Un Estiu en Soïssa Ua des nauetats deth grop d'infantils siguec er entrenament d'estiu ena estacion Soïssa de Saas-Fee. Dempús d'un long viatge en forgoneta arribèrem a Saas-Fee. De seguida mos quedèrem estonadi des montanhes que mos entornejauen e d'un pòble polit a on solet circolauen veïculs electrics o bicicletes. Entà arribar ena basa dera zòna esquiable, a on diden que se tròbe era cafeteria mès nauta d'Euròpa, prenérem dus teleferics e un funicular. Un còp naut e damb eth cansament dessús per sajar arribar es prumèri, començèrem damb eth trabalh tecnic enes pistes. Es prumèri dies daurírem damb esquí liure, entà dar pas as trabalhs educatius e de traçat. Auérem era oportunitat de trabalhar en fòrça bones condicions de nhèu, inclós un dia esquièrem ena nhèu vèrge! Siguec un trabalh complèt e de qualitat a on se treiguec eth maximon partit e a on es corredors/es s'esforcèren ath maximon. Pes tardes, dempús de recuperar fòrces damb es granes siètes de pasta der otèl Astòria, realizàuem eth fisic enes magnifiques installacions que dispausaue eth pòble, coma èren pistes d'atletisme, voley, fotbòl, eca…A part deth trabalh de fisic especific tanben realizàuem ua ligueta triangulara de moltiespòrt que resultèc fòrça competitiua e divertida. Abantes de sopar aprofitàuem entà apraiar es esquís e analisar er enregistrament de video deth maitin. Mès Saas-Fee siguec fòrça mès qu'entrenament. Auérem era oportunitat de realizar excorsions peth parçan, anar a préner bèth crespèth, baishar pes bobslei, tirar-mos en tirolina e visitar Zermatt damb er espectacular contorn dera montanha Cervino ath hons . . . Saas-Fee mos aufric un glaciar en ues condicions excepcionaus pera sua bona orientacion, era sua qualitat de nhèu e pes sues bones installacions esportiues. A tot açò se somèc eth naut nivèu d'esquí que i auie en glaciar damb era preséncia d'equips de tot eth mon e corredors coma Didier Cuche e Lara Gut. Damb era magnifica experiéncia deth passat estiu e eth bon ambient enes entrenaments, sonque mos quede demorar ath mes de junhsèga entà trobar-mos nauaments en aguest lòc tan excepcionau entath nòste espòrt coma ei Saas-Fee. Vos demoram!! Oriol Guinart Mauri
9