Diasabra Augustus 6, 2011
Pagina 10
Eden Viaggi cu bishita interesante di Agentenan di viahe di Italia na Aruba STA. CRUZ -Recientemente tabata di bishita na Aruba un grupo di Agentenan di Viahe di e compania Eden Viaggi. Cual compania desde December 2010 a firma un contract cu pais Aruba pa un charter cu semanalmente ta pisa suelo di Aruba desde Milan. E operador Eden Viaggi ta sumamente
contento y satisfecho con e charter ta bayendo. Mester remarca cu Italianonan ta conoci cu nan ta gusta viaha tur parti di mundo y un porcentahe halto ta bishita Caribe. Ultimo añanan e mercado di Italia a mustra di kier algo nobo, diferente y ta buscando un otro destinación den Caribe. E operador Eden Viaggi semper a expresa cu “Aruba ta un pais hopi gusta pa e Italiano pa su seguridad, hotelnan, beach, entretenimiento, restaurant y pa su hendenan amabel y servicial”. Cu e meta principal pa cerá conoci y experiencia cu e producto turístico Aruba Eden Viaggi a dicidi di manda un grupo di agente di viahe di diferente ciudad importante di Italia manera Milan, Bari, Torino, Genova,Sicilia, Roma y Palermo y asina bende esaki mihor na e consumidor. Durante nan bisita na Aruba e grupo a hospeda na Holiday Inn Sunspree Resort & Casino y nan tabata tin un programa bon balansa cu basta actividad caminda aparte di un bon island tour cortesía di ABC Tours nan a bay ariba un trip cu catamarán ofreci pa Red Sail Sports y a bishita varios Top hotel di Aruba manera Tamarijn Resort,
Divi Village y Divi Divi Resorts, Westin Resorts y Occidental como tambe nan por a disfruta di un anochi fabuloso na Zissles cu cena y show. Durante nan estadia e grupo a wordo transporta pa El Tours y a wordo acompaña na tur e actividadnan door di representante di Aruba Tourism Authorty sra. Amayra Boekhoudt y representante di Eden Viaggi na Aruba, sr. Manuel Aldrovandi hunto cu Edoardo Repetti, Sara Vannucci y Francesco Capuano kendenan ta traha den e oficina di Eden Viaggi situa den lobby di hotel. Aruba Tourism Authority ta extende un danki na tur esnan cu a coopera cu e programa aki tabata posibel y haci e bishita aki uno exitoso. Un danki special ta bay na sra. Raul Villagran y sra. Magali de Mesa di Holiday Inn Sunspree Resort & Casino. Y manera nan ta bisa den Italiano “arrivederci”
Ladron a bay cu tas bao di palapa STA. CRUZ -- Diahuebs pa 15:20 e muher M.H. de H. naci na Venezuela di 47 aña, a haci denuncia di ladronicia di su tas. El’a bisa cu ladronnan a coy su cartera den cual e tabatin 350 dollar, su bril di solo y bril di bista. El’a bisa cu e tas tabata bao di un palapa. Esaki a tuma lugar entre 1’or y 3’or di merdia.