Diasabra Juni 29 2013
Pagina 7
Na Tanki Leendert:
Auto a subi caminda dilanti scooter
STA. CRUZ -- Diahuebs anochi na e salida di Centro di Bario Tanki Leendert un accidente a keda registra entre un auto y un scooter. E manehador di e scooter tabata keha di dolor na curpa. Na yegada di Polis di Trafico e motociclista a declara cu e tabata bayendo direccion pabao y e auto a bay
pa subi caminda. Aki el’a dal contra e auto. E manehador a dal abao for di e scooter, aunke e tabata tin dolor pero no tabata desea di Ambulance. Algun persona cu tabata na e Centro di Bario a cuminsa busca problema ariba dje, cu e homber. Polis a tuma declaracion di ambos partido.
Douane Recherche a detecta substancia den carga na Fast Delivery Services
STA. CRUZ -Diabierna atardi Douane Recherche a presenta na compania Fast Delivery Services. Aki Douane a detecta irregularidad den cierto carga, destina pa un persona local. Douane Recherche a presenta na dicho compania wardando dicho persona presenta. E carga aparentemente tabata contene substancia parecido na droga. Na momento cu e persona a presenta pa reclama su carga, el’a keda deteni. A sospech’e di a importa cierto cantidad di droga den su ordo. Fast Delivery ta un compania di entrega di carga. Polis di departamento di droga tambe a ser poni na altura.