Su mortu in su riu Sa boxi in su ‘entu
de Antoni Palitta
de Ignazio Mudu
“Oberreimì… oberreimì s’enna! No timeast no, no, deu seu… una boxi, sceti una boxi, seu sa boxi sarragada de milli beccius, seu sa boxi trista de milli pipìus. De ora seu tocchendu dogna enna, de ora seu tocchendu dogna coru ma nemus… mai nemus mi ‘olit oberri’, mai nemus mi ‘olit ascurtai. Po mei… nudda… nudda si ‘ollu preguntai, si ‘ollu sceti nai de benni’ cun mei in dogna cresia, de benni’ cun mei in dogna moschea in dogna sinagoga me is prazzas de su mundu interu. Si ‘ollu nai de zerriai, zerriai sempri, zerriai a forti e chen’’e bregungia poita in medas logus criaturas nozentis funt morendu ancora, in medas logus no si podit stai! Oberreimì… oberreimì s’enna! Seu una boxi perdia in su ‘entu: deu seu… sa Poesia!”.
“Tpru! Murritta-nie’…, nois semus piseddos, nois hamus su coro forte che-i sa rocca, a sa cale sos ciaffos de sas undas paren carignu ‘e ala de puzone. Tpru! Murritta-nie’, non lu timas su riu maccu, baosu, ch’in cust’’adde giardinu ‘e pedras mudas, paret ch’hat manigadu trumas mannas de diaulos bios. Sos pastores antigos, chi ‘ogan in sos saltos de su chelu sos isteddos a paschere, sun inoghe, cun chera e giaos ruzzos1, a berritta subr’anca, imbenujados, pro li prender sos brazzos a s’indemoniadu, s’est ch’abberu fatterat fizu malu”. E avansat Murritta… Ma milla! Tot’in d’una battor mesas lunas2 de disgrascia hat mustradu a sas aèras. Tristas nues nieddas, che feminas in luttu in piatta ‘e cheja, lassan andare lagrimas de dolu, accumpanzende Andria ch’est andadu a bojare sos pastores antigos in fressadas de rena e pedras tundas. 1
chera e giaos ruzzos: si fa riferimento ad un’antica usanza secondo cui ci si serviva della cera benedetta e di grossi chiodi lavorati rozzamente per propiziarsi una divinità o uno spirito avverso, in questo caso il fiume; 2 battor mesas lunas: i ferri che la cavalla, travolta dalle onde, rivolge al cielo.
- 45 -