8
LES NOTICIES, 20 d’avientu 2009
Actualidáentrevista Miguel Ángel Arconada Melero Fundador de Codo a Codo, grupu de Palencia d’homes pola igualdá
«De la casa nun se comparte namás la hipoteca. Del repartu de la intendencia a la meyora de la con-vivencia», foi’l títulu de la charla que dio Miguel Ángel Arconada nes VII Xornaes de Coeducación de SUATEA. Afondar na corresponsabilidá y construír masculinidaes nueves son delles de les propuestes d’Arconada, autor d’investigaciones rellacionaes cola desigualdá de xéneru y la implicación de los homes pa superala.
«Hemos buscar una masculinidá xusta, solidaria y que nun se base nel abusu» BEATRIZ R. VIADO
–Ye militante de Codo a Codo, una d’eses escases asociaciones d’homes pola igualdá. ¿D’ónde surde la necesidá de formar estos colectivos y qué esplica que sían entá tan pocos? –El movimientu d’homes pola igualdá vien a dar respuesta al fechu de que la desigualdá de xéneru nun ye un problema de les muyeres, sinón que ye un problema social. Por eso los homes, que principalmente somos axentes de desigualdá, hemos trabayar na llucha pola igualdá. Si somos parte del problema hemos ser parte de la solución. Amás, creo qu’al movimientu feminista nun se-y pue pidir más, fixo de too: creó discursu, denuncia, alternatives, exemplos vitales, etc., y agora tóca-y mover ficha al mundu masculín que se ta retrasando nel cambiu hacia la igualdá. –¿Qué pesu tien el movimientu d’homes pola igualdá nel Estáu español? –Los movimientos d’homes pola igualdá tienen unos venti años d’existencia, principalmente nel mundu anglosaxón, y nel Estáu español ye onde más grupos hai, anque ye un movimientu mui pequeñu. Son grupos qu’anden ente les ocho y quince persones y que vienen a ser poco más d’un centenar o doscientes persones movilizaes en tol Estáu. Son cifres que tienen un aquel de repercusión, pero que nun lleguen a xenerar una movilización considerable. Ye un movimientu claramente minoritariu. –¿Cuál ye’l llabor que faen dende’l grupu d’homes nel que participa en Palencia? –El nuestru grupu llámase Codo a Codo, en referencia al versu de Mario Benedetti que diz aquello de qu’«en la calle codo a codo somos mucho más que dos», y que vien a espeyar la idea de qu’homes
y muyeres hemos tar xuntos nesta llucha cómpliz pola igualdá. Somos diferentes pero somos equivalentes. Nun hai nada nel home nin na muyer que la faiga meyor o peor que l’otru: les diferencies arriquécennos y les desigualdaes desllexitímennos como persones. Hemos buscar una masculinidá más solidaria, más cómpliz, más xusta y más ética, de manera qu’ésta nun siga basándose nel abusu con respecto a la situación de les muyeres. –Como en toles lluches pola igualdá, un colectivu, nesti casu’l de los homes, vívela col mieu de perder privilexos. ¿Qué tienen que perder y ganar los homes nesti camín? –El trabayu de los homes pola igualdá ye doble: d’una parte tienen que deconstruír el machismu y polo tanto renunciar a los privilexos que’l machismu-yos dexó, y de los que nun son culpables, pero sí son responsables de perpetualos, y, d’otra parte, hai que construír identidaes nueves igualitaries dientro de la masculinidá, romper la idea de que ser home ye igual a ser machista. Ye posible ser home de formes distintes y munches d’elles en collaboración coles muyeres y acordies cola causa de la igualdá. La conciencia de privilexu ye absolutamente necesaria. Agora seguramente hai un ciertu espeyismu de que la igualdá yá s’algamó y eso ye mui peligroso. Hai que detectar los elementos de desigualdá que persisten y analizar quién tien les ventayes y los previlexos y quién ta en desigualdá. Amás, hai que xenerar empatía col sufrimientu femenín y responsabilidá sobre la propia construcción n’igualdá. –Últimamente fálase de la existencia de los micromachismos. ¿En qué consisten y en qué se manifiesten? –Lo de micromachismos ye un términu qu’ellaboró Luis Bonino,
NANEL COSTA
que principió a trabayar nel tema de les masculinidaes nueves yá nos setenta, y lo que significa ye qu’hai estratexes cotidianes pequeñines, delles inclusive inconscientes, pero toes elles sintomátiques de cómo los
«Ye mui importante tener la conciencia de privilexu que dexó’l machismu» «Repetir estereotipos de guapura nos homes ye amplificar el problema» varones ocupen situaciones de privilexu y viven cola sensación de tener mayor protagonismu vital que les sos compañeres nel día a día. Los micromachismos tán naquellos que se conformen con ayudar en
casa en cuenta de compartir, los que pregunten a la compañera «qué te faigo», como si fuera un llabor de la otra persona nel qu’él s’introduz como un collaborador; tán nos homes qu’ocupen espacios propios na casa mentes la muyer nunca tien un espaciu propiu; y detéctense neso de comunicar decisiones que l’home yá tomó ensin negociación previa... Ye’l conceptu que vien a dar nos detalles pequeños exemplificación de que ser home ye ser importante y a partir d’ehí eso demuéstrase día a día nes coses pequeñes. –Tien trabayao nel ámbitu de la publicidá sexista, un espaciu nel que poco a poco van entrando los homes, a los qu’intenta tresmitir el mandatu de la guapura o una determinada estética de la virilidá. ¿Vamos a la igualdá pela vía enquivocada? –Duplicar la presión de los estereotipos de guapura sobre homes y sobre muyeres nun ye una solución, sinón que ye amplificar un problema. La publicidá tien agora
dos llinies d’evolución: d’una parte lo que ye intrínseco a ella, que ye buscar la rentabilidá nel mercáu y, por exemplu, el mercáu de la cosmética masculina ta por esplotar y ehí surden estereotipos nuevos sobre la cosmética y la ropa masculino, munches veces en connivencia col movimientu de los metrosexuales, de los que yo siempre digo que lo que m’esmuel ye, non que lleven la camisa más guapa, sinón quién-yos llava les camises. Eso nun tien gota que ver cola igualdá, sinón cola rentabilización de la sociedá de consumu y la mercantilización. Otra llinia ye que tán empezando a visibilizar a los homes en llabores de cuidáu, tanto en campañes institucionales como en delles publicidaes comerciales nes que se-yos da’l valor añadíu de romper estereotipos y enseñar consumidores más modernos, más solidarios y de los tiempos nuevos. Tovía ye una llinia mui minoritaria, pero principien a vese nicios de comportamientos nuevos masculinos na publicidá.