Miquel Navarro. Figuras para a batalla.

Ao longo de catro décadas de brillante traxectoria profesional, Miquel Navarro conformou un universo de seu, composto en boa medida por cidades, imaxinativas metrópoles deseñadas a semellanza dos espazos urbanos coñecidos, que simbolizan e sintetizan a evolución histórica e cultural do ser humano.

Poderíase dicir, logo, que a exposición Figuras para a Batalla pon en contacto a un creador de cidades coa gran Cidade do coñecemento, a Cidade da Cultura de Galicia, un centro único por cuxas arterias cheas de vida circulan o pensamento, as ideas, a arte, a cultura.

O feito de que as figuras de Miquel Navarro foran deseñadas especificamente para o complexo do Gaiás outórgalle á exposición un valor engadido, pois o artista é ben coñecido por ter afondado na relación que existe entre arquitectura e escultura, e por ser quen de inserir a obra no contexto para o que foi creada, ata o punto de que, fóra del, perda boa parte do seu impacto e do seu significado. Na Cidade da Cultura as súas impoñentes figuras de aluminio dispostas para a batalla establecen un diálogo artístico coherente e natural coas suxestivas formas e liñas que trazou Peter Eisenman.

A batalla nesta ocasión é só metafórica; fai referencia á loita pola supervivencia e ao esforzo cotián por superarmos os desafíos aos que nos somete a vida. Ao tempo, réndelles homenaxe a aqueles célebres guerreiros de terracota atopados en Xi’an, cuxa lembranza, lonxe de inspirar marcialidade, concita en nós a seguranza de que a arte, á procura de beleza e significado, é connatural ao ser humano, e mesmo ten a capacidade de diluír os milenios de distancia entre a obra dun artesán chinés da Dinastía Qin e a dun escultor de relevancia internacional na grande icona da modernidade de Galicia.

Roberto Varela Fariña Conselleiro de Cultura e Turismo