PANITIKAN
Ano ang iyong dala ikaw na iba? Ano ang iyong dala ikaw na may puwersa? Puwersang dagli Mali, oo, hindi Epekto ay pili Bitbit ay binhi Saan ba'y nakaparoon Puwersang, laging may tugon Lalim na tila balon Lakas, tulad ng ambon Gamot na wala Sapagkat 'di mo makita Ngunit, lamang, ay nandiyan Bigla'y maramdaman Mahiwaga, ito'y ganoon Suwerte kung magkaroon Salamangkang daig ang panahon Pag-ibig na tagom
-Patrick Hakeem A. Rones
Agosto 2013
11
Mahikang itinuring Pag-ibig na mapanlansing Sa alab ng puso’y Na sa pag-tama ng lihim na itim
Hindi mo pansin Kanyang angking galing Sa kanya, panaho’y gawain Bigyan mo ng tingin
Itim na lihim sa aki’y tumambad Sa likod ng salamin bakit hawak mo’y patalim Patalim sa dilim na sa aki’y kumitil Tila lahat ay nakakubli sa’yong titig at tingin
Tahana’y, kay laki Basa’t tuyo, supling na bahaghari Babae at lalaki Alay ay sarili
Mahikang itinuring Sa pag-ibig mo’y nangatal Ang dating pag-ibig na halal Ngayon ay pag-ibig ng hangal
Tubig, lupa, hangin Para sa tao’y anihin Hayop para kainin? Huwag sana maliitin!
Mahika kung ituring Ang iyong pag-ibig Sa kawala ng katotohanan Bakit pilit pa ring pinaniniwalaan?
Kanyang katawan Nagsilbing ating tahanan Taglay ang kapangyarihan Wagas na kariktan
Mahika kung ituring Ang iyong pag-ibig Sa kabilang hapdi Ikaw pa rin ang nais makihati
Siya na nagmahal Siya na magimbal Salamangkang kalikasan Huwag kaligtaan
Mahikang itinuring Pag-ibig na mapanlansing Sa likod ng bistadong salamin Bakit ikaw pa rin ang gustong mahalin?
- PHAR
Mahikang itinuring Sa tamis at pait ay nalasing Dulot ng iyong mahika sa akin ay iba Binulag ng tuluyan ng binasag na salamin - Sarah Christine H. Barbado
Hindi ka ba nagtataka kung bakit hanggang ngayon tuwang-tuwa ka pa rin sa mga salamangkero kahit, sa totoo lang, gasgas na gasgas na ang mga pakanang ginagawa nila? Bata pa lamang tayo’y naipakilala na sa’tin ang mga payaso, salamangkero, mago, at iba’t ibang mga tao na may mga nagagawang hindi kapani-paniwala. Sa aing pagtanda, unti-unti nating natututunan na napamamangha lamang nila tayo sapagkat hindi nagawang makita ng ating mga mata ang mga ginagawa nila sa loob ng isang segundo. Marahil tingin natin na mabibilis ang mga kamay ng salamangkero dahil mababagal ang ating mga mata. Malamang aakalain ng karamihan na ito ay nakatutuwang panlilinlang nila, pero hindi ito ‘yung kaso. Trabaho lang, walang personalan sa panlolokong pampasaya. Bukod sa pagpapamangha at pagpapataka ay may isa pang bagay na nagagawa ang mga salamangkero para sa atin—pinasasaya nila tayo. Ito marahil ang pinakamahirap, ngunit pinakamahalagang bahagi ng kanilang trabaho. Mahirap, dahil hindi basta-basta napipilit ang taong maging masaya, dahil dito tuon ang hanap-buhay nila. Kung susuriin nga’y hindi naman talaga sa mga magic tricks makikita ang tunay na mahika, kung hindi sa kapasidad ng mga taong ito na pasayahin ang bawat taong nakasasaksi sa mga ginagawa nila. Ang mga tricks na nagagawa nila ay pinag-aaralan, pero ang pagpapasaya ng kapwa tao nila ay likas na talentong nagmula sa kauna-unahan at pinakamagaling na salamangkero sa kasaysayan: ang Panginoong Diyos. Sino nga namang makatututol? Sino ba sa panahon ngayon ang kayang lumikha ng mundo sa pamamagitan ng salita lamang? At sino sa ating mga mortal ngayon ang kayang lumalang nang isa pang tao mula sa putik at hininga? Pero hindi madamot sa mahika ang Tagapaglikha. Binigyan Niya ng kakayahan ang tao na magbahagi ng ngiti sa lahat. Siguro ngayon, alam niyo na ang halaga ng ligaya. Umaabot tayo sa puntong kailangan
pa nating umupa ng palabas o gawain ng tuwing may pagdiriwang para lamang mas mapasaya natin ang mga bisita. Para sabihin ko sa inyo, hindi lamang mga salamangkero ang may kakayahang gumawa niyan! Alam niyo bang lahat tayo ay may hawak na mahika? Hindi mo man kayang gawin ang nagawa ni Harry Houdini na pagtakas sa mga kadena’y kaya mo namang maging masaya kahit pa marami kang problema. Kung ang pagpapalutang sa sarili mo’t pagpapalubog sa tubig ng halos buong araw gaya ni David Blaine ay imposible mong magawa, kaya mo namang pagaanin ang kalooban ng iba, at ibabad ang lahat ng tao sa paligid mo sa kaluguran na nagmula sa puso. Wala ka mang magic wand ni Harry Potter, meron ka namang nakahahawang kaugalian na pinaghuhugutan ng maraming tao ng saya, ligaya, pagkalugod at kagalakan. Hindi mo kailangang mag-aral ng mga magic tricks para lamang makapagdulot ng aliw sa mga taong nakapaligid sa iyo. Lalong hindi mo kailangan na umupa ng isang salamangkero o ‘di kaya’y payaso para lamang mabuo ang araw ng mga mahal mo sa buhay. Nasa iyo na ang lahat ng kailangan mo para magawa ito. Ngingiti ka lang, magbibiro, tatawa at makikihalubilo sa kanila. Gan’un lang kasimple. Sa susunod na may makita kang tao na hindi maipinta ang mukha, nakasimangot, nakabusangot, nakapangalumbaba, malungkot at iba pa, tandaan mo lamang ang mga simpleng pangungusap na ito: Lahat tayo’y salamangkero. May kapangyarihan kang magpasaya ng tao. - Riza Camille F. Talan
Mga dibuho nina Ralph Michael R. Nochete, Mhar Melvion I. Choi, Robert M. Faustino at Johnry Heinz C. Laban Latag nina Johanna Alexandra Marie G. de Jesus at Julie Anne S. Diaz