Öflugt kvennastarf í GB

Sterk hefð hefur verið fyrir kvennastarfi í GB sem leitt hefur verið af kvennanefnd sem kosin er á aðalfundi. Hlutverk nefndarinnar hefur verið að styrkja tengslanet kvenna innan klúbbsins með því að skipuleggja viðburði yfir sumartímann. Hlutur kvenna hefur aukist nokkuð á síðustu árum og voru 117 konur félagar í klúbbnum árið 2022 svo dæmi sé tekið.

Kvennanefndin hefur farið ýmsar leiðir í starfi sínu en þó hafa verið nokkrir fastapunktar. Dæmi um slíkt er 19. júní mótið sem hefur farið fram á Kvenréttindadaginn í áratugi og ætíð notið vinsælda. Nefndin hefur einnig staðið fyrir föstum rástímum fyrir konur í viku hverri sem oftar en ekki hafa byrjað með hópkennslu hjá golfkennara. Í sumarlok hafa GB konur tekið þátt í Vesturlandsmóti kvenna og keppt þar við kynsystur sína í öðrum klúbbum landshlutans. Nýjasti viðburðurinn er loks Dömumótaröðin sem hóf göngu sína 2018. Loks hafa GB konur sent keppnissveit á Íslandsmót golfklúbba og skipulagt dagsferðir á golfvelli á suðvesturhorninu.

GB konurnar Ásdís Helgadóttir, Júlíana Jónsdóttir og Þuríður Jóhannsdóttir tóku þátt í Landsmótinu í golfi á Jaðarsvelli á Akureyri árið 2000.

Þátttakendur í hinu árlega 19. júní móti á Kvenréttindadaginn 2023.

Í allnokkur ár í kringum aldamót fór fram keppni á milli GB kvenna og kvenna í Golfklúbbnum Setbergi í Hafnarfirði. Skipst var á að leika á Hamarsvelli og í Setbergi og ætíð mikið fjör. Hér er hópmynd af þátttakendum í einni keppninni á Hamarsvelli 2000.

Tilbúnar í haustgolfið í lopapeysum haustið 2012.
F.v. Anna Ólafsdóttir, Annabella Albertsdóttir, Ása H. Halldórsdóttir, Steinunn Á. Guðmundsdóttir, Sveinbjörg Stefánsdóttir, Fjóla Pétursdóttir, Guðrún R. Kristjánsdóttir og Júlíana Jónsdóttir.