"Mai cobiçosa fai la filha perguiçosa." Era ua beç ua mulhier que quedou biuda. La pobre tubo de criar ua filha que se chamaba Rosa Ana, eilha solica, sien ajudas de naide. Passados uns tiempos, más tarde, arranjou outro home, que yá tenie ua filha doutra mulhier, i la filha chamába-se Marie. Agora si que la mulhier pensaba de tener ua família i bibir bien la bida. Mas acunteciu que ua zgrácia nunca ben sola i tamien se l murriu l segundo home. La cuitada de la tie yá nun sabie l que habie de fazer. Anton tubo que se ancher de coraige i aceitar la mala bintura que le dórun. Agora que habie que fazer? Tenie dues filhas pa criar. Si, porque habie quedado cula filha de l segundo home, que nun era sue, mas filhastra deilha. Quando las filhas yá éran algo maioricas, la mai dezie-les: - "Ah Marie, pega na ruoca i fila!" I para Ana Rosa, que era la sue filha berdadeira, dezie-le! - "Ah Rosa Ana, lhaba ls pies i bai pa la cama." I fui siempre assi. Anquanto nun se casórun, la mai trataba mi bien a Rosa Ana, sue filha berdadeira i oubrigaba a la filhastra, a Marie, a trabalhar. Até que se le casórun las dues filhas. Apuis cada ua bibie an sue casa, i la mai iba a bé-las de beç anquanto. Quando la mai iba a ber a Marie, sue filhastra, tenie-le todo siempre mi bien purparado i arrumado pa la giente falar bien deilha. L pior era quando la mai iba a ber la sue berdadeira filha, aqueilha que nun era oubrigada a fazer nada. Quando la mai
63