Remonsar

Pistasj kan gjerne blandast med den kvite makronmassen eller borgarmeistermasse basert på kvit råmasse. Litt honning kan også passe pistasjnøttene fi nt.

Røsting av nøtter og mandlar

Akkurat som med mandlar eignar også nøtter seg godt til røsting før bruk. Det får fram meir av smaken som ligg i feittet i råvara. Berre ver merksam på at røstinga gjer at nøttene fortare harsknar, så planlegg kor mykje du skal lage, og oppbevar dei lys- og lufttett og kjølig. Om du ikkje har tilgang på spesialutstyr til røsting, kan du kan røste med å bruke ein bakke eller ei plate med kant, spreie jamt utover og røste i omnen med nokre vendingar innimellom.

Ved røstinga er det viktig å vere forsiktig med temperaturen. Ved høge temperaturar blir resultatet fort ujamt, og nøttene/ mandlane kan bli for mørke på utsida, sjølv om du er nøye med å røre eller vende jamleg. Så fort dette skjer, blir smaken beisk. Du bør vere ekstra merksam når du bruker herteomn, da undervarmen fort kan spele oss eit puss. Held du deg ved 130–160 °C (varierer frå omn til omn) og ikkje har for mykje i bakken eller på plata, så har du god kontroll. Ein halvtimes tid med ei vending midtvegs er nok.

Ein remons er ein masse av sukker og smør eller margarin som er blanda saman. Remons blir brukt som fyll i kveite- og wienerbakst og bidreg med smak og tekstur.

Vi kan køyre ein remons saman med ei grind eller med eltekrok. Vi kan velje å røre han kort saman, utan å piske luft inn i han, dersom vi ønskjer at han skal halde seg mest mogleg i ro på omnen. Eller vi kan piske han kvit dersom vi ønskjer at han skal blåse seg opp og bli porøs under steikinga. Når vi piskar ein masse med smør kvit, kjem kvitfargen av at det utviklar seg masse små luftbobler i massen. Fargen på sjølve komponentane i massen har eigentleg ikkje endra seg.

Bruker vi smør og ikkje margarin, kan det i tillegg vere gunstig med litt stivelse for å gjere massen mindre utfl ytande på omnen.

Kanelremonsen er den mest kjende remonstypen.

Basisoppskrift på remons

→ 500 g (100 %) salta smør → 600 g (120 %) sukker → 75 g (15 %) maisenna

Remons kan du smaksetje med krydder (kanelremonsen er nok den mest kjende varianten), mandlar og nøtter, konsentrat og essensar eller andre ingrediensar som passar godt saman med smør og sukker.

Det fi nst mange typar smør og sukker, og vi kan behandle desse råvarene på ulik måte. Ønskjer vi å gjere massen meir smidig, kan noko av sukkeret bytast med melis og/eller sirup. I tillegg har vi heile fl oraen av honningtypar, som opnar opp ei verd av smaksnyansar avhengig av kvar biene har vore. Eit alternativ til melis kan vere vaniljesukker, så får du inn ein annan smak i tillegg til konsistensen.

Oppskrift på ekstra smidig remons

→ 500 g (100 %) salta smør → 250 g (50 %) lys sirup → 250 g (50 %) sukker → 75 g (15 %) maisenna → 75 g (15 %) melis

Vil du ha eit meir karamellisert preg på produktet, kan du byte ut noko av sukkeret med sukker med meir karakteristiske smakstonar, som muscovadosukker, brunt sukker eller demerarasukker. For å auke effekten enda meir kan du brune noko av smøret. Smøret må kjølast ned att før du bruker det i remonsen. Smelt smøret på middels varme til du ser smøret stige i kasserollen og boble. Rør undervegs. Akkurat idet smøret byrjar å dette ned att, tek du det av plata. Held du fram lenger enn dette, kan du få ein brent smak på smøret. Har noko brent seg i botnen, bruker du berre det smøret som renn ut av kjelen av seg sjølv. Dei partiklane som sit fast, ønskjer vi ikkje å ha med, for det kan sitje att brent smak.

Karamellremons

→ 500 g (100 %) smør (du kan brune om lag halvparten) → 250 g (50 %) lys sirup → 250 g (50 %) mørkt muscovadosukker → 100 g (20 %) melis → 75 g (15 %) maisenna

Remons til kanelbollar

→ 500 g (100 %) salta smør → 600 g (120 %) sukker → 70 g (14 %) kanel → 50 g (10 %) maisenna

Kassia er det mange som reknar som sjølve kanelen. Ceylon er ein meir fruktig og tropisk prega kanel. Kassia, som ligg til høgre på biletet, har ein tjukkare og hardare bark enn ceylonen. Ceylon har ein meir fruktig og tropisk aroma.

Remons med fl eire smaksnyansar til kanelbollar

→ 500 g (100 %) salta smør → 250 g (50 %) sukker → 100 g (20 %) brunt sukker → 150 g (30 %) mørk sirup → 100 g (20 %) vaniljesukker → 70 g (14 %) kanel → 50 g (10 %) maisenna

I tillegg kan vi leike oss med dei to kaneltypane Kassia og Ceylon. Kassia er det mange som oppfattar som den «klassiske» kanelsmaken. Ceylon er ein meir fruktig og tropisk prega kanel.

Det er også mange andre ingrediensar som passar godt saman med smør og sukker: knuste eller heile kardemommekjernar, røsta mandelfl ak, røsta knuste nøtter, sjokoladebitar, konsentrerte smakar med smak av sitrusfrukter, i tillegg til ulike nøtte- eller mandelmassar. Prøv gjerne med borgarmeistermassen!