La Gameta
74
Un die, l alborote fui tanto, que ls barragistas juntórun-se todos an grupos i... - Bíban ls de Baion! - Bíban ls de l Marco! - Bíban ls de la Régua! -… - Nós matamos ls homes i abusamos de las mulhieres! Armou-se un stardalhaço tan grande q'ua pessona de l'aldé fui a tocar las campanas a rebate. Juntórun-se ls de la barraige por un lhado, ls de Picuote por outro i aquilho parecie ua guerra. Ampeçórun a la porrada uns als outros i, al final, ls barragistas, por la rue percipal, parecien sacos de trigo pul chano. Até essa altura, ls de fuora dezien: Cuitadicos de ls “palhantres”, se bamos a la zaragata, nien teilhas quédan ne ls telhados! Mas, apuis daquel die, yá resmungában: Ui!, son salbaiges! Cun eilhes nun se puode bibir! Deilhi pa l feturo, toda la giente respeitaba ls de l'aldé. I, dalhi a pouco tiempo, la guarda yá staba de permanéncia an Picuote. Mais tarde, passou pa l Barrocal. Recuolha de Helena Rodrigues, junto de l abó, Lázaro Rodrigues; 3º anho, Scuolas de Miranda.