Diasabra Oktober 22, 2011
Pagina 24
Parti di e delegacion Arubano a presencia e clasico di futbol Brazil contra Argentina den Weganan Panamericano STA. CRUZ -- Dos gol, dos kaarchi corra, nuebe kaarchi geel, cifranan cu a demostra cu dos equipo rival a enfrenta otro. No ta importa cu ta e seleccion mayor of esun Olimpico, e rivalidad aki ta existi den tur deporte pero principalmente futbol. Diarazon atardi, parti di nos delegacion di Aruba a haya e oportunidad di mira un clasico di futbol den Weganan Panamericano, ora cu e rivalnan eterno esta Brazil y Argentina a topa otro den e mahestuoso stadion nobo di Omnilife, porcierto e stadion nobo di e popular equipo Mexicano di futbol, Chivas di Guadalajara. Un tremendo partido cu Argentina tocando miho e prome tempo, pero un Brazil cu e mihor oportunidadnan di anota gol. E ultimo minuut di e prome tempo, Brazil por poco a bay dilanti den e marcador, pero e portero Argentino a saca e bala ariba e linea. Den e segundo mitad, na di 64 minuut, Brazil a habri e marcador den e partido cu un bunita gol di Henrique Nascentes di e equipo Santos, pero ni 10 minuut despues tabata Argentina cu ta reacciona
bek y empata e partido pa medio di Araujo hungador di Boca Juniors. Despues di e empate Brazil a domina e partido, pero no a logra a nota gol. Casi na final di e partido, esaki a bira uno bruto, unda e arbitro mester a saca dos kaarchi corra, un pa cada banda. Mucho mas no a pasa den e partido cu
Brazil y Argentina a termina den un empate na uno. Sigur un experiencia olvidabel, pa esnan cu a haya e oportunidad unico di presencia e gran clasico entre Brazil y Argentina. Despues a sigui cu e partido Mexico contra di Ecuador, na unda e equipo di cas a gana cu e score di 2 - 1.