Diasabra Juni 1 2013
Pagina 16
Aruba conoce su prome Gobernador di Districto di Toastmasters señora Judith de Palm STA. CRUZ -- Na Mei ultimo a tuma lugar na Guyana, e Conferencia Caribense di Toastmasters di Districto 81. Aruba a participa na e evento aki cu tabata tin como tema “The highly anticipated National International Speech & Table Contest”. E paisnan cu a participa ta: Aruba, Barbados, Bonaire, British Virgin Islands, Cayman Islands, Curaçao, Grenada, Guyana, Haiti, Jamaica, Martinique, Puerto Rico, St. Lucia, St. Maarten, St. Vincent and the Grenadines, Trinidad and Tobago, Turks & Caicos y the US Virgin Islands. Na e conferencia aki Presidente di Aruba Toastmasters Club (ATC) sra. Judith de Palm a keda nombra como Gobernador di Area 6 Districto 81. Como Gobernador e lo guia tres Toastmasters Clubs, cual nan ta Aruba Toastmasters Club (ATC), Yamanota Toastmasters Club (cu a keda enagura na April ultimo) y Concordia Toastmasters Club di Corsou. E lo guia e tres clubnan ofreciendo nan entre otro curso, entrenamento y haciendo bishita oficial, pa nan yega na e nivel optimal di comunicación y liderazgo locual Toastmasters International ta ofrece. Toasmasters International ta reconoce e habilidad di Liderazgo cu sra. De Palm ta posee. Como presidente di ATC, hunto cu su miembronan, den un aña el’a logra eleva e club na e nivel máximo di Toastmasters, cu ta un ‘President Distinguish Club’. Aruba ta felicita Presidente Judith de Palm cu e tremendo logro aki. Esaki ta significa cu un biaha mas Aruba a destaca cu prestacion di su Toastmasters bao di encargo di un Presidente dinamico. Tambe nos ta tuma e oportunidad pa felicita TM- Linda HalmanBarry pa su participacion den e speech contest.