Nican nancontazque quienin yoc-cucuruchtlalique huan ihquin quinmamana in cocorochtin, nin cocoroch amo oquiectlalique cual-li yenon ohuetz. Ninque quema cual-li oquinyecmamanque yenon amo huetzi; huan cuac ce pixcaz nin za cec macuicuiti huan umpa cec tlamotlati in tlaol ihtec in chayatl. Cec zoa in chayatl, huan cuac amo cec cocorochtlalia non ocachi tequio pampa cec memetinemi in chayatl nochi in tonal huan ce ahcol cuahcuati; huan ce pixca surco huan surco. Huan nin amo nin za cec macuiti in tlazol huan cec pixcati huan cec tlamotlati in tlaol ihtec in chayatl. Niman ce yeccuepa in chayatl huan ce ye quintemitia in coxtaltin, niman ce cualica ica ce camion nozo ica in axnotin.
QUIENIN PIXCA Itlamian Noviembre nozo Diciembre ye pehui pixca nochtin nin cuentla. Cuac ye yazque pixcatihue achto quitemoa in chayame, in coxtaltin in pixcalontin huan niman ye quinmemeltia in axnotin huan ye yahue nin cuentla. Ahcitihue umpa ni cuentla ye pehui quitlatemuilia in axnotin, ye motlalilia in chayatl huan ye pehua pixca. Cuac oc cocorochtlalique in tlaol, non zan macuicuitihue huan pixcatihue in tlaol huan tlamotlatihue ihtec in chayatl, nozo macatquiza ihtec ce chichiquitzin cuac yoten in chayatl niman yeccuepa ihtec in coxtal; huan ihcon quintemititihue in coxtaltin. Tlamia non cucuruch niman ye panoa ipan in occe cucuruch huan ihcon quinyecoa nochtin in cucuruchtin, cuac ahci tlahco tonal ye pehui motlatotonilia tlacua, tlayecoa tlacua ocuel ye pehui pixca. Tlayecoa pixca niman ye quintlachichihuilia in axnotin quinmemeltia in coxtaltin tlen ye tentoque ica tlaol. Macatquiza cuac cual-li ca in izhuatl yenon quixelotihue in izhuatl huan tetema nihqui ihtec in coxtal, nozo tlamo macatquiza achto quitzecuehua in izhuatl huan umpa tlaquentia. Achto quitetema in izhuatl niman catequia huan tlaquentia ica in naylotli inic yemaniaz. Niman ye pixca, nozo tla mieque yahue cequi pixca huan occequi tlaizhuaquixtia, huan niman in tlaol tetentihue ihtec in coxtaltin tlayecoa niman ye panoa occecan ni cuenhtla. Cequi tlen amo ococorochtlalique in tlazol nin tlen zan octlamotlataque nin zan cacoctihue huan pixcatihue nihqui quixtia in izhuatl tlayecoa quintemitia in coxtaltin ye quinhualtlamemeltia in axnotin. Cequi tlen amo octeque in tlazol non zan ahcitihue momemeltia in chayatl huan ye pehua pixca ye cuica nin surco temi in chayatl cuepaqui ihtec in coxtal huan ihcon pixca surco huan surco. Tlayecoa nihqui quinhualtlamemeltia in axnotin quinhualmemeltia in coxtaltin huan tla miec oquiz in tlaol, cequi cualica huan cequi umpa cualcatehua, ipan in occe tonal yahue cuitihue in occequi tlaol. Macatquiza tla in tla-li nen huey non zan pixca, tetentihue in tlaol ihtec in coxtaltin huan cuac yeca yocpixcaque nochi in tlal-li niman tlaquehua ce camion huan zan cecpa cualica nochi in tlaol.