Diasabra December 22, 2012 Despues di condoleer na un cas funeral:
Dos doño di auto ta haya nan mes cu mas tristeza pasobra nan a kibra y horta den nan auto
STA. CRUZ -- Diahuebs anochi algo prome cu 10’or Polis a ser manda na altura di un Cas Funeral na Cumana. Saliendo di condoleer, e dos doñonan a haya mas cos di yora. Aki nan un biaha mas dos auto a bira victima di destruccion y ladronicia for di nan auto. Na e sitio nos a papia cu ambos doño di e auto nan. Di ambos auto a basha e glas banda di chauffeur completo pa nan por a horta. For di un di e autonan, nan a bay cu e radio y di e otro, nan a habri e hood y bay cu e bateria. Awor net prome cu Pasco e personanan aki ta haya nan den gasto extra pa drecha e glasnan y tambe
pa cumpra radio y bateria. Sin papia mes cu bo lo no por bay niun caminda cu bo auto pasobra e no tin glas. Polis a tuma aangifte ya mucho no por a haci. Ta varios biaha e caso aki ta presenta na e mesun sitio. Tin hende cu a mira dos persona ta alehando di e autonan y drentando e casnan di pueblo di Tarabana. Algo mester ser haci pasobra ta keda demostra atrobe cu criminalidad no ta ni worry si bo ta tristo y a bay despedi di un ser stima cu a fayece. Aki paar di dia bo lo mester bay condoleer cu taxi, pasobra no ta sigur cu bo lo haya bo auto mes pafor bek.
Pagina 7
Yaris a dal ariba brommer na Seroe Blanco
STA. CRUZ -- Diahuebs anochi un boksmento a tuma lugar entre un brommer cu auto na Seroe Blanco. Ta asina cu segun e chauffeur di e Yaris, e no a mira e brommer cu tabata para pa bay drenta su cura di cas. Asina el’a dal e brommer. Danki Dios cu e no tabata bin cu velocidad halto. Polis di trafico a presenta tambe na e sitio y a papia cu ambos partido.