BELGE 113
Osmanlı Döneminde Mudanya İskelesi ve Gümrüğü
Berây-ı maâş ta‘yîn şüde be-Hüseyin nâm kes ki ser-topî-i medîne-i Bursa ki pîş-ez-în mûmâ-ileyh alîl ve şâyân-ı merhamet bûd ve mikdâr-ı kifâye maâş bâ-arzuhâl istid‘â-yı inâyet kerde ve bâ-kıyâs-ı emsâl-eş beher şehr în kadar meblağ bâ-hatt-ı hümâyûn-ı şevket-makrûn an-mâl-ı mukāta‘a-i kethüdâlık-ı gemiciyân-ı iskele-i Mudanya bâ-i‘tibâr an-gurreti Ş. sene 1233 ta‘yîn şüde ve sûret dâde fermûde el-vâki‘ der-sene 1233 bermûceb-i arzuhâl ve derkenâr ve takrîr ve telhîs ve fermân-ı âlî fi 25 Ca. sene 1233 ve bâ-fermân-ı şerîf Fî şehr 10 guruş-ı esedî 12 eşhür 120 guruş-ı esedî An-mâl-ı mukāta‘a-i kethüdâlık-ı gemiciyân-ı iskele-i Mudanya bâ-i‘tibâr an-gurreti Ş. sene 1233 ta‘yîn şüde fermûde Medîne-i Bursa Topcubaşısı Hüseyin nâm kimesnenin Bâb-ı Âlî’ye takdîm eylediği bir kıt‘a arzuhâli mefhûmunda zuhûr eden şenlik i‘lânı için senede üç yüzden mütecâviz top endâhte edip hidmet-i me’mûresinden bir ân münfekk olmayarak edâ-yı hidmet etmekde ise de bir tarafdan bir akçe medâr-ı maâşı olmayıp fakat şehir kethüdâsından on iki guruş mâhiyye verilügelir iken birkaç seneden beri onun dahi kat‘ı takrîbiyle vücûhla mağdûr ve şâyân-ı merhamet olduğun beyân birle sedd-i ramak edecek bir nân pâra inâyet buyurulmasını tahrîr ve istirhâm etmekle iktizâsını sa‘âdetlü Tophâne-i Âmire nâzırı efendi hazretlerinden lede’l-isti‘lâm fi’l-hakīkat bu makūle mühimmelerde müstahdem olanların tarîk-i âher ile adem-i ta‘ayyüşü cihetiyle i‘âneye muhtâc idüğün ve mahrûse-i Edirne’de topcubaşıya Edirne Gümrüğü mâlından mâhiyye on beş guruş maâş ta‘yîn olunduğun mesbûk olduğun beyân birle emsâli merkūma dahi Bursa’da vâki‘ münâsib emvâl-i mîriyyeden mâhiyye i‘tâsı veyahud hisse-i âher ile ikdârı husûsu memhûren i‘lâm etmekle sâdır olan fermân-ı âlî mûcebince emsâli keyfiyeti ve muktezâsı suâl olundukda bundan akdem vukū‘ bulan velâdet-i hümâyûnda i‘lân ve tebşîr-i sürûr-ı hümâyûn için top şenliği ile izhâr-ı şâdumânî olduğuna binâ’en Edirne topcularından Mehmed Şâkir bin Hasan nâm kimesne top-endâzlık eder iken kazâ’en gözü ve yüzü yanıp amel-mânde ve alîl olduğu Edirne topcubaşısı tarafından inhâ ve kāide-i ocakları üzere o misillü sürûr-ı hümâyûnda kazâzede olanlar haklarında ne vechile inâyet olunugelmiş ise merkūmun hakkında dahi icrâ ve ihsân buyurulması Çirmen Sancağı Mutasarrıfı sa‘âdetlü Celal Paşa hazretleri tarafından bundan akdem bâ-tahrîrât lede’l-iltimâs bu makūle hidmet-i pâdişâhîde alîl ve amel-mânde olanlar hakkında tekā‘üdlük vazîfesi verilügeldiğine binâ’en merkūmun hakkında dahi ocak sergisinden olmak üzere İstanbul Gümrüğü’nden bâ-hatt-ı hümâyûn-ı şevket-makrûn-ı şâhâne yevmî otuz akçe işbu sene-i mübâreke Rebî‘ulâhiri’nin on birinci günü bâ-ru’ûs-ı hümâyûn tekā‘üdlük ihsân ve tevcîh buyurulmuş olduğu ve bu makūle mukāta‘ât-ı mîriyye ve hayriyye mâllarından kimesneye vazîfe tevcîh olunmamak bâbında iki yüz yirmi yedi senesi evâhir-i Ramazânı’nda bâ-hatt-ı hümâyûn-ı şevket-makrûn ve bâ-fermân-ı âlî sâhib-i arz olanlara ve gümrük eminlerine hitâben emr-i şerîf verilmiş idüğü derkenârlardan müstebân olmağla bu sûretde inhâ olunduğu şürût ve emsâline nazaran müceddeden vazîfe tevcîhine irâde-i seniyye ta‘alluk eylediği hâlde mübârek hatt-ı şerîf-i inâyet-redîf-i şâhâne sudûruna mütevakkıf idüğü bâ-takrîr lede’l-arz hâk-i pâ-yi şâhâneden istîzân olundukda Tophâne nâzırının i‘lâmı mûcebince Bursa’da münâsib bir mâldan merkūma mâhiyye on guruş mâhiyye maâş ta‘yîn oluna deyu hatt-ı hümâyûn-ı şevketmakrûn şeref-yâfte-i sudûr olmağla mantûk-ı münîfin icrâya mübâderet eyleyesiz deyu fermân-ı âlî sâdır olmağın mûcebince şeref-yâfte-i sudûr olan hatt-ı hümâyûn-ı şevket-makrûn ve sâdır olan fermân-ı âlî ve tertîb etdirildiği üzere merkūm Topcubaşısı Hüseyin’e işbu sene-i mübâreke Şabanı gurresinden i‘tibâren kethüdâlık-ı gemiciyân-ı iskele-i Mudanya mukāta‘ası mâlından mâhiyye onar guruş maâş ta‘yîn olunmak üzere Başmuhâsebe’ye kayd olunup sûreti ve iktizâ eden mahallere ilmuhaberleri i‘tâ olunmak bâbında bâ-telhîs ve fermân-ı âlî sâdır olmağın mûcebince kayd ve iktizâ eden mahallere ilmuhaberleri verilmekle mûmâ-ileyhe mâhiyye on guruş maâş ta‘yîn olunduğunu mübeyyin yedine işbu sûret verildi. Fî 28 Receb sene 1233 (mühür) Hüseyin bin Murâd Kayd şüde
374
BOA., C.AS., 33968/801