЭН КУАРАЕЗ. Зэмос эксэймылэсь тронзэ саптам понназ меӵ ярысен сое шуре сэрпалтоно! СЭРЕГПУМЛЭН КУАРАЕЗ. Дугды, сотона! Уд пегӟы всѐ ровно! МУЧОЛОЛЭН КУАРАЕЗ. Эктытоно сое, эгыр вылын эктытоно! ЖУГ-ЖАГЛЭН КУАРАЕЗ. Тӥрен сое, тӥрен коралтоно! ТАЗЛЭН КУАРАЕЗ. Кортӵогъѐсын сое, кортӵогъѐсын со пирамида лэсьтӥсез! Бызьыса пыре борддор пыртӥ Обыда. ОБЫДА Эбрай, пие, быдӟым ожгарчие! Эн сѐты кесяны монэ, пие! (Лапча улэ пегӟе.) Бызьыса пыре Йыркобы. ЙЫРКОБЫ Эбрай! Соос тӥрен, кортӵогъѐсын! Мусокае, эн сѐты соослы! Монэ чѐртлы, пе, вузаськем каро, Вань сьӧлыксэс вылам погылляло! (Лапча вылэ тэтче но тазэн шобырске). ЭБРАЙ Ӝокыт, кезьыт, шӧдске, луиз педлон, Мунчо ни ке, мунчо, иське, медло! Я, кут ай тон но, Косьтонтэй, веник, Кӧс пар, пие, со ваньмызлы саник! (Вениксэ пӧсь вуэ месэ. Копареныз пӧсь ву омыртэ).

100

Бызьыса пыро Кортӵог но солэн бандаез, Эбрай пӧсь ву кисьтэ. Бус потэ вань мунчое. ЭБРАЙ Я, чале, эшъѐсы, эн кышкалэ, Мунчо со выльысь адями каре… Эксэй-а, генерал-а тон, министр-а, Номыр уз кыльы ни татын регистрад – Татын быре пумитъяськон, тӧлӟе, Татын ваньмыз небӟе но кисальӟе! Ваньзы эзыласа лапча вылэ интыясько. Кытын ке чузъяськыны кутске Высоцкийлэн “Протопи ты мне баньку, хозяюшка…” кырӟанэз. Ваньзы кытчы ке асьсэлэн дуннеязы ышо кадь. КОРТӴОГ Ох, кыӵе сыноми мон, а, эшъѐс, Ох, кыӵе сыноми! ЭБРАЙ Ничѐ, пие, Тонэ но каромы ми адями… МАЙТАЛ (Галстуксэ, пиджаксэ, дэремзэ куштэ. Дэремез улын вань на вылэм кесяськем тельняшкаез.) Бен, вал ук со, мынам но вал рае… Кыӵе мусо кырӟа вал анае… МУЧОЛО Нош мон турын турнай анаеным, Скалмы но вал, кечмы, курегъѐсмы…

101

(Кылиськыны кутске, чиган кышно кадь дэремъѐссэ огзэ бӧрсьы огзэ куя). ЖУГ-ЖАГ (Формазэ куштэ но туж бадӟымесь гадьѐсыз солэн адӟисько. Гадьѐссэ но со лифчикеныз ӵош куштэ, кыӵе ке кесяськем но гужмем пиосмурт майкиен кыле.) Нош мон лушкаськыны яратылӥ, Матрон песянайлэсь вишняоссэ… СЭРЕГПУМ (Архиепископлэсь дӥсьсэ куштыса.) Нош мон бускелелэн корка чигаз… Кышноеныз… Пичи вал ай, ямсыз… Вот отысен быриз мынам улон… ТАЗ Мыным атай колхозысьтыз счѐтсэ Вайиз… Экономист луод шуиз.. (Кылиськыны кутске. Таиз но кубиста кадь дӥсяськемын.) КОПАР (Чалбарзэ куштыса.) Нош мон мунѐосын весь шудыли… Конфет кагаз октӥ… Скакалкиен Яратӥсько вал тэтчаны… Бӧрысь, Кыӵе ке мода тулкыме выйи: Хеменгуэй, Гийом Аполлинер, Джек Лондон, Франсуа Вийон… ЭБРАЙ (Кияз копарзэ кутэ но пӧсь ву омыртэ.) Копар туж яратэ копыръяны…

102

Я, вера ай мынам мунчоелы, Мар-о солы шуиз Хеменгуэй? (Вузэ мунчо изъѐс вылэ кисьтэ.) Тӥ кылӥды, со пшик! гинэ шуиз… Мунчо изъѐс котьку шуо шонер: Коть мед луоз ачиз Аполлинер, Коть Франсуа Вийон, коть Кобо Абе, Татын ваньмыз пшик карыса лобе! Малы ке шуоно со тӥлядэз ӧвӧл! Ӧвӧл со зэмос тӧл, кудӥз ачиз Тынад пушкад кужым сямен пыре! Нош та дунне зэмос кужым куре! (Эшшо киська на. Изьызэ изьыя, пӧзьызэ понэ. Вениксэ пӧсь вуэ месэ.) Ӟечкыласько тонэ мон, Йыркобы! Тонэ но, Обыда! Я, потэ ни! Тани кыӵе со мунчое мынам! Я, басьтэ, кырме кияды веник! (Кортӵогез парыны кутске.) Я, мар, пие, тырмоз сыномыны, Луид ке, лу ни тон но адями! Кортӵог кесяськыса лапча улэ пегӟе. Со пыремен, лэся, Обыда отысь тэтчыса потэ, Йыркобылэн тазэз киысьтыз усе. МАЙТАЛ. Ах, Йыркобы, ах, тон, Империя, я, тон но чаль татчы ик, Обыда-Хумбаба! (Веник кияз кутэ). СЭРЕГПУМ. Ах, кытчы пегӟиллям, сотонаос! (Веник кутэ). МУЧОЛО. Тӥ соосты культурно тышкалэ! Мунчо кузѐ ато вожзэ поттоз! КОПАР. Кӧсыт парен массаж лэсьтылыса! ТАЗ. Пӧсьвуатэк пӧсьвуаса, бӧрысь тӥ соосты люкмес вуэ! (Веник кутэ). ЖУГ-ЖАГ. Мар ке пӧсез, Эбрай, ӧжыт потэ!

103

ЭБРАЙ (нош ик пӧсь ву кисьтэ). Я, кинлэн мугорыз ини лыдэ?! Обыдаез но Йыркобыез парыны кутско. КОНГЫРЧО. Эх, вырӟизы Дэбес тӧлъѐс Сибирь трактъѐс кузя! Сузя, Эбрай, мунчо ваньзэ сузя! (Кыскыса поттэ Кортӵогез но парыны кутске, соиз гур сьӧры пегӟе). ЙЫРКОБЫ Кортӵог, эн сѐтӥськы та тӧлъѐслы! Эн сѐты эриксэс сюлмоослы! ЭБРАЙ Куашказ, шӧдске, ни Кортӵогед тынад, Сое жуге ачиз Костьтонтэе мынам! КОНГЫРЧО Со берен берытскиз кыӵе ке кортӵоглы! (Кортӵог возьматэ.) ЭБРАЙ Озьы кулэ вал, дыр, адӟонэзлы! ЙЫРКОБЫ Ай, ай, супыльӟисько, майталӟисько! Тырмоз, нуныосы, тырмоз, мон шуисько! ОБЫДА Ай, ай! А-яй! А-яй! Ай! Ай! Виѐ, Эбрай, виѐ ни ук виѐ! Сиѐ! Сиѐ мон ваньдэсты, сиѐ! (Арыслан кадь кесяськыны кутске, лапча вылэ тэтче, ваньзэсты кир-пазь карыса.)

104

Сиѐ, сиѐ мон ваньдэсты, сиѐ! Нырысь ик, Йыркобы, тонэ сиѐ! (Чыртыысьтыз жильызэ чигыса сэрпалтэ, кӧшкемыт вузэ). ЙЫРКОБЫ Сиѐз…Инмар понна сиѐз…Сиѐз! Йырвиымме гинэ ӧвӧл — вань лыосме, Пырсатытэк, куачыр гинэ сиѐз! О, нагалят, вай пыдъѐсме! (Тӧлпери кадь лобатыса кошке.) МУЧОЛО. Кызьы сиѐз? СЭРЕГПУМ. Сиѐз та сотона, сиѐз! ЖУГ-ЖАГ. Тӥ котьма карелэ, эшъѐс, но мон лобатӥсько! МАЙТАЛ. Сиѐз? Тон мар, зэмзэ-а милемды сиѐд? ОБЫДА. Пор ке но биенэс а каза мас тэмпрано? Мира ке хора ес? КОПАР. Испанскоен вераське… Малы, пе, тон вазьгес уд бертӥськы доре. Тон учкы, кӧня час… ОБЫДА. Сон лас куатро дэ ла мадругада, Соледад… Греес ке но ес бастантэ тэмпрано? КОПАР. Ньыль час ӵукна, пе, Соледад… Тон малпаськод: со вазь ӧвӧл ини? ОБЫДА. Йо мисмо фойа компрар эл регало! КОПАР. Ачим басьто, оло, ваѐ, тыныд подарок, пе. МУЧОЛО. Кыӵе подарок, мар? ОБЫДА. Ту мисма дэбэс распондэрме! КОПАР. Кулэ, пе, тон ачид ответ сѐтыны. ОБЫДА. Пара ина муйер энаморада эл бердадэро идиома эс симпре ел дэл маридо! КОПАР. Яратӥсь кышномуртлы зэмос, пе, кыл соиз гинэ, кудӥныз вераське солэн картэз. ОБЫДА (Хумбаба кадь гадяз кокаса). Сиѐ, Синьор но синьоритаос!

105

мон ваньдэсты сиѐ!

Ваньзы тӧл кадь бызьыса кошко. Обыда соос сьӧры вамыштэ. ОБЫДА. Ма, асьтэос ук, асьтэос ук куриды! (Кошке, нылкышно дэремъѐссэ куштыса кельтэ). КОНГЫРЧО. Мар, мултэсгес ӧм паре-а, Эбрай? ЭБРАЙ. Си, амиго. Пор ла манана тэнго ке томар ин пар дэ Хуефос фритос кон йамон у дос тазас дэ кафе буэртэ. Эй ту? Я кисьты ай вудэ. (Париськыны кутско). КОНГЫРЧО. Мар тон шуид, Эбрай? ЭБРАЙ. Созэ ӝоген ачид ик валалод… Ойдо ӧжыт кыллѐм ай табере. Эбраен Конгырчо трусикен гинэ кыльыса лапча вылэ выдо. Дырын дырын пыдъѐссэс веникен сѐткало. Мунчо сарачае усе Эбек но Принцесса. ПРИНЦЕССА. Айкай?! ЭБЕК. Апай! ПРИНЦЕССА. О, сузэре мынам… ЭБЕК. Апай, апай! ПРИНЦЕССА. Шедьтӥ, шедьтӥ тонэ мон, сузэре! Тодскод-а кӧня мон тонэ утчай?! ЭБЕК. Уг, нокытчы уг кошкы мон табре, апай. Мон одӥгзэ валай — шунды кадь со пиштэ та дуннеын тынад сюлмыд. Кыӵе мыным тонтэк туннэ кезьыт! ПРИНЦЕССА. Тонтэк но, сузэре мынам, уйѐс сыӵе луо пеймыт… Толэзь кадь ик югдэ тынад лулыд. (Ӟыгырско). ЭБЕК (куаляк усьыса). Апай! Тон тодӥськод-а мар табре луоз? ПРИНЦЕССА. Атай, шӧдске ни, ваньместы сиѐз… ЭБЕК. Номыр но карыны уг лу ни шат?

106

ПРИНЦЕССА. Уг тодӥськы, ӧвӧл ук мон черсӥсь нылмурт, ачим но сураськи ни мон, Эбрай гинэ мар ке кариз ке шат… ЭБЕК. Эбрай… Тон учкы ай, кыӵе зол парисько… ПРИНЦЕССА. Кошким, кошким, мултэс вераськиськом. Ачиз со бырйыны кулэ, Эбрай. ЭБЕК. Нош Косьтонтэй, со мон кадь ик вожгес на ай. Тон учкы ай, кыӵе ассэ жуге… ПРИНЦЕССА. Кошким, адӟод на ай, атай ӧз сиы ке… Эбекен Принцессаос кошко но пеймытаны кутске.

107

НЬЫЛЕТӤ СУРЕД Ярдур. Дунне писпу. Выж. Писпу вайын Йыркобы шонаське. Бызьыса пото Майтал, Таз, Мучоло, Сэрегпум, Жуг-Жаг но Копар. МАЙТАЛ. Кытчы-о со пыриз, кытчы ышиз? Колӟо кадь та дырозь азьын бызиз… ТАЗ. Вот, гад, пегӟиз! МАЙТАЛ. Империя, кытын-о тон, малы-о милемды куштӥд? ЙЫРКОБЫ. Куштӥз, кельтӥз, пегӟиз, табре шуо. Нош кудды лушкады кускертонме, кудды зарни тэчетъѐсме киултӥды? Отын вал кужыме мынам, нош тӥ, паразитъѐс кадь, сюпсиды монэ… Кортӵог но тӥледын сэрен быриз… МАЙТАЛ. Тон кытысен вераськиськод? ЙЫРКОБЫ. Ага, вот, асьтэос но табере уд тодмаське ини… Ма, ӝутэ синъѐстэс но адӟоды… МУЧОЛО. Со мар, йыркобылы-а берытскем? ЙЫРКОБЫ. Хе, берытскем… Берытскытӥм тӥ шуэлэ… Вот, мед сиѐз ни асьтэдыз но Обыда табре… КОПАР. Астэ сиѐ шуиз на со нырысь… ЙЫРКОБЫ. Монэ со табере уз сиы ни… Азьвыл мугореным ке луысал, оло нош сиысал. Нош табере испан кылын со вераське ини… Со яратэ монэ таӵе тусбуеным, ӵук ӟардытозь ик серенадаос гитараен кырӟа… Потэ Обыда. ОБЫДА. О, Паньгие мынам! Эстоу эноморадо! Эстоу эноморадо! Ке ойос тэйнэ эльля! О ке суэртэ, ке суэртэ! Тэйнэ ла мирада мас линда ке лос ойос! МУЧОЛО. Мар-о вераське, Копар?

108

КОПАР. Мон нош ик синмаськи, шуэ. Кыӵе, пе, шуд та, кыӵе шуд! Кыӵе, пе, синъѐсыд тынад. Нош учконэд, шуэ, синъѐсыдлэсь но чебергес… ОБЫДА. Пор ля манана тэнго ке томар алго… КОПАР (куалектыса). Ӵукна, шуэ, мар ке мон сиыны кулэ… Ваньзы зуркак луо. Обыда соос пала берытске. ОБЫДА. Сиѐ, мон ваньдэсты сиѐ, пырсатэмды понна. Курбон куре мынам сюлмы-кӧты… Огды но тӥ уд кошкелэ татысь… Татысь уг луы кошкыны… (Кошке но ӝӧк донгыса поттэ). Я, вералэ ини, куддэс-о нырысь сиѐно? Аааааааа! (Ӝӧксэ тупатылыны кутске). ЖУГ-ЖАГ. Таӵе ӝӧкез мон тодӥсько. Со улэп обезянъѐслэсь йырвиымзэс сиѐн ӝӧк… КОПАР. Нош асьмеос обезянъѐс ӧвӧл, дыр, ук… СЭРЕГПУМ. Юнме ӧй оскы, инмаре, тыныд, юнме ӧй оскы мон… МУЧОЛО. Ой, сюлэмы коты… ОБЫДА. Я, куддылэн тросгес пӧсьтурынэз… Желчез, мон шуисько, желчез! Я, быръелэ кудды-о самой сьӧлыко пӧлысьтыды, содэс ик мон нырысь сиѐ…Тӥ быръелэ, нош мон айшетэлы ветло, яратӥсько культурно сиськыны… (Кошке). Пото Эбекен Принцесса. ЭБЕК. Сиѐз, тӥ бӧрсьы со милемды но сиѐз. Нош собере ог сю арлы изьыны выдоз… ПРИНЦЕССА. Эн кышкалэ, эшъѐс, таиз улон со ваньмыз майа… Улон — быре но, вордӥське но со… Нош кулонэз шулдыр пумитано… Со самой чеберез… Кошко. Геройѐс ваньзы утчаськыны кутско.

109

КОПАР. Кытӥ ке но тӥни ук пыризы… Вань, дыр, иське, потон сюрес. (Бызьыса мынэ но омыре шуккиське, мукетъѐсыз но озьы ик). ЙЫРКОБЫ (серекъяса). Вераз ук со тӥлед, ӧвӧл татысь потон сюрес… Пыремзы ваньзылэн татчы луэ, нош потэмзы уг лу… Та лабиринт — быдӟым куала — куалялюльы… МАЙТАЛ. О, инмаре! Дышетӥзы монэ

куинь

иностранной

кылъѐслы, но одӥгзэ гинэ табре мон тодӥсько – ель тӥмро ло бура тодо! МУЧОЛО. Мар со шуиз, Копар? КОПАР. Чебер потэ, пе, ни солы испанской кыл… СЭРЕГПУМ. Дырды ӧжыт кылиз, эшъѐс… Нечѐ испанскоен татын вераськонэз… Ойдо ни, усьтэлэ сьӧлыкъѐстэс… Инмар доры чылкыт ведь мыноно… МАЙТАЛ (дӥсьѐссэ куштыса). Тон мар, архиепископ ни астэ кожад? Вот, вамышты нырысь ачид. Тон самой но сьӧлыкоез татын! Я, куштэ дукессэ солэсь… Медаз со гожма лулъѐсмес кулон азьын… СЭРЕГПУМ. Ачим кушто, марлы-о со табре мыным… (Куштэ). МУЧОЛО. Тӥ учке ай, тӥни ук кин Империлэсь кускертонзэ лушкам… СЭРЕГПУМ. Нош асьтэос кӧня тӥ лушкады! Ачид бен, Мучоло? Ачид, Майтал? Нош тон, Копар? Нош Жуг-Жагед сярысь ни веранэз ӧвӧл. Нош Таз, нош Таз – со воксѐ безразмерной вал, вагонъѐсын кысказ! Потэ Обыда. Аспӧртэм айшетэныз. ОБЫДА. Я, мар, куддэс-о ни сиѐм? Кудды-о самой чылкытэз? МАЙТАЛ. Ведь тӥ сьӧлыкозэ шуиды вал нырысь… Сьӧлыкоез — со мон… ОБЫДА. Воштӥ мон малпанме. Мон самой чылкытсэ нырысь сиѐ. Мар, тон-а самой чылкытэз? МАЙТАЛ. Ӧвӧл, кызьы-о мон чылкыт луо… Самой чылкытэз тӥни милям священникмы – Сэрегпуммы…

110

СЭРЕГПУМ. Мон чылкыто? Кыӵе мон чылкыто? Мон атеист, мон атеист вал котьку но! Монашкаосын кӧлалляй! Одӥг постэз но мон йӧно ӧй возьылы. Вина юи! Вань мугорам мынам пӧськы вылын пӧськы. Вот, Мучоло милям тӥни культурной кышномурт. Ӵуклы быдэ йӧл ваннаын со мисьтаське! МУЧОЛО. Тӥ мар, кыӵе-о мон чылкыт, куинетӥзэ ини заразной висѐнэн мон висисько. Нош Таз тӥни ноку ӧз висьы на. Со туж ассэ эскерыса возе. Нырысь ваньзэ лыдъя-чота, бӧрысь гинэ мар ке лэсьтэ… ТАЗ. Мон уг висиськы? Кызьы уг висиськы? Мон воргорон воргоронэз яратӥсько. (Дӥськутъѐссэ куштэ, лифчиксэ ишкалтэ). ЖУГ-ЖАГ. Вот именно. Монэ со яратэ – воргоронэз. Озьыен, милям тӥ азьын самой урод репутацимы. Озьыен, самой чылкытэз Копар кыле. Со милям интеллигентной семьяысь. Испан кылын но вераське… КОПАР. Мон самой чылкытэз? Мон – кышномурт! (Пиджаксэ куштэ). Пичи дырысеным воргорон дӥсь улын ветлӥсько! Нош кышномурт кадь улӥсько – Сэрегпумен. Солы мон усьтӥськи вал одӥг пол черкын. Со дырысен тӥни сыӵе мон извращенной луэмын ини! ОБЫДА. Озьы бере, ачим мон быръѐно луо… Но пуртыме, дыр, поттытэк уз луы ни. (Йыркобылы). О, учкы ай шорам, мусокае! Лэ пидо ке устэд ло чага! (Кошке.) КОПАР. Тазьы ик та испанской романэз учкылыса, Обыдалэн шыд пуртыяз ни пыромы… Ох, кыӵе романтичной та берпуметӥ суред! (Кылӥське кытын ке Обыдалэн гитараен шудыса испан кылын кырӟамез). МУЧОЛО. Удмурт кылын коть мед со кырӟасал, ато кыӵе ке но испан кылын шуш кечтака кадь кесяське! МАЙТАЛ. Берпуметӥ минутъѐсмы кошко… Ох, кыӵе жаль… Мучоло, чаль, мусое, вӧзам… Пото Эбрай но Конгырчо. Соосты нокин уг адӟы на. МУЧОЛО. Нош мынам, Майтал, нуные тынэсьтыд луоз…

111

МАЙТАЛ. Нуныед луоз?.. МУЧОЛО. Луоз…Тон кылзӥськы ай, кыӵе со выре… МАЙТАЛ. Мар? (Кылзӥське.) Выре, эшъѐс, выре… Кылӥськоды-а, нуные мынам луоз… Пие луоз… ТАЗ. Майтал, вань сюлмысьтым ӟечкыласько тонэ… ЖУГ-ЖАГ. Мон но тонэ, Майтал… СЭРЕГПУМ. Ӟечкыласько тонэ, Майтал! Ку-о вутскид, шайтан тонэ басьтон?! Ох, та улон, пуммы вуиз ини, нош мар быдӟа кылдэ на шумпотон… КОПАР. Мон валасько тонэ, Мучоло… Туж валасько… Малы ке шуоно мынам но Сэрегпумлэсь нылпие луоз… СЭРЕГПУМ. Мар? Мар тон шуид, Копар? КОПАР. Тон кылзы, кылзы, кыӵе ӵыжаське… СЭРЕГПУМ (кылзӥське, бӧрдыны кутске). Ӵыжиз, ӵыжиз, эшъѐс! Мынам, мынам но вань, сотоналэн (серекъяны кутске)… Мынам но вань, эшъѐс! ЖУГ-ЖАГ. Нош тӥ уд тодӥське на ай, кӧня толэзь отын выре ини мынам! ТАЗ. О, Жуг-Жаге, о, мусое мынам! СЭРЕГПУМ. Ма, воргорон шуид ук тон астэ… ЖУГ-ЖАГ. Вунэтӥды шат тӥ актрисадэс! МАЙТАЛ. Эшъѐс, кыӵе мон ваньдэсты яратӥсько! ЭБРАЙ. Ӟечкыласько, эшъѐс, мон тӥледды вань сюлмысьтым ӟечкыласько… ВАНЬЗЫ. Эбрай? МАЙТАЛ. Сыл, сыл, интыяд, Эбрай! Татчы пырид ке, потэмед уз луы ни! Татын Обыда… Пырид ке, со тонэ но сиѐз… Эбрай одӥг вамыш лэсьтэ. ВАНЬЗЫ. Эбрай, эн пыр, Эбрай! КОНГЫРЧО. Сӥялскыны потӥм кадь асьмеос, Эбрай, татын нош мунчолэсь но ӟырдытгес, лэся… Соос шунды сямен тылсияло…

112

ЭБРАЙ. Уг, уг, эшъѐс, мон пырытэк уг чидаськы… Мон тодӥсько, вань одӥгез потон сюрес. Пӧлысьтымы кудмы ке но огмы ассэ ачиз Обыдалы ке сиыны сѐтӥз, кылемъѐсыз ваньзы мозмиськозы… Бадӟым вис. Обыдалэн кырӟамез кылӥське. МАЙТАЛ. Мон соглаш… Мучоло, мусокае… Пимы понна… Эшъѐс понна. ТАЗ. Ӧвӧл, Майтал, мон мыныны отчы кулэ… СЭРЕГПУМ. Ӧвӧл, эшъѐс, мон, сотона, мыныны отчы кулэ… ЭБРАЙ. Тӥ будэтэ нылпиостэс, эшъѐс, ачим кошко мон со доры… МАЙТАЛ. Ӧвӧл, Эбрай, озьы уз лу… Ачид ук тон сюрес усьтӥд… Кин милемлы выль кырӟанъѐс гожтоз, кин чылкыт синъѐсын учкыны дышетоз… Тон кыльыны кулэ, Эбрай, калыкмылы тынад визьмыд кулэ луоз на ай! ЭБРАЙ. Нош тӥ малпаськоды, мон нокинэ ас интыям ӧй дася та дырозь?.. Тани со мон вӧзын, мынам пие… Но только, кырӟалэ, ява, эшъѐс, кырӟалэ, монэ курбон сѐтыкуды… Медам мон ноку вунэты калыкелэсь гурзэ. Бусаськись пуртызэ донгыса потэ Обыда. Эбрай солэн пуртыяз пуксе. ОБЫДА. Кин-о монтэк дӥсьтӥз? Эбрай? Тон мар астэ ачид… ЭБРАЙ. Шонер, эксэй, табере соос эрикоесь… ОБЫДА. Ӧвӧл, Эбрай, соос ӧвӧл на ай эрикоесь… Курбон тылэ пыремедлэсь азьвыл кылдэ тон сѐтыны кулэ мынам шуш нылыным паръяськыны. Соку гинэ соос эрикоесь… ЭБРАЙ. Мар-о мыным солэн шушез, ачим но шуш ук мон. Нырысь мед вералоз, соглаш-а со ачиз… ОБЫДА. Ворсаськы, ин ӧс!

113

Занавес ворсаське. Усьтӥське. Ваньзы тӧдьы простыняосын дӥсяськемын ини. Эбраез тӧдьы дӥсен дӥсятӥллям. Кырӟало. ОБЫДА. Я, пот ни, пот, иське, тон шуш нылы… Потэ Эбек. ОБЫДА. Соглаш-а тон? ЭБЕК. Квак! Квак! ОБЫДА. Соглаш, шуэ. Нош табере тыныд черод, я, вера ни кылдэ. ЭБРАЙ. Но ведь таиз укыр чебер со мон понна. Вылаз ик ай, вожгес на, шӧдӥське. Таиз Косьтонтэйлы ай яралоз… Мын, потты, потты шушсэгес мыным! ОБЫДА. Ну, ваменэс ук тон, Эбрай. Ярам ини, ачим потто созэ. Эбекеныз ӵош кошко. Пото Обыда но Принцесса. Принцессалэн йырыз кышетэн шобыртэмын. ОБЫДА. Я вера ни, нылы, кызьы тон малпаськод? ПРИНЦЕССА. Яратӥсько, яратӥсько тонэ, Эбрай! ОБЫДА. Эн дырты тон, Эбрай, оло, таиз но со ӧвӧл… ЭБРАЙ. Солэсь мон куаразэ сюрсэз пӧлысь но тодмало. Соглаш мон, Обыда. Тылэ пырон азям, вай мон солэсь эшшо огпол учко на ымнырзэ. Эбрай Принцессалэсь ымнырзэ усьтэ. Соиз чеберскем ини. Эбраен Принцесса ӟыгырскыны туртто. ОБЫДА. Э, дугдэ, дугдэ, дугдэ! Кыӵе-о мон эксэй луо, сюандылэсь азьло чупаськыны лэзи ке тӥледды. Ойдо, ӝоггес, Эбрай, тылыд ӝуа ини. Эбрай Йыркобы пала вамыштэ.

114

ОБЫДА. Кытчы-о тон, тылыд тынад мукет палан! ЭБРАЙ. Я, мар, Паньги, лыдэ на-а тыбырыд? ЙЫРКОБЫ. Лыдэ, пие, лыдэ. ОБЫДА. Эн дӥсьты корманы, Эбрай, эн дӥсьты, шуисько! Эбрай кормалтэ. Йыркобыен Обыдаос яр сьӧры кесяськыса пезьдо. Та шорын Принцесса но Эбрай ог-огзы доры бызьыса лыкто но ӟыгырско. ПРИНЦЕССА. Эбрай! ЭБРАЙ. Чеберае мынам! Чупасько. Яр сьӧрысь пото Паньги, Обыда но Эбек. Куиньназы ик соос чебересь. ОБЫДА. Тон, учкы, чупасько ук, шайтанъѐс! ЙЫРКОБЫ. Нош тон монэ уд чупа-а? ОБЫДА. Сиѐ мон тонэ, мусокае, сиѐ! ЭБЕК . Нош тон монэ уд ӧть-а, Косьтонтэй? КОНГЫРЧО. Бабыльсконэ мынам! ЭБЕК. Бӧрысь, ява, бӧрысь. ОБЫДА. Озьы ке но мон ваньдэсты сиѐ. ЭБРАЙ. Уз лу, дыр, сиемед. Ведь кортӵогме мон, Обыда, кельтӥ… Со Косьтонтэй киын (Тылэ пырыны кутске). Кырӟалэ, эшъѐс, кырӟалэ. Эй, Атае мынам, я, усьты ни ӧстэ. Чузъяське вашкала семык кырӟан. Инмаръѐс ваньзы лобыса кошко. Эбрай тылэ ышыку, кытын ке но гудыртэ, ву вияны кутске, шунды тылсия. КУАРА. Тау тыныд ваньмыз понна, Эбрай… ЭБРАЙ. Аслыд но тау, Эмиссар.

115

КУАРА. Валай мон тынэсьтыд лулдэ… ЭБРАЙЛЭН КУАРАЕЗ. Мукетъѐслэсь но тыршы валаны… КУАРА. Одно ик, Эбрай…Нош ку тон вордӥськод ас калыкед пушкы?.. ЭБРАЙЛЭН КУАРАЕЗ. Созэ уг тодӥськы на мон, нырысь мон шутэтско, ветло пумтэмлыко дуннеостӥ… Нош собере адӟом ни улыса … КУАРА. Ӟеч сюресъѐс тыныд, Эбрай… ЭБРАЙЛЭН КУАРАЕЗ. Аслыд но, Эмиссар… КУАРА. Мӧзмыт тонэн люкиськыны… ЭБРАЙЛЭН КУАРАЕЗ. Ваньмыз та дуннеын мӧзмыт, астэ ачид уг лу ке вормыны… КУАРА. Ой, кыӵе та шурдыт дунне, ой, кыӵе та шурдыт улон… Кытчы-о кошконо табре? Ярам, тылобурдо карын кыллѐ ай мон… Дунне писпулэн вайыз ӧжытак тӧлэн вырыны кутске. КОНГЫРЧО. Нош кортӵоге мынам ышем! КОРТӴОГ (гармошкаен потыса). Кытчы-о мон табре ышом? Мон но адями луи. (Гармошкаеныз шудыны кутске). Ваньзы серекъяло. КОНГЫРЧО. Тӥ учке ай, шундыяку ик зорыны кутскиз. Эбрай шуэ вал: таӵе дыръя Гондыр, пе, сюанзэ лэсьтэ! МАЙТАЛ (синвуаськыса). Иське, со вал зэмос гондыр сюан… КОРТӴОГ. Озьы ке, ойдо эктоме, эшъѐс! Малы татын кулэ на синвуос?! Кортӵог шудэ. Нош нокин но уг экты. Ваньзы бӧрдыны кутско. КОНГЫРЧО. Ойдо, ноку ум вунэтэ сое, эшъѐс, ойдо пуктом солы улэп кирос.

116

Конгырчо кык кизэ ик вылэ ӝутыса огинэ кырме. Майтал сое ӟыгыртыса, одӥг кизэ огпала урдэ. Таз соос сьӧры султыса одӥг кизэ мукет пала урдэ. Соос сьӧры мукетъѐсыз султо, улэп кирос кылдыто. Нош Кортӵог кырӟан гурез шудыны кутске. Миша Федотовлэн кылъѐсызъя "Юг дыдык" кырӟан чузъяське. Катанчи. 17 сентябрь 1997 ар.

117