RESEÑES Equí hai futuru Una antoloxía nun ye otro qu’una amuesa d’aquello que más-y presta a quien antologa y que puede ser más o menos representativo de lo que se quier amosar. Diez son los autores (cinco homes y cinco muyeres) y otros tantos rellatos, los qu’apaecen nesti llibru prologáu pol tamién escritor, y asturianu, Rafael Reig. Alba González Sanz, Aníbal Álvarez Menchaca, Diego Díaz, Héctor Gómez Navarro, Héctor Tuya, Laura Casielles, Natalia Calvo Torel, Pablo X. Suárez, Sibisse Rodríguez y Sofía Castañón son los 10 autores –mozos y moces que tán entamando una carrera lliteraria y que tienen en común ser asturianos– que nos presenten 10 propuestes distintes y variaes tanto en temática como en maneres y estructures de narración: el mundu de les drogues, el difícil arte de ser mozu... y la violencia, física y psíquica, individual y social; el llau escuru de la vida, por asina dicir qu’esta primer xeneración d’asturianos «americanos» conoz perbién, muncho más polos llibros y les series d’allende los mares que por esperiencia propia. Delles narraciones mándense de la primer persona, otres de la tercera, pero toes elles presenten el bon facer d’una xente que tovía ye nuevo, pero que sabe yá que va dexar de selo nun tardando, porque la mocedá ye la única enfermedá que cura colos años. Tampoco nun son unívocos los tonos narrativos: dende’l coloquial hasta l’irónicu pasando pol lirismu o pol más descarnáu y satíricu. Breve pero significativa amuesa de la narrativa última en castellanu que se ta faciendo n’Asturies, esta antoloxía ye un llamáu a la esperanza: hai futuru nes lletres d’Asturies Inés Álvarez
LA EDAD DEL ÓXIDO. Antología de jóvenes narradores asturianos Varios autores // Prólogo de Rafael Reig Uviéu, Editorial Laria, 2009, colección Primeras líneas, 168 pp.
EL MONTE DE LA CALAVERA Carmen Gómez Ojea Uviéu, KRK Ediciones, 2010, colección Valkenburg, 80 pp. Premio Principado de Asturias (Fundación Dolores Medio)
Dios bendiga la familia El Monte de la Calavera ye una historia de familia contada y vista por tres muyeres: la madre, que da les boquiaes, enfotada yá hai tiempu en marchar de la vida, na que foi una nena a la que-y arrampuñaron tolo qu’amaba desque hubo dexar la escuela y a Luisa, la maestra, la única persona que la quixo, y dir pa la ciudá de sirvienta y d’adulta tener una vida enllena de renuncia y d’insatisfacción; la fía más grande, l’abadesa Amalberta del Gólgota, de nome Belena, dura y fría, descreída y herexe, qu’asomeya contemplar el mundu y la xente como lo fairía un entomólogu colos insectos del so xardín y autora d’una novela –Yo, pecadora o una monxa herexe– onde narra la roindá de la vida de familia, y la más vulgar y vulnerable, Mireia, la hermana nacida de la rebelión d’una madre viuda y condenada «a nun esistir» pol ambiente de posguerra y por unes normes impuestes ya inxustes pa cola muyer. Esta novela, ganadora del premiu Principado de Asturias de la Fundación Dolores Medio, ye un retratu de familia descarnáu nel que nin tan siquier la muerte ye a poner tenrura nunos personaxes que son a sobrevivir, coles mancadures encostraes, ente’l rencor, l’odiu, el despreciu o la indiferencia. Carmen Gómez Ojea (Xixón, 1945) ye una de les escritores más prolífiques y premiaes del panorama lliterariu asturia nu. Amás d’esta novela tien de recién Nosotras, de cinco a nueve. N’asturianu, amás de dellos cuentos infantiles y la obra xuvenil El nome de Roselina (2005), publicó en 2008 la novela Na quinta estación Inés Álvarez
02 17