-Yayáy, lisinsaykiwan tiyaykusaq, nispas nin quyllur llaqtayuq wawaqa. -Tiyaykunaykipaq kamachiyki, nispas nin apuqa llaqullanta payñiqman aysaririspa. Chaysi quyllur llaqtayuq wawaqa sunqullanpi nin «pitach kamachin kay huchuy planetapi?» nispa. -Tapurikusqayki, yayalláy, nispas nin wawaqa. -Tapuwanaykipaq kamachiyki, nispas nin apuqa. -Pitataq kamachinkiri, yayalláy? -Hinantintam kamachini, nispallas nin apuqa. -Hinantintá? Chaypis apuqa planetantapas huk planetakunatapas quyllurkunatapas huk qawariyllapi rikuchin. -Chay lliwtá? nispas nin wawaqa. -Arí, chay lliwta, nispas nin apuqa. Manas chay apuqa planetallanpichu kamachiq kasqa, tiqsimuyuntintas kamachiq kasqa. -Quyllurkunarí kasullasunkitaqchu? -Arí, kasuwallantaqmi, nispas nin apuqa. Kamachisqaypacham sayarimun. Mana chayqa piñakuni, nispa niptinsi utirayallan «ancha munayñiyuqmi kasqa» nispa. Payqa chay apuhina munayñiyuq kaspaqa manas tawachunka tawayuq kutillachu inti chinkaykuqta rikunman karqan. Aswansi qanchischunka iskayñiyuq kuti, pachak kuti, iskaypachak kutipas huk punchawllapi rikunman karqan, mana tiyananta suchurichispa. Chaysi quyllur llaqtayuq wawaqa llakirikunsi planetanta yuyarispa. Hinaspas aputa nin:
36