Diarazon Mei 15 2013
Pagina 13
Salvaguardiando nos Herencia Cultural Sub-aquatico Si e bida marino ta bo passion, e Cafe Cultural aki ta e ocasion
STA. CRUZ -- Museo Arqueologico Aruba, conhuntamente cu UNESCO Aruba, ta invita publico en general pa un anochi di Cafe Cultural cu un topico sumamente interesante y actual: ‘Underwater Cultural Heritage’. Diahuebs 16 di Mei proximo, di 7’or pa 8’or di anochi na Museo Arqueologico, lo presenta e importancia di salvarguardia nos herencia cultural sub-aquatico. Despues di e parti oficial cu ta consisti di entre otro dos charla interesante, lo sigui e anochi cu musica y snacks inspira pa e tema marino. Ta estima cu tin alrededor di 3 miyon sitio arqueologico den fondo di lama rond mundo. E sitionan aki antes tabata proteha door di nan ubicacion bao di lama y alavez nan inaccesibilidad. Awendia, tecnologianan specializa pa detecta presencia di
obhetonan den fondo di lama, ta relativamente accesibel pa esun cu por paga esaki. Banda di esaki, produccion masal di ekipo di buceamento, como tambe vehiculonan cu ta maneha bao di awa, a habri e caminda pa explora fondo di e oceanonan. Sinembargo, esaki tambe a haci sitionan arqueologico subaquatico hopi vulnerabel pa treasure hunters y explotacion comercial, como tambe daño involuntario y negligencia di esnan cu ta haci uso di lama. Tambe na Aruba nos tin sitionan arqueologico sub-aquatico hopi valioso y e ta hopi importante pa cana e caminda pa yega na proteccion structural (documentacion, estudio, conservacion, preservacion y maneho) di nos sitionan arqueologico bao di lama. Sitionan arqueologico bao di lama ta forma parti di
nos herencia cultural y den nos awanan teritorial nos tin un historia hopi rico. Impactonan di desgracianan riba lama a laga nan marcanan riba nos isla. Aruba tin lugarnan geografico (toponimo) di cual nan nomber ta deriva di barco cu a zink den awanan teritorial di Aruba. Boc’i Brik, na cual Museo Arqueologico Aruba actualmente tin un exposicion temporario dedica na dje, mes ta un bon ehempel di esaki. Aruba tin graf di naufrago, awendia nos tin descendientenan di tripulantenan di barconan cu a zink cu ta forma parti di nos sociedad y nos tin e marcanan visibel den lama di unda barconan a zink, como tambe naufragonan potencial cu no a ser discubri ainda. E anochi aki tambe lo entrega premio na e ganadornan di e Quiz di Aña La Reina.
Museo Arqueologico Aruba y UNESCO Aruba ta invita henter comunidad, pero en especial buceador, diveinstructors, piscador y tur persona cu di un of otro manera tin di haber of ta interesa den locual nos tin culturalmente den nos lama,
pa un anochi ameno cu 2 lectura interesante tocante e topico aki. Si e bida marino ta bo pasion, esaki ta e ocasion pa demostra y siña con pa yuda protege nos herencia cultural subaquatico.