Dialuna Mei 9, 2011
Pagina 10
Na Subway Paradera: Di dos atraco pa luna di Mei 2011
Atraco riba auto di Fast Delivery Service STA. CRUZ -- Diasabra anochi laat na Subway Paradera a sosode un atraco caminda dos atracador a comete atraco riba e auto di Fast Delivery, un KIA PICANTO A 15505. Segun testigo e atracadornan a presenta riba e chauffeur di sorpresa y spray algo den su cara. Nan a saca algo fo’i den su saco di carson y nan a lucha cune y purba di a hink’e den e auto. Asina mes cu nan a spray un liquido hopi iritante e chauffeur a lucha bek cu nan no por a hink’e den auto. Mientras tanto a bin un auto di pariba y nan a core subi e auto, un auto blauw parecido
na un Mitsubishi Lancer bieu. E testigo a purba di mira e number pero no a logra bon. Si el’a mira A3327 -- mas e no por a mira ya cu nan a ranca bay. E atracadornan a bay cu e saconan di
placa, caminda tin placa di Subway Alhambra y Subway Paradera. Segun version un rato prome e atracadornan aki a cumpra dos cerbez den e shap banda di Subway y despues nan a bay comete atraco riba e auto di Fast Delivery. Door cu e atracadornan a tira un liquido den cara di e chauffeur di FAST DELIVERY y afecta su wowo, a solicita ambulance pa asistencia medico. E chauffeur a ser transporta cu ambulance pa hospital. Tanto Atraco Team, polisnan y STOHD a presenta na Subway, mientras e otro unidadnan a keda riba caya pa buskeda di e auto blauw. Segun testigo e atracadornan aki ta parce Asiatico”Filipino”” pero no ta descarta cu nan ta descendiente di cualkier pais latino. Esaki ta e di dos atraco pa luna di Mei 2011. Criminalidad na Aruba ta sky-high mientras Dowers ta keiro na Merca ta tuma plakkaat di reconocimento cu e ta maneha husticia na un bon manera!